1 Ana wakan kade ege ta, Jisas ye duglo beglkwa yagl bogl wan ede pi yoba kugl mogo ere yaiglmara suna eigwa. Ye ede suna eigo, ye duglo beglkwa yagl ere mogl, kugl mogo tau ursre, ogono mina ugla pogl, nedre, nedre, ede eigwa. 2 Ne ede eigo, Farisi yoba tau kandre, ye di te, yegl digwa, Ene siragl pre Wakan Kade ege mawagl pamara kugl mogl si yuime? digwa. 3 Yegl digo, Jisas di ikne ede, yegl dugwa, Okna ibo, Devit ya yoba tau ye bogl akie meglkwa i, kidan geglko, Devit siragl mere erukwa i, ene kerimo mo kerekrime? 4 Ye God yugumo yomara ede yugugl pidre, bret tau God gumuglo mina yeigwa i tau i nedre, yoba ye bogl akie meglkwa i ama tau togo, neigwa. Lo dugwa i, tawa teigwa yoba keme bret i nenaiglme dugwa ba Devit kidan goglkwa pre yegl erumiwe dugwa. 5 Jisas yegl didre, ama yegl dugwa, Na Yoba Wam moglka i, wakan kade ege i, na nem yagl moliwe dugwa.

6 Ana wakan kade ege ta, Jisas ede ka mabuno yugu yomara yugugl pidre, yoba God kamo beke te moglkwa. Te, yugugl i, yagl ta ogo wo kra mawa sugwa ama yugugl moglkwa. 7 Ana Jisas yoba ka beke te moglko, God lomo beke teigwa yoba ya Farisi yoba ye wakai ere kan moglsre, Jisas wakan kade ege i, yagl i ta ere wakai ere tenan, ene mawagl pamara etniwedi didre, kot ere tenamnedi kan meglkwa.

8 Yegl kan meglkwa ba ye nomano siragl mere paugwa i Jisas pre kan ere kodidre, yagl ta ogo mawa sugwa i di tedre, Ene u yoba meglmara suna wom adigl moglo dugwa. Yegl dugo, yagl i u suna adigl moglkwa. 9 Adigl moglko, Jisas ye yoba makai si meglkwa i yegl di togwa, Na kira ta poragledi priwe dugwa. Wakan kade ege i, nono God lomo duglo boglsre, siragl eramne? Mabuno wakai eramno mo mabuno kide eramne? Te, wakan kade ege nono yoba ere inamno mo si goramne? dugwa. 10 Jisas yegl didre, yoba makai si meglkwa i mudu kan winabo didre, yagl ta ogo mawa sugwa i yegl di togwa, Ene ogon ake duglo suo! dugwa. Yegl dugo, yagl i ye Jisas dumere eruko, ye ogo u wakai ogwa. 11 Ye ogo u wakai ogo, God lomo beke teigwa yoba ya Farisi yoba ikra deno podo kubrisre, yene pi makai si mogl, Jisas siragl mere ere kide ere tenaiglmere ka di keglkwa.

12 Ana igne i Jisas God kamage ere tenagledi ede muglo ta pidre, eduer God kamage ere te mogl ogo, kamun tagugwa. 13 Ana taganamogl ye duglo beglkwa yoba agle dugo, wigo, ye yagl 12-pela kere idre, yoba i, Jisas kere iga yoba meglmiwe dugwa. 14 Ye yoba kere yugwa i, swara ta Saimon moglkwa. Te, Jisas ye kagie kor ta yei tedre, Pita we dugwa. Te, ye ama Saimon agigle Andru kere yugwa. Te, ye Jems ya Jon ya Filip ya Bartolomyu kere idre, 15 Matyu ya Tomas ya Jems ta, Alfius wam moglkwa i kere idre, Saimon ta, ye Selot yoba ta moglkwa i,* kere idre, 16 Judas, yagl ta kagie Jems we digwa i wam kere idre, Judas Iskariot, ye okuo Jisas i pi kudamo ikne ogono mina yogwa i, ama kere yugwa.

17 Ana Jisas ye kere yugwa yagl bogl muglo ibo kide kodo, ede atne u dumo auduno ta yomara adigl meglko, Jisas duglo beglkwa yoba tau mere ama u makai si meglkwa. Te, yoba tau mere distrik Judia suna i, bage bage mogl wigo, dumo Jerusalem mogl wigo, mudi nigl bina taun suo Tair ya Saidon mogl wigo, erikwa. 18 Yoba mere kide wigwa i, ye Jisas ka dinan, prisre, kideno ama ere wakai ere norabedi wigwa. Wimara i, yoba murubuglo kide ye ere kide ere teigwa meglkwa i, Jisas murubuglo kide i di meda edugo, ede meda eigwa. 19 Te, yoba mere kide ye Jisas ake pramnedi erikwa. I siragl pre Jisas yobuglomo tau ede meda pi yoba kide sigwa i, mudu ere wakai ere togwa.

