1 Ana Rom king, ye kagie Sisar Taiberius we digwa i, bugla yugu 15-pela king moglkwa igne, Jon ye kogon mabuno bogl ersre, yoba ka mabuno di togwa. Ege i yoba kade tau yegl mere meglkwa, Pontius Pailat ye distrik Judia gavana moglko, Herot ye distrik Galili sugl moglko, Herot agigle Filip ye distrik suo Ituria ya Trakonitis sugl moglkwa. Te, igne i Lisanias ye distrik Abilene sugl moglko, 2 Anas ya Kaiafas ye tawa teigwa yoba bitno miurka. Igne i Jon, Sekaraia wam moglkwa ikra, dumo wau yomara moglko, God kamo i, Jon moglmara ugwa. 3 Ugo, Jon ye dumo tau nigl Jordan omara magigl yeigwa i mudu wan pidre, yoba ka mabuno di togwa. Ye ka mabuno dugwa i, yoba ta nomano yake tenaiglkwa i, ye i nogugl edinamnedi nigl buraiglme dugwa. Te, ye yegl eribi, God ye tadaglmeno gugl edenabiwe dugwa.

4 Ana Jon kogon yegl erukwa i, ka tau okna ka kep yagl Aisaia buk ta boglmara suna paugwa i, plau dugwa. Ye yegl boglkwa,

Yagl ta dumo wau yomara mogl, ka podo di, yoba yegl di tenabiwa,

Yagl Kade unabuka pre ene ye konbomo ake kun ersre,

ye unabara ake du di edenaiglkwa pamiwa.

5 Dumo ta guglo yenabuka i, ere wakai ersre,

Muglo meglbi podo ya kebra pra, wake, i atne edibi, auduno yenabiwa.

Te, konbo ta gekenabara i, ene ake du edidre,

konbo kide erabara ere wakai eraiglkwa.

6 Ene yegl eribi, God ye yoba siragl mere ere inabuka i,

yoba mudu kanaiglmiwe*

di, yegl boglkwa.

7 Ana yoba mere Jon nigl bugl norabedi wigwa ba Jon ye yegl di togwa, Ene toki kide nagiglema meglmiwe dugwa. God dem kubrisre, ka tage norabuka igne i ene teke panaiglmedi ira dume? 8 Ene ka kaima nomano ta yake teigwa panan, ene mabuno boraiglmara i mina i nogugl edenaiglkwa pamiwe dugwa. Te, ene ere mogl, Abraham gawama munga pre God no ta sikrabe digwa i, yegl ta dikrio! Kobuglo magigl paigwa i Abraham gawama koglo edidre, ye swara ere wakai ere tenagledi pran, ye erabuka kuno erabiwe dugwa. 9 Ene prio! Ede tau mogo koraiglkwa paugwa ba mogo wakai ta koglkribi, yoba di maima idre, wei atne ede, gudu i pi, pia si doga mina edimere mere yegl, God ene yegl ere tenarume di, yegl dugwa.

10 Ana Jon yegl dugo, yoba mere makai si meglkwa i, ye di pre, Ana no siragl eramne? digwa. 11 Yegl digo, Jon ye di ikne ede tedre, yegl dugwa, Ene gaglnen suna suo ta yenan, ene agitn ta gaglmo suna yekrabuka i, ta to! dugwa. Te, ene kaya moknanen mere ta yenan, ene ama kuno yegl mere eratniwe dugwa.

12 Jon ka yegl mere di kodugo, taks igwa yagl tau nigl buramnedi wigwa i, Jon di pre, No siragl eramne? digwa. 13 Yegl digo, Jon ye di ikne ede te, yegl dugwa, Ene Gavman ta io dinabere i keme io! Tau ama i tebe edinamnedi erekrio dugwa.

14 Yegl dugo, kibr nem tau ama Jon yegl di prikwa, No kibr nem munga i, siragl eramne? digwa. Yegl digo, Jon ye di ikne ede te, yegl dugwa, Ene yoba migeno gudu i nekre, te ye taraglno inamnedi ama kot kibi ere tekrio! Ba gavman ene fotnait ta teigwa i, pra norimedi praiglkwa pamiwe di, Jon yegl dugwa.

15 Ana yoba mudu God Kere Yugwa Yagl unabedi kwie ere meglkwa i, Jon u ka dugwa i, prisre, Aiya, yagl i ye God Kere Yugwa Yagl ta unabe digwa ikra moglmo mo di, kinano gudu meglko, 16 Jon mane di prisre, ye mudu yegl di togwa, Na ene nigl mina nigl bugl teiga ba yagl ta unabuka i, ye yobuglomo podo padre, na egre atne edumiwa. Te, na ama ye nigl kogonmo yoba mere yegl moglsre, ye kagle towo kan i na poko edenaglka kuno erekriwa. Te, yagl i udre, na nigl bugl teimere mere ene tau God Murubuglomo si kau si tedre, te tau si doga mina edidre, erabiwa. 17 Yoba wit mogo si yu makai sidre, ugla pogl, mogo yugugl makai sidre, nagie gagl tege erimere mere yegl, yagl i udre, kuno yegl erabuka. Te, ye garabara i, doga gogokre, aimadi de pai morabiwe dugwa.

18 Ana Jon ka yegl mere didre, ye God kamo wakai i, yoba di nogugl ede tenagledi ama ka gigledi tau mere yoba i di togwa.

