1 Ana okna ibo God ye ege mere nono kowano awano ka di togwa igne, ye kamo kep yoba meglkwa i, nomane togo, ye kamo i pi kowano awanoma di teigwa. Te, God ye ka kep yoba nomane togwa i, konbauna kane kane mina nomane togwa. 2 God okna yegl erukwa ba erme taragl mudu dudunabuka magigl erukwa igne, ye Wam mina ka di norukwa. God taragl kane kane ere yogwa i, ye Wam mina ere yedre, te ye Wam i, taragl mudu kaima idre, bitno morabedi kere i pere ede kodugwa.

3 Ana God Wam moglkwa i, God abuglagemo podo sumere yegl ye abuglagemo podo sugwa te, God siragl mere moglkwa i, ye kuno ere i nogugl ede norukwa. Te, God Wam kamo yobuglomo podo paugwa pre ye ka dumara i mina taragl pra pra suglno moglkwa. Ama nono deno muduno tadaglme paikran, pe sinabedi konbauna yauro noro, okuo ye ede heven ibo pidre, God mogl mitna kaima edugwa i, ogo wo kra ame di moglkwa.

4 Ana God ye Wam kagie podo kide togwa pre ye kagie pai mitna edugo, angelo mudu kagno pai atne edugo, erukwa. Yegl pre God Wam swara i, mogl mitna kaima edidre, angelo mudu egre togwa. 5 God okna ye Wam di tedre, yegl dugwa,

Ene na Wana motngo,

Na erme ene Nen moluwe*

dugwa. Te, God ka ta ama yegl dugwa,

Na ye Nem moglbo, ye na Wana morabiwe*

dugