1 Ana ege swara ta Jisas tawa teigwa yugu yomara togl suna moglsre, ye kamo wakai i, yoba beke te moglko, tawa teigwa yoba bitno meglkwa i ya te, God lomo beke teigwa yoba ya te, Juda yoba yobano kade pra, ye moglmara udre, 2 kira pogl pre, yegl digwa, Ira ene dedugo, taragl yegl etne? Te, ira taragl yegl ero dugwa i, no di noro! digwa. 3 Yegl digo, Jisas di ikne ede, yegl dugwa, Na ama ka kira ta poglbo, ene di ikne ede naraiglkwa. 4 Jon yoba nigl bugl togwa i, God dedugo, erumo mo yoba dedigo, erume? Na di nario dugwa. 5 Jisas yegl dugo, yoba kade wagle yene meglmara di ikne ikne ede, ka di pre, yegl digwa, Nono di ikne, God ye Jon dedume dumun, yagl i ere mogl, Ene siragl eruko, ye kamo pre mediglkrime? di norabuka. 6 Ba nono di ikne ede, Makadigle yoba nomano idre, erume dumun, yoba magigl meglkwa i Jon ka kep yoba kaima ta moglmedi prikwa pre kobuglo idre, no si goraiglmiwe di, yene yegl digwa. 7 Yegl paugwa pre Jisas di ikne ede te, No ta pre kan erekrumniwe digwa. 8 Yegl digo, Jisas yegl dugwa, Yegl eran we, ira kagna kade naruko, kogon yegl erika i, ene ta ama di tebo, prikraiglmiwe dugwa.

9 Gaden wain yogwaAna Jisas yegl didre, yoba magigl meglkwa i ka ebrie swara ta dugwa, Yagl ta ede wain podo ere yaglkwa. Ere yaglsre, ede meda pi kanana wan moraglka pamedi yoba sugl mogl, ere nedre, kia ikne ye ere nedre, ikne na naraiglmedi sugl molo didre, ede dumo bage ta ogwa. 10 Pi mogl prukwa i, erme wain mogo bogl yenabuka egemo yomedi prisre, ye nigl kogonmo yagl ta komono kana dedugwa. Dedidre, Ene ede wain sugl meglkwa yoba meglmara en, ye mige kia ta tebi, idre, ede ikne unatniwe didre, dedugwa. Dedugo, ogwa i, ede wain sugl meglkwa yoba i, ye ere sidre, siragl ta tekre, yoko dedigo, ede ikne ugwa. 11 Ede ikne ugo, wain nem yagl aglke kor nigl kogonmo yoba ta dedugo, ede ogwa. Ba ede wain sugl meglkwa yoba i erimere ere, nigl kogon yoba i ama ere sidre, agai gorabedi ere, wain mogo kia ta tekrikwa ba yoko ede ikne ugwa. 12 Yegl mere ugo, wain nem yagl i aglke kor nigl kogon yoba namba 3 dedugo, ye ede ogwa i, ye ama podo kaima ere sidre, si meda edigwa. 13 Yegl erikwa pre ede wain nem yagl i, kina gudu mogl, kaima siragl mere eragledi prukwa. Prisre, nomane ta idre, Na pra wana dena mudna suna moglkwa i, dedibo, enan we, ye kandre, kamo praiglmiwe di prisre, ye wam dedugo, ogwa. 14 Ba wain sugl meglkwa yoba ye kandre, yene di ikne ikne ede pre, yegl digwa, Wain nem yagl ikra wam ugwa pre siragl mudu sugl kan munga i, ye mudu inabuka umiwe digwa. Yegl pre ye si gun we, nono taragl mudu kan munga i, no nono pre yenabiwe digwa. 15 Yegl didre, wain nem yagle wam ugwa i, si meda edidre, si geglme dugwa.

