1 Ana ege ta Jisas nigl nubun Genesaret bina adigl moglsre, God kamo yoba beke te moglko, yoba mere ka dinan, pramnedi u kau si, gagno bolamugl kaima moglsre, ka dugwa pre meglkwa. 2 Ana Jisas ka beke te mogl kan iro ede kanugwa i, baglkugl suo nigle bina pai miurko, kanugwa. Baglkugl suo i, buglo bagle ere sigwa yoba yu padiglsre, degigl gaglno was ere meglkwa. 3 Jisas ye baglkugl suo i kandre, swara ta puglo di ede tebe ogwa. Baglkugl i, Saimon pre yogwa. Ye puglo di ede tebe pi moglsre, Saimon agle didre, ye yegl di togwa, Ene u baglkugl kuri ta ake nu si nigle suna edo! dugwa. Yegl dugo, Saimon ye dumere eruko, Jisas baglkugl tebe ame di moglsre, yoba nigle bina meglkwa i, God kamo beke togwa.

4 Ana Jisas ka mabuno di kodidre, Saimon di tedre, Ene agiglnma bogl bakugl i pi nigl mur yomara suna iro pidre, degigl gaglno ede nigl atne edio! Edidre, buglo bagle ere sinaiglmiwe dugwa. 5 Yegl dugo, Saimon ere mogl, Yagl Kade yo, ene dinga ba no kogon i ere mungo, kamun tagugwa buglo bagle swara kaima ta sikrumga ba ene dinga pre pra, no i pi edinamniwe didre, i pi suna edigwa. 6 Suna iro edigwa i, buglo bagle mabuno ta kaimane ede u atne pidre, degigl gagl si argla dinamnedi eriko, 7 ye kabaglema tau bakugl ta mina wan meglkwa i, arie ere wio digwa. Ake ple di noraiglmedi wio digo, wigo, buglo bagle mere i bakugl mina ede meglko, bakugl suo akie kau sidre, ede nigl atne enabugledi eribrika.

8 Ana taragl yegl mere plau dugo, Saimon Pita kandre, kudugl podo gogl, u Jisas gumamugl yage kobragai pai, yegl dugwa, Yagl Kade yo, na tadaglme yoba moliwa. Ene na moglmara magigl ukre, ede eglke po! dugwa. 9 Ye ka yegl dugwa i, i siragl pre ye kabaglema bogl fis mabuno ta sedigwa meglkwa i kandre, kudugl podo geglkwa. 10 Ye kabaglemo meglmara suna i, yagl suo ta Pita bogl akie kogon babun erikwa i, Sebedi wam suo, Jems ya Jon ama moglsre, kudugl giurka. Mudu kudugl geglkwa ba Jisas ere mogl, Saimon Pita di tedre, Kudugl goglkro dugwa. Ene buglo bagle ere si yunere yegl yoba ama ere yu suna edinatniwe dugwa. 11 Yegl dugo, Pita ye kabaglemo bogl baglkugl suo i aware si, yu meda edidre, taraglno mudu kide kodo, Jisas duglo bogl ede eigwa.

12 Ana aglke ta Jisas taun ta suna moglko, yagl ta leprosi ogo nagie mina mudu paugwa ta Jisas kandre, u ye gumamugl yage kobragai padre, kamage yei, yegl dugwa, Yagl Kade yo, ene na ere wakai ere naragledi pitn, ene eratnga kuno erumedi priwe dugwa. 13 Yegl dugo Jisas ye ogo i pi yagl i akidre, yegl dugwa, Kaima na ene ere wakai ere tenagledi priwa. Ene kidenen aragan erabiwe di, yegl dugwa. Yegl dugo, yagl i ogo nagie tabre kaima u wakai ogwa. 14 Yegl eruko, Jisas ye ka gigledi yegl di togwa, Na erika i, ene yoba swara ta di tekro! Ene yoba ta di tekre, tawa teigwa yoba kogon erimara ogon nagn obuno didre, Moses okna dumere mere tawa ta tenatnga. Ten, ye ene kidenen aragan erukwa pamedi kanaiglme dugwa. 15 Yegl dugwa ba ka i wai dugo, yoba mere kide ede Jisas moglmara wigwa. Ye ka dinan, prisre, te kideno ama ere wakai ere norabedi wigwa. 16 Yegl wigwa ba Jisas ege tau mere ye kide kodo ede pi dumo wau yomara pidre, kamage erukwa.

17 Ana Yagl Kade Jisas yobuglo bogl togo, yoba kide sigwa i, ere wakai erabuka kuno erukwa. Kuno eruko, ege swara ta Jisas yugugl moglsre, yoba ka beke te moglko, Farisi yeigo, ya God lomo beke teigwa yoba ama suna i akie ame di mogl, ka dugwa i pre meglkwa. Ye dumo Jerusalem mogl wigo, tau dumo Galili mogl wigo, te dumo Judia koglo koglo i, ama mogl wigo, erukwa. 18 Ka pre meglko, yoba tau ere mogl, yagl ta ogo kagle goglkwa ye gagle ersre, boglo ere yu Jisas moglmara ede yugugl enamnedi wigwa. 19 Wigwa ba ye yugugl enaiglkwa i, yugugl ime yoba mere kide kau si, ogono gagno bolamugl meglko, enaiglkwa kuno erekrukwa. Kuno erekrukwa pre ye pra we di, ede u idaule pidre, idaule taragl tau terke i eglke edidre, yagl i gagle bogl ede atne edigwa. Yoba mere kide meglmara yagl i yage Jisas gumamugl paugwa. 20 Paugo, yagl wagle pre mediglkwa i, Jisas kandre, yagl kagle goglkwa i di te, Kumula, ene tadaglmenen gugl ede teiwe dugwa.

