1 Ana okuo, Yagl Kade ere mogl, ye yagl 12-pela okna dedumere mere yegl, ye yagl 72 aglke kor dedugwa. Ye dedugwa i, Jisas okuo taun ya dumo swara swarade wan enabara i, ye suode ede okna pi, di tenaiglmedi dedugwa. 2 Ye dedidre, ka ebrie ta ama di togwa, Kaya mokna mere kide de kodugwa ba kogon yoba kunabe meglmiwa. Kunabe meglkwa pre ene kaya mokna ere yaglkwa Yobamo di pribi, ye kogon yoba mere dedenan, kaya mokna si yunaiglmiwe dugwa.

3 Ana Jisas yagl wagle i ama yegl di togwa, Ene ede pere pere pio. Na ene dediga i, ene sipsip nagigle mere yegl moglsre, agl are meglmara suna enaiglkwa mere yegl paugwa. 4 Te, ene enaiglmara taragl swara idre, pikrio. Ene mige gagl mo gagl kaban mo, kaglno towo ama ake idre, pikraiglkwa. Te, ene konbo bage enaiglmara i, yoba ta tegigl yebi, ene ye wakai we di teikre, konbauna pi pai molo. 5 Ana ene ede pi yugu ta yugugl panaiglmara i, ene yoba deno muduno wida dinabedi di teo. 6 Ye deno muduno wida di inaiglkwa ta meglbi, kaima inaiglme dugwa. Ba ta manan, ta ikraiglkwa. 7 Te, ene ede yugu ta pi padre, ta padre, erekrio. Ene yugu swara i moglsre, ye kaya mokna ya nigl siragl mere tenaiglkwa i, pra neo. I siragl pre kogon yoba topono i nedre, kogon eraiglkwa i, kuno erumiwe dugwa.

8 Jisas yegl didre, ama yegl dugwa, Ene dumo ta ede suna ebi, dumo i nem mam ene di ibi, ene kaya mokna siragl mere ta tenaiglkwa i, ene gua i neo. 9 Te, dumo i yoba kide ta sinabuka i ene ere wakai ere tedre, yoba dumo i yegl di teo, God ene kingno morabuka igne i ede magigl umiwe dio. 10 Ba ene dumo ta ede suna ebi, dumo i nem mam ene ta di ikribi, ene ye dumono suna i adigl mogl, yegl dinaiglkwa, 11 God ene ka tage tenabuka i, nogugl panabedi pre no erme ogono nigl kuniwa. Nigl kunga ba ene pre kan eraiglkwa i, God yoba kingno morabuka igne i ka kaima ede magigl u kodumiwe di, yegl dinaiglme dugwa. 12 Te, na ene di teiga, Yoba i ene kano sedigwa pre God yoba ka tage tenabuka igne, Sodom yoba ka tage tenabuka i, kebra panabuka ba yoba i, ka podo tage tenabiwe di, Jisas yegl dugwa.

13 Ana Jisas yegl didre, ama yegl dugwa, Ene Korasin ya Betsaida yoba meglkwa i, yubun podo inaiglmiwa. Na ene gumuglnomugl kimagl mere erika ba nomane yake tekrikwa. Taun suo Tair ya Saidon kimagl yegl eria, taun suo i, kamun kuade nomano yake tedre, lap gagle yaglkwa pre, yugum pere edimara bolamugl ame digo. 14 Ba God yoba ka tage tenabuka igne, Tair yoba ya Saidon yoba yubun tau kebra dagl inaiglkwa ba ene yubun podo kaima inaiglmiwa. 15 Te, ene Kapernaum yoba meglkwa i, ene mogl mitna edidre, heven ibo enamnedi primo? Ta pikraiglkwa. Ene ede atne kaima pidre, yoba geglkwa pai meglmara enaiglmiwe di, Jisas yegl dugwa.

16 Jisas yegl didre, ye yagl tau dedugwa i ama yegl di togwa, Yoba ene kano pribi, na kana ama prikwa. Ba yoba ta ene kano sedibi, ye na kana ama sede, God na dedugwa i ama kamo sedimiwe di, yegl dugwa.

17 Ana Jisas yagl 72 dedugwa ikra, ye wan mogl, ede ikne udre, gun podo yei, Jisas yegl di teigwa, Yagl Kade yo, No ene kagn mina kogon erumnara i, murubuglo kide ama kano duglo beglmiwe digwa. 18 Yegl digo, Jisas di ikne ede yegl dugwa, Na okna kan moglko, kamun tai tabre sumere yegl Satan heven ibo mogl, yage makandigle sugo, na kaniga. 19 Ana erme we, ene na kogona eraiglmedi yobuglo teiga pre ene toki kide ya toki giabade egraiglkwa ba ene ere kide ere tekraiglkwa. Te, Yagl kide kudano ikne moglkwa ikra, pra yobuglomo egre atne edenaiglkwa. 20 Ba murubuglo kide ene kano duglo beglkwa i pre gun kaima yekrio. God ene kagno heven ibo bogl kodugwa swara i pre gun yeio dugwa.

21 Ana igne i Mudu Murubuglo ye Jisas gun podo yenabedi eruko, Jisas gun podo yedre, yegl dugwa, Nina, ene kamun mitna ya makan gaba Nem Yagl motnga i, na ene kagn kade teiwa. Ene yoba tau mogl mitna edidre, bitno podo pamedi prikwa i pre pogl si dinaiglmedi ersre, yoba gak kebra nomano pamere mere igwa i, pre pogl sinaiglmedi etniwa. Nina, ka kaima ene yegl etnga i, siragl pre enene wakai pitnere etniwe dugwa.