Jisas yegl didre, ama yegl dugwa, Ana ede wain nem yagl yoba kade moglkwa i, ye erimara i siragl ere tenabedi prime? 16 Ye ede ikne udre, ede wain sugl meglkwa yoba i mudu si gogl, ye makanmo i, yoba pere ogono wagle yenabiwe dugwa. Jisas yegl dugo, yoba prisre, yegl digwa, Kodo, taragl yegl ta plau dikro do! digwa.

17 Ana yoba ka gigledi yegl digo, Jisas ye kan gigle gogl moglsre, yegl dugwa, Ene ka yegl dimiba God kamo siragl pre bogl padiglkwa pamedi prime? God kamo ta yegl beglkwa,

Kobuglo yugu keigwa yoba i,

ye kobuglo gade imara i kobuglo swara ta kide yomedi kandre, kide kodigwa.

Ba God yugu ta kenagledi kobuglo swara ta kide kodigwa i, idre,

Yugu kei ede mitna enabara i,

Mabunomugl mabuno bogl paduglmiwe*

di, yegl beglme dugwa. 18 Yoba ta kobuglo i mina yage sinan, ye bogl bagla dinabuka. Te, kobuglo i yage si, yoba ta sinan, yoba i si deduwagle ere kodinabiwe di, Jisas yegl dugwa.

19 Ana Jisas yegl di kodugo, God lomo beke teigwa yoba ya tawa teigwa yoba bitno meglkwa i, ye Jisas ka ebrie dugwa i, no di boglmedi prisre, ye ege i, Jisas si kane sinamnedi prikwa ba ye yoba kuduglno goglsre, si kane sikrikwa.

20 Ana Juda yoba kade meglkwa i, ye Jisas aglau ta eran, kanamnedi sugl kan moglsre, ama yoba tau teke konbo mina Jisas nodo ere kanaiglmedi dedigwa. Yoba i, ka kibi kogl u Jisas kamo kaima wakai prikwa dagl erikwa ba kan moraiglmara Jisas ka dinabara aglau eran, ye i pi gavana moglmara kot ere tenamnedi prikwa. 21 Ana yoba i Jisas yegl kira pogl prikwa, Tisa yo, no prumga i, ene ka du keme didre, yoba beke tenga. Ene yoba kade meglkwa mo yoko meglkwa i kerekre, God konbaunamo kuno keme yoba beke tenga. 22 Yegl pre ene siragl we di pitne? Nono mige taks Rom king tenamga kuno erumo mo tekramne? digwa. 23 Yegl digwa ba Jisas ye bakagl narimedi kan pogl sidre, ye yegl di togwa, 24 Ene mige silva ta naribi, kanaluwe dugwa. Yegl dugo, ye mige silva ta yu teigo, Jisas mige i kandre, yegl dugwa, Ira kwiamo ya kagie mige i mina pame? dugwa. Dugo, ye di ikne ede, Rom king kwiamo ya kagie pamiwe digwa. 25 Yegl digo, Jisas ye yegl di togwa, Yegl eran we, taragl ta Rom king pre yenabuka i, Rom king teo. Te, taragl ta God pre yenabuka i, God teo! dugwa. 26 Ana ka yegl dugwa igne, yoba mudu gumuglnomugl ye bakagl tenamnedi erikwa i, manugo, ye nagino podo kogl, drano si kegl digwa.

27 Ana okuo, Sadyusi yoba tau Jisas moglmara wigwa. Sadyusi yoba digwa i, yoba ta goglsre, adigl u kor ta pikraiglmiwe digwa. 28 Ka yegl didre, tau Jisas moglmara u ka yegl digwa, Tisa yo, Moses ka ta bogl norumara i, yegl dugwa, Yagl ta abu inabuka ba gak kuglkre, goran, ye agigle ta morabuka i, abu werai i inan, gak kurabrika i, nem goglkwa agaimo idre, makanmo inabiwe dugwa. 29 Moses ka bogl norumara i mina ka kira ta poramga. Aglke ta agigle agigle 7-pela meglkwa. Ta komono moglkwa i, abu ta yugwa ba ye gak kuglkre, goglkwa. 30 Te, agigle namba 2 moglkwa i, ama yegl eruko, 31 agigle namba 3 ede pi namba 7 i, mudu abu werai i idre, gak kuglkre, geglkwa. 32 Ana okuo kaima abu i ama goglkwa. 33 Agigle agigle 7-pela i, mudu abu swara i igwa pre yoba adigl u kor enaiglkwa igne, abu i, ira ebie morabuka i di noro! digwa.

