1 Ana igne i Galili yoba tau ede Jerusalem pidre, tawa tenamnedi ere meglko, Pailat ye si gogl, bormaino suru tawa bogl mina edumiwe di Jisas yegl boglo kugl teigwa. 2 Boglo kugl teigo, Jisas yegl dugwa, Ene siragl we di prime? Galili yoba mudu meglmara ye swara tadaglme yoba kaima meglkwa pre Pailat ye si goglmedi primo? 3 Ta manugwa. Ene mudu tadaglme yoba meglkwa pre nomano yake tekribi, ene mudu ama ye geglmere yegl goraiglme dugwa. 4 Te, dumo Siloam yugu olto kuri ta keigwa yage sidre, yoba 18-pela si goglkwa ikra, ye tadaglme podo ersre, Jerusalem yoba tau egre teigwa pre geglmedi primo? 5 Ta manugwa. Ene mudu tadaglme yoba meglkwa pre ene nomano yake tekribi, ene ama geglmere yegl goraiglmiwe di, Jisas yegl dugwa.

6 Ana Jisas ka ebrie ta ama yegl dugwa, Yagl ta ye ede wain ere yaglmara ede fik ta ama akie yaglkwa. Ye ege mere fik mogomo dokinagledi ugwa ba ye mogomo ta kogl paugwa kankrukwa. 7 Yegl pre ye ede wain sugl moglkwa yagl di tedre, Na bugla yugu suota ede omara i, ege swara ta koglkwa kankrika pre ede i wei edo! Ede i makan nuglo yoko ne moglmiwe dugwa. 8 Yegl dugo, ede wain sugl moglkwa yagl i ere mogl, yegl di togwa, Ene we, erme bugla yugu swara ta ama kanige eratne dugwa. Na duglane mina makan si teruwa yedre, kau de make edibo, kanatniwa. 9 Bugla yugu ta moglsre, kan, ta koran, wakai. Ba ta manan, wei atne edinatniwe di, yegl dume di, Jisas yegl dugwa.

10 Ana wakan kade ege ta yogo, Jisas ka mabuno yugu yugugl moglsre, yoba God kamo beke te moglkwa. 11 Te, yugugl i, abu ta bugla yugu 18-pela mere murubuglo kide ta ye moglmara moglsre, abu i kide sinabedi eruko, ye moko buko dugo, adigl diglki di morabuka mere manugwa. 12 Ana Jisas abu i kandre, ede wo dugo, ugo, Jisas ye di te, yegl dugwa, Abu yo, ene kidenen bu yomiwe dugwa. 13 Yegl didre, abu i akugo, ye kidemo tabre kaima bu yogo, adigl, diglki di mogl, ye God debie si, kagie kade togwa.

14 Ba yagl ta ka mabuno yugu sugl moglkwa i, Jisas ye wakan kade ege taragl yegl eruko, kandre, dem kubrisre, yoba yegl di togwa, 6-pela de mina kogon eraiglkwa paugwa pre ene kideno bu yenabedi pribi, 6-pela de yomara suna i ye moglmara unaiglkwa ba wakan kade ege yogwa i, ene ukrio! dugwa. 15 Yegl dugo, Yagl Kade Jisas di ikne ede, yegl dugwa, Ene ka didre, mabuno erikwa i, u swara pikrukwa yoba meglkwa. Wakan kade ege ene ama kogon erikwa yoba meglkwa. Ene kau ya donki kiglkwa i, kane poko ede, nigl nenaiglmedi auro i ede eimo mo pikrime? 16 Abu i Abraham gawamo ta moglkwa ba ye bugla yugu 18-pela Satan si kane sugwa. Sumara i, na wakan kade ege ye kanemo pokenaglka i, ene mane di primo? dugwa. 17 Jisas yegl dugo, ye kudamo ikne meglkwa i, agai podo geglkwa. Agai geglko, yoba mudu ye Jisas taragl wakai wakai erukwa i kandre, gun yeigwa.

18 Ana Jisas ka swara ta yegl dugwa, God yoba kingno mogl, suglno morabuka i, siragl mere panabe dinamne? Mo, Ka ebrie siragl mere di boramne? dugwa. 19 I, ede mastet mogo kebra kaima yomere yegl ta pame dinaglka. Yagl ta mastet mogo ta i pi kaya mokna ere yaglmara suna yaglko, mastet pare ede mitna pidre, ede mere yegl paugo, kua tau mere u yogagle mina yugo bagl paimiwe dugwa.