20 Ana Jisas kan ye duglo beglkwa yoba meglmara edidre, ye yegl di togwa,

Ene goduglme yoba meglkwa i, gun yenaiglkwa paugwa.

I siragl pre God yoba kingno morabara dumo i, ene inaiglmiwe dugwa.

21 Te, ene erme kidan geglkwa i, gun yenaiglkwa paugwa.

I siragl pre ene okuo nebi, dano erabiwa.

Te, ene erme kai erikwa i, gun yenaiglkwa paugwa.

I siragl pre ene okuo gaugl eraiglmiwe dugwa.

22 Jisas yegl didre, ama yegl dugwa, Na Yoba Wam moglka i, na duglo boraiglkwa pre yoba ene kide kandre, ene si meda edenaglkwa mo, ka tenaiglkwa mo, ene yoba kide meglmedi kagno ta ere kide ere tebi, 23 ene heven ibo topo podo ta inaiglkwa pre ene gun yedre, kaglno egrio. Te, ene ama praiglkwa i, ene ere kide ere tenaiglkwa i, okna ibo ye kowano awano ama kuno yegl ersre, God kamo kep yoba ere kide ere teimiwe we di praiglkwa.

24 Jisas yegl didre, ama yegl dugwa,

Ene tau gun yenaiglkwa ba ene tau mige moni podo kan neigwa i, ene kan kun erio!

I siragl pre erme deno muduno wida dugwa ba okuo yegl ta paikrabiwe dugwa.

25 Te, ene erme kaya mokna neigo, dano erukwa i, kan kun erio!

I siragl pre ene okuo kidan goraiglmiwa.

Te, ene erme gaugl erikwa i, kan kun erio!

I siragl pre ene okuo kide prisre, kai eraiglmiwe dugwa.

26 Jisas yegl didre, ama yegl dugwa, Okna ibo ka kep yoba kibi meglkwa i, ene kowano awano kagno ake i mitna edigwa pre yoba ene erme kagno ake mitna edibi, kan kun erio dugwa.

27 Ana Jisas ka yegl di kodidre, ama yegl dugwa, Ene na kana pre meglkwa yoba i, na ene ama yegl di teiga, ene kudano ikne deno muduno teo! Te, yoba ta ene kide kanaiglkwa i, ene ere wakai ere teo. 28 Te, ye ka kide di tenaiglkwa ba ene ka wakai di ikne ede teo. Te, ene ta ere kide ere tebi, kamage ere teo. 29 Yoba ta ene sinan, paunan koglo bogln, ene kan ake tedre, koglo ama suo do. Te, yoba ta ene ir gaglnen gudo inan, gaglna suna i ama inabedi kanige ero. 30 Yoba ta ene taraglnen ta naratnba dinabuka i, ene tedre, yoba ta ene taraglnen gudu inabuka i, ene ama ikne ede naro dikro. 31 Yoba pere ene siragl mere ta ere naraiglmedi pitnere i, ye kuno yegl mere ere to! di, Jisas yegl dugwa.

32 Ana Jisas ka ta ama yegl dugwa, Ene ere mogl, yoba ene wakai kanigwa i keme wakai kanibi, ira ene debino sinabe? Tadaglme yoba ama ye wakai kanigwa yoba i keme wakai kan meglkwa. 33 Mo, yoba ene ere wakai ere tenaiglkwa i keme ere wakai ere te meglbi, ira debino sinbabe? Tadaglme yoba ama kuno yegl erikwa. 34 Te, ene yana ta dibi, te ikne edenaiglkwa moraiglkwa keme ta te motn, ira kra ene debin sinabe? Tadaglme yoba ama mabuno swara i tadaglme yoba ere tedre, teimara ikne edinamnedi prikwa. 35 Ba ene kudano ikne deno muduno tedre, ere wakai ere teo! dugwa. Te, ye dina ere tedre, noro ikne edinaiglmedi prikrio! Ene yegl eribi, okuo ene topo podo ta idre, ama Neno heven ibo moglmere mere yegl gak wakai moraiglmiwa. I siragl pre God mabunomo ama yegl paugo, tadaglme yoba moglsre, tenk yu di kankrikwa i, ye ere wakai ere te pai moglmiwa. 36 Ene Neno Kade yoba mudu mitno goglsre, ere wakai ere tomere yegl, ene ama kuno yegl erio! di, Jisas yegl dugwa.