34 Ana Sadyusi yoba yegl digo, Jisas ye di ikne ede te, yegl dugwa, Makadigle yoba ka kaima yagl abu bogl inaiglkwa meglkwa 35 ba ege okuo ibo yegl ta paikrabuka. Yoba geglkwa adigl u kor pi God yoba suglno morabara moraiglkwa kuno erikwa meglkwa i, ye ta bogl ikraiglkwa. 36 Ye igne i, angelo meglmere mere kuno moglsre, aglke kor dagl ta goglkraiglkwa. God ye adigl u kor enaiglmedi eruko, erme ye God gagiglma kaima mogl kodigwa. 37 Ba yoba geglkwa ka kaima adigl u kor enaiglkwa paugwa i, Moses kaima i nogugl ede kodugwa. Okna ibo God ede kebra ta de bauglo erumara u suna moglsre, yegl dugwa, Na yagl Abraham, ya Aisak, ya Jekop Godno mogl pai moluwe* dugwa. 38 God ye yoba gogl kodigwa i, Godno moglkwa pre ta dikrukwa ba yoba kor mogl pai meglkwa i, Godno moglkwa pre dugwa. I siragl pre yoba mudu God gumuglo mina kor yoko meglmedi kanugwa.

39 Ana Jisas ka yegl di kodugo, God lomo beke teigwa yoba tau prisre, ka yegl digwa, Tisa yo, ene ka wakai kaima diniwe digwa. 40 Te, mokomugl i, yoba tau ye Jisas kira pogl praiglkwa i, kudugl geglkwa pre ka ta dikrikwa.

41 Ana Jisas yoba kira pogl yegl dugwa, Siragl pre yoba God Kere Yugwa yagl unabuka i, Devit gawamo ta morabe dime? 42 Devit yene buk Giglage mina God Kere Yugwa Yagl pre didre,

Neno Kade ere mogl, na Yaglna Kade yegl di togwa,

Ene ogona wo kra ame di moglo,

43 Na ene kudanen ikne yobuglo ere tedre, kagln mina atne edinaluwe*

di, Neno Kade ka yegl di, na Yaglna Kade di tome dugwa. 44 Devit yene God Kere Yugwa yagl i pre na Yaglna Kade we dugwa ba yoba tau Devit gawamo morabe digwa i we, siragl pre ka yegl dime? Na di nario di, Jisas yegl dugwa.

45 Ana yoba mudu ye Jisas kamo pre meglko, Jisas ye duglo beglkwa yoba yegl di togwa, 46 God lomo beke teigwa yoba i, ene bakagl te dinaiglmiwa. God lomo beke teigwa yoba meglkwa i, ye gagl suna olto, wakai yogwa i edinamnedi prisre, ye maket wanigwa igne yoba ye wakai we di teigwa i, gun podo yeigwa. Te, ka mabuno yugu yugugl eigwa igne mo yoba kaya mokna podo gaiglkwa igne, ye sia wakai, gumamugl iro ame dinamnedi prikwa. 47 Ba ye abu werai meglmara bakagl te, yuguno toglno kunogl idre, ama yoba wakai muniwedi kamage olto kuri kaima erikwa. Yegl pre God yoba ka tage tenabuka igne, ye ka podo kaima inaiglmiwe di, Jisas yegl dugwa.