21 Ana Jisas ka yegl dugo, God lomo beke teigwa yoba ya Farisi yoba suna meglkwa i, ye prisre, Yagl i ira moglsre, God agaimo inagledi ka kide yegl dume? God swara yoba tadaglmeno gugl ede tenan, kuno erabiwe di, yegl prikwa. 22 Yegl priko, ye deno muduno mina prikwa i, Jisas kwande kandre, yegl dugwa, Ene siragl pre nomano mina yegl di pre meglme? dugwa. 23 Na siragl ka dibo yuwaglke panabedi prime? Yagl i di tedre, tadaglmenen gugl ede teie dibo, yuwaglke panabo mo yagl i di tedre, adigl, konbauna ede po dibo, yuwaglke panabedi prime? 24 Na ene yoba tadaglmeno gugl ede tekrabedi prikwa ba na Yoba Wam moglka i, yoba tadaglmeno gugl ede tenaglka i, kagna paugwa pre erme taragl ta eribo, kan pogl sinaiglmiwe dugwa. Jisas yegl didre, yagl ta ogo kagle goglkwa i yegl di togwa, Na ene di teiga, ene adigl, kuguglnen akidre, ede kipanara po! dugwa. 25 Yegl dugo, yagl i tabre kaima yoba gumuglno mina adigl, kuguglmo akidre, God kagie kade tedre, tedre, konbauna ede kipamara ogwa. 26 Ede meda ogo, yoba mudu kandre, kudugl podo gogl, God kagie kade tedre, yegl digwa, Nono okna taragl yegl ta kankunere mere erme kamniwe digwa.

27 Ana okuo Jisas konbauna pidre, taks yugwa yagl ta taks imara ame di moglko, kanugwa. Yagl i kagie Livai we digwa. Ana Jisas yagl i kandre, ye di te, Na duglo boglo dugo, 28 Livai adiglsre, taraglmo mudu kide kodo, Jisas omara duglo bogl ede ogwa.

29 Ana okuo Livai ere mogl, Jisas unan, na kana kaya mokna podo nenamnedi kaya mokna podo kaima gagl yogwa. Gagl yogo, taks igwa yoba yeigo, te yoba mere kaima ama eigo, kaya mokna akie ne meglkwa. 30 Ne meglko, Farisi tau yeigo, Farisi yoba God lomo beke teigwa i, i ama u ne meglkwa kandre, ka kane kane di, Jisas duglo beglkwa yagl yegl di prikwa, Siragl pre ene taks igwa yoba ya tadaglme yoba bogl kaya mokna podo akie neime? digwa. 31 Yegl digo, Jisas prisre, di ikne ede yegl dugwa, Yoba kide sikrukwa i, ye dokta moglmara enaiglkwa kuno erekrumiwa. Ba yoba kide sigwa i keme dokta moglmara enaiglkwa kuno erukwa. 32 Kuno yegl mere na yoba du munedi prikwa i, na agle dinagledi ukrika ba na tadaglme yoba agle dibo, ye nomano yake tenaiglmedi pre wie dugwa.

33 Ana okuo yoba tau Jisas moglmara udre, yegl digwa, Jon duglo beglkwa yagl ege mere kaya mokna mawagl ersre, kamage erikwa. Te, Farisi duglo beglkwa yoba ama yegl erikwa ba ene duglo beglkwa yoba kaya mokna nedre, nigl nedre, erimiwe digwa. 34 Yegl digo, Jisas ka ebrie ta ama yegl dugwa, Yagl abu ta bogl ibr, yagl kabaglemo ye bogl akie gun yei moraiglkwa igne i ene ye di tedre, Kaya mokna mawagl erio! dinaiglmo? Ta dikraiglkwa. 35 Ba abu yugwa yagl i auro i ede enaiglkwa igne i, ege i ye kabaglemo kaya mokna mawagl eraiglmiwe dugwa.

36 Ana Jisas ka ebrie ta ama yegl dugwa, Yoba kuguglmo gaglmo goglo ta argla dinan, ye lap kor ta bogl i pi si boglkrabuka. I siragl pre yoba lap kor si argla di kankrikwa te, goglo i bogl u kuno ta pikrabuka. 37 Te, yoba nigl wain kor ta morabuka i, ta i pi toide nigl mige goglo mina atne edekrabuka. Toide atne edenan, nigl wain kor i poia didre, nigl mige goglo i si bla dinabuka. Yegl eran, nigl wain toide ede meda enan, nigl mige i ama ere kide erabuka. 38 Yegl pre nigl wain kor ta morabuka i, yoba i pi toide nigl mige kor mina atne edenaiglkwa paugwa. 39 Te, yoba ta nigl wain kanana yogwa i nedre, wain kor ta nenagledi prikrabuka. I siragl pre ye nigl wain kanana yogwa i, i swara wakai erumedi prabiwe di, Jisas yegl dugwa.