22 Jisas yegl didre, ama yegl dugwa, Na Nina ere mogl, taragl mudu yu na ogona mina edugwa. Te, na God Wam kaima siragl mere moglka i, yoba ta pre kan erekrikwa ba na Nina swara pre kan erukwa. Te, na Nina siragl mere kaima moglkwa i, yoba ta pre kan erekrikwa ba na ye Wam moglka i pre kan erika. Te, na yoba ta i nogugl ede tenagledi prika i keme na Nina pre kan eraiglme dugwa.

23 Ana Jisas ka yegl didre, kan ake te, ye duglo beglkwa yoba kandre, ye keme yegl di togwa, Na kogon tau mere ene meglmara eriko, ene gumuglno mina kanigwa pre ene gun yeio dugwa. 24 Na ene ka kaima di teiga, ene taragl tau kanigwa i, ka kep yoba ya king okna meglkwa i, tau mere kanamnedi prikwa ba kankre, geglkwa. Te, ene ka prikwa i, ye ama pramnedi prikwa ba prikre, geglmiwe di, yegl dugwa.

25 Ana ege ta, God lomo beke togwa yagl ta adigl mogl, Jisas ka ta aglau ere dinabo mo di, pragledi yegl dugwa, Tisa yo, na siragl mere ersre, aimadi kamin kor moraiglkwa ikra kaima inagle? dugwa. 26 Yegl dugo, Jisas di ikne ede yegl dugwa, God lomo mina siragl mere beglkwa i do. Te, ene ama kersre, siragl mere dumedi pitne? dugwa. 27 Yegl dugo, yagl i di ikne ede yegl dugwa, God lomo yegl dugwa, Ene den mudun bogl mudu Yaglnen Kade God tedre, ene nomanen ya yobugln bogl mudu te ene mudu motnere God to* dumiwa, te ene enene wakai kanere mere yegl, yoba ta magigl akie kipanaiglkwa i, ama yegl mere wakai kano* di, God lomo yegl dume dugwa. 28 Yagl i yegl dugo, Jisas aglke kor yegl dugwa, Ene kuno ere dinga. Ene dinere yegl etn, kor moratniwe dugwa.

29 Ana Jisas yegl dugo, God lomo beke togwa yagl i aglaumo nogugl pai dinabedi Jisas yegl di prukwa, God lomo suna, yoba ta yobanma we dugwa i, ira pre dume? dugwa. 30 Yegl dugo, Jisas di ikne edidre, ka ebrie ta yegl dugwa, Yagl ta dumo Jerusalem kide kodo, ede dumo Jeriko enagledi konbo bage ugo, kunogl gogl yoba u ere sidre, kuguglmo gaglmo ya taraglmo mudu kunogl idre, ede eigo, yagl i gorabuka magigl eruko, pai moglkwa. 31 Ana igne i tawa togwa yagl ta ere mogl, konbo swara i mina udre, yagl i pai moglko, kandre, ede bina pi, kan kor erekre, ede ogwa. 32 Mokomugl i, Livai yagl ta ama yagl i pai moglmara u kandre, yagl ta erumere mere ama ede bina pi, kan kor erekre, ede omiwe dugwa.

33 Ana yagl suo i yegl ere ede ebrika ba Samaria yagl ta konbauna ede pi yagl i pai moglmara u kandre, mirie gogl, ye ta erekrabere mere ye ersre, 34 ye pai moglmara pi ye sigwa boglmara i wain nuglo ya oliv nuglo toide edidre, tu si togwa. Tu si tedre, yagl i yene donkimo bolamugl edidre, auro i pi haus pasindia ta yomara pidre, suglmo moglkwa. 35 Ana taganamogl Samaria yagl i ere mogl, mige silva suo i meda ede, haus pasindia nem yagl moglkwa i tedre, ye yegl di togwa, Ene yagl i suglmo moglsre, taragl tau inabuka mere yegl panabuka i te moglo. Mige suo i dudinan, okuo siragl ta eratnga i, na wan ikne wibo, dina mere yegl panan, ene te ikne edinaluwe di, yagl i yegl dumiwe di, Jisas yegl dugwa.

36 Ana Jisas yegl didre, God lomo beke togwa yagl i yegl di prukwa, Ana yagl suota konbauna wimara i, yagl ira ta kunogl gogl yoba ere sigwa i ye yobamo mere yegl moglmedi ake ple di tome? dugwa. 37 Yegl dugo, yagl i di ikne ede, yegl dugwa, Yagl ta ye mirie goglkwa i, ye yobamo moglmiwe dugwa. Yegl dugo, Jisas aglke kor yegl dugwa, Ana ene pi yagl i erumere yegl ero! dugwa.

38 Ana Jisas ye duglo beglkwa yagl bogl konbauna pi mogl, ege swara ta dumo ta ede suna wigwa. Ede suna wigo, abu ta ye kagie Marta we digwa i, ye di idre, yugugl edugwa. 39 Ana abu Marta i, ye abauglo ta moglkwa, kagie Maria we digwa. Maria i, Jisas kagle mina ame di moglsre, ye ka dugwa i pre moglkwa. 40 Maria ye Jisas kamo pre moglko, Marta kaya mokna podo siragl mere gaglsre, ere wakai erabere pre kina gudu prukwa. Prisre, Jisas moglmara u yegl di prukwa, Yagl Kade yo, na abara ere mogl, na swara kogon mudu erabedi kanige erukwa i, ene kano? dugwa. Ene ye di ten, ye na ake ple di narabedi prie dugwa. 41 Marta yegl dugo, Yagl Kade di ikne ede yegl dugwa, Marta yo, ene taragl kane kane pre nomane sidre, kinan gudu pitnga 42 ba taragl swara keme pre i mitna edinatnga paugwa. Taragl wakai swara i, Maria inagledi prukwa pre ye i dinabedi si kegl dikramga pamiwe di, Jisas yegl dugwa.