19 Ana Jon ere mogl, yagl Herot, ye gavman sugl moglkwa yagl ka togwa. Ka tedre, Ene agitn ebie Herodias inga i, aglau etniwe didre, Herot mabuno kide mere erumara pre ama ka togwa. 20 Ka togo, Herot ere mogl, Jon si kane sugwa. Herot tadaglme mere erukwa ba Jon si kane sugwa i, tadaglme ta ama akie ere i tebe edugwa.

21 Ana okna, Herot ye Jon si kane sikrukwa igne, Jon ye yoba tau mere kide nigl bugl tedre, Jisas ama nigl bugl togwa. Ana igne i Jisas nigl bugl kodidre, kamage ere moglko, kamun mitna ibo ede u koglo koglo ogo, 22 Mudu Murubuglo u kua yumugl mere yegl pidre, pru di ede atne u Jisas moglmara ugwa. Ugo, God heven ibo ka ta di atne edidre, yegl dugwa, Ene na Wana motniwa. Na dena muduna ene tedre, ene wakai kaima kaniwe di, yegl dugwa.

23 Ana Jisas kogon mabuno bogl erukwa igne, ye bugla yugu 30 mere yegl ne kodugwa. Ana yoba prikwa i, Jisas ye Josep wam moglmedi prikwa. Te, Josep ye yagl Heli wam moglkwa.* 24 Heli ye Matat wam moglkwa. Te, Matat ye Livai wam moglkwa. Te, Livai ye Melki wam moglkwa.

Te, Melki ye Janai wam moglkwa.

Te, Janai ye Josep wam moglkwa.

25 Ana Josep ye Matatias wam moglkwa.

Te, Matatias ye Amos wam moglkwa.

Te, Amos ye Nahum wam moglkwa.

Te, Nahum ye Esli wam moglkwa.

Te, Esli ye Nagai wam moglkwa.

26 Ana Nagai ye Mat wam moglkwa.

Te, Mat ye Matatias wam moglkwa.

Te, Matatias ye Semen wam moglkwa.

Te, Semen ye Josek wam moglkwa.

Te, Josek ye Joda wam moglkwa.

27 Ana Joda ye Joanan wam moglkwa.

Te, Joanan ye Resa wam moglkwa.

Te, Resa ye Serubabel wam moglkwa.

Te, Serubabel ye Sealtiel wam moglkwa.

Te, Sealtiel ye Neri wam moglkwa.

28 Ana Neri ye Melki wam moglkwa.

Te, Melki ye Adi wam moglkwa.

Te, Ade ye Kosam wam moglkwa.

Te, Kosam ye Elmadam wam moglkwa.

Te, Elmadam ye Er wam moglkwa.

29 Ana Er ye Josua wam moglkwa.

Te, Josua ye Elieser wam moglkwa.

Te, Elieser ye Jorim wam moglkwa.

Te, Jorim ye Matat wam moglkwa.

Te, Matat ye Livai wam moglkwa.

30 Ana Livai ye Simeon wam moglkwa.

Te, Simeon ye Juda wam moglkwa.

Te, Juda ye Josep wam moglkwa.

Te, Josep ye Jonam wam moglkwa.

Te, Jonam ye Eliakim wam moglkwa.

31 Ana Eliakim ye Melea wam moglkwa.

Te, Melea ye Mena wam moglkwa.

Te, Mena ye Matata wam moglkwa.

Te, Matata ye Natan wam moglkwa.

Te, Natan ye Devit wam moglkwa.

32 Ana Devit ye Jesi wam moglkwa.

Te, Jesi ye Obet wam moglkwa.

Te, Obet ye Boas wam moglkwa.

Te, Boas ye Salmon wam moglkwa.

Te, Salmon ye Nason wam moglkwa.

33 Ana Nason ye Aminadap wam moglkwa.

Te, Aminadap ye Atmin wam moglkwa.

Te, Atmin ye Arni wam moglkwa.

Te, Arni ye Hesron wam moglkwa.

Te, Hesron ye Peres wam moglkwa.

Te, Peres ye Juda wam moglkwa.

34 Ana Juda ye Jekop wam moglkwa.

Te, Jekop ye Aisak wam moglkwa.

Te, Aisak ye Abraham wam moglkwa.

Te, Abraham ye Tera wam moglkwa.

Te, Tera ye Nahor wam moglkwa. 35 Ana Nahor ye Seruk wam moglkwa.

Te, Seruk ye Reu wam moglkwa.

Te, Reu ye Pelek wam moglkwa.

Te, Pelek ye Eber wam moglkwa.

Te, Eber ye Sela wam moglkwa.

36 Ana Sela ye Kainan wam moglkwa.

Te, Kainan ye Arpaksat wam moglkwa.

Te, Arpaksat ye Siem wam moglkwa.

Te, Siem ye Noa wam moglkwa.

Te, Noa ye Lamek wam moglkwa.

37 Ana Lamek ye Metusela wam moglkwa.

Te, Metusela ye Enok wam moglkwa.

Te, Enok ye Jaret wam moglkwa.

Te, Jaret ye Mahalalel wam moglkwa.

Te, Mahalalel ye Kenan wam moglkwa.

38 Ana Kenan ye Enos wam moglkwa.

Te, Enos ye Set wam moglkwa.

Te, Set ye Adam wam moglkwa.

Te, Adam, ye God wam moglkwa mere yegl paugwa.