20 Jisas ka ebrie ta ama yegl dugwa, God yoba kingno mogl, suglno morabuka i, siragl mere panabe dinagle? 21 Dinaglka i, yis mere yegl pame dinaglka. Abu ta flaua mere yomara i, yis kunabe kaima ta i atne edugwa i, flaua mudu ake poia di, ede u podo ome dugwa.

22 Ana Jisas ede Jerusalem enagledi konbauna omara i, dumo kebra ya taun kade bage yeimara i, yoba God kamo beke tedre, ede ogwa. 23 Ana ka beke te omara i, yagl swara ta ye di pre, yegl dugwa, Yagl Kade yo, God yoba ere inabuka i, mere ere inabo mo suom keme ere inabe? dugwa. Yegl dugo, Jisas yoba magigl meglkwa i, yegl di togwa, 24 Ene yobuglo ere, yugu dua kebra yomara i, ede suna enamnedi eraiglkwa paugwa. I siragl pre na ene kaima di teiga, yoba mere konbauna ta mina ede yugugl enamnedi eraiglkwa ba i kuno ta erekrabuka. 25 Te, yugu nem adigl ede u dua lok sinan, ene meda adigl mogl, yugu dua sidre, Yagl Kade yo, ene dua yauro noro! dinaiglkwa ba ye ene yegl di tenabuka, Ene aglo mere mogl wigwa i, na ta kankrie dinabuka. 26 Yegl dinan, ene di ikne edidre, Nono nigl ya kaya mokna akie nomgo, no dumono suna i, moglsre, ka beke notngrawa dinaiglkwa. 27 Yegl dibi, ye ene yegl di tenabuka, Ene aglonde yoba meglkwa i, na ta kankrika. Ene mabuno kide erikwa yoba meglkwa i, na moglmara kide kodo, ede pio dinabuka. 28 Dinan, God yoba kingno morabara suna pi dinaiglmedi ene si meda edibi, Abraham ya Aisak ya Jekop ya God kamo kep yoba mudu suna meglbi, ene kandre, kai podo ere, signo gikr eraiglkwa. 29 Ene meda meglbi, yoba mere kide uglo kogl koglo mogl u God yoba kingno morabara suna i, kaya mokna nenamnedi ame dinaiglkwa. 30 Te, ene prio. Yoba ta okuo kaima meglkwa i, ede okna enaiglkwa. Te, yoba erme ede okna eigwa i, okuo kaima unaiglmiwe di, Jisas yegl dugwa.

31 Ana igne i Farisi yoba udre, Jisas yegl di teigwa, Ene dumo magigl i kide kodo, ede po! Herot ene si gorarimiwe digwa. 32 Yegl digo, Jisas ye di ikne ede te, yegl dugwa, Ene ede pi agl are Herot i, yegl di teo. Na erme ya tagna murubuglo kide di meda edidre, yoba kideno ere wakai ersre, batna na kogona ere kodinaglka pamiwe di teo. 33 Dinaiglkwa ba na erme ya tagna ya barma pra, kaima ede Jerusalem u pai moraglka. I siragl pre God kamo kep yoba mudu dumo Jerusalem si goraiglkwa paugwa. Dumo pere ta si geglbi, kuno ta erekrabiwe di, Jisas yegl dugwa.

34 Jisas yegl didre, ama yegl dugwa, Aiya, ene Jerusalem yoba meglkwa i prio, God kamo kep yoba God ene meglmara dedugwa i, ene si goglsre, tau kobuglo mina si geglmiwa. Te, na ege mere kaima ene suglno moragledi prisre, koduagle mam ye nagiglema kugl bogl tedre, suglno wakai moglmere mere eragledi erika ba ene mane di narikwa. 35 Prio, ene erme dumono wau yenabuka. Te, na ta kankre ebi, ege ta plau dinan, ene God di tedre, Yoba ta Yagl Kade dedugo, ugwa i, God ye ere wakai ere tenabiwe!* dinaiglkwa ege i mina aglke kor dagl na kanaiglmiwe di, Jisas yegl dugwa.