37 Jisas yegl didre, ama yegl dugwa, Ene jas mere yegl moglsre, yoba pere kan yubu sikrio. Ene yoba pere kan yubu sikribi, God ene ama ta kan yubu sikrabuka. Te, ene God di tedre, yoba ta ka tage to! dikrio. Ene yegl ta dikribi, God ene ama ka tage tekrabuka. Ene yoba pere aglauno kide kodo tebi, God ene aglauno ama kide kodo tenabuka. 38 Ene taraglno yoba pere tebi, siragl mere tenaiglmere yegl God kuno ere enene te ikne edenabuka. Edidre, konbauna kane kane mina siragl mere kide ake ple di tenabiwe di, yegl dugwa.

39 Ana Jisas ka yegl di kodidre, ka ebrie swara ta ama yegl dugwa, Yoba gumuglo kin yenabuka ta ere mogl, ye agigle gumuglo kin yogwa ta i ogo akidre, konbauna ede enan, kuno erabo? Ta manabuka. Ye suo akie pi guglo sinabriwe dugwa. 40 Kuno yegl mere skul gak ta ere mogl, ye tisamo egre atne edekrabuka ba ye skul mere dinan, ye tisamo moglmere kuno yegl morabuka pamiwe di, Jisas yegl dugwa.

41 Jisas ka yegl didre, ka ta ama yegl dugwa, Siragl eruko, ene agitn gumuglo mina ede dekne kebra ta paugwa ibo kandre, ede mudu ta enene gumugln mina paugwa i, kankre dine? 42 Ede podo ta ene gumugln mina pai moglko, ene kanige ere, agitn moglmara pi di te, Agra, na ede dekne kebra ta gumugln mina paugwa i, i meda edinaluwe dinga i, kuno ta erekrume dugwa. Ene mabuno kibi etnga. Ede podo ta gumugln mina paugwa i komono kana i meda edin, ene kan pogl sidre, ede dekne kebra ta agitn gumuglo mina paugwa i, i meda edinatnga kuno erabiwe di, Jisas yegl dugwa.

43 Ana Jisas ka yegl di kodidre, ka ta ama yegl dugwa, Ede wakai ta mogo kide ta koglkrabuka. Te, ede kide ta mogo wakai ta koglkrabuka. 44 Yegl pre yoba ede swara swarade mogo siragl mere keglkwa i kandre, ede wakai paimo mo kide paimo mo i, kan pogl sigwa. Yoba fik mogo mo wain mogo ta uramnedi pribi, kewan kagigle edie i mina koran, i ta pi urokraiglkwa. 45 Kuno yegl mere yoba wakai ta morabuka i, ye nomane ya dem muduo wakai paugwa pre ebrie mabunomo ama wakai panabuka. Ba yoba kide ta morabuka i, ye nomanemo ya dem muduo kide paugwa pre ye ebrie mabunomo ama kide panabuka. Yoba deno muduno mina siragl yogwa i, ka dinaiglmara i mina di meda edinaiglmiwe di, Jisas yegl dugwa.

46 Jisas ka ta ama yegl dugwa, Ene na pre Yagl Kade yo di moglsre, na kana duglo boglkrikwa i, na kide priwe dugwa. 47 Yoba ta na moglmara udre, ka diga i prisre, duglo boglkwa i, na ye siragl mere moglkwa i di boglsre, ka ebrie ta dinariwa. 48 Yoba ta nomane wakai paugo, yugu wakai ta keigwa mere yegl ye moglkwa. Yoba i, makan wake ede atne pidre, kobuglo pamara yugu guglo boglkwa. Okuo kamun podo sugo, nigl podo u yugu i sugwa ba yugu i piga dikrukwa. I siragl pre yugu keigwa yaglmo i, yugu gigledi keigwa. 49 Ba yoba ta na kana sedinan, ye yugu kide ta keigwa mere yegl morabuka. Yoba i, makan wakekre, yugu guglo yoko bodiglsre, yugu keigwa. Yegl pre okuo kamun podo ta sinan, nigl podo udre, yugu i si piga dinan, yugu i tabre kaima yage sidre, u kide pi kodinabiwe di, Jisas yegl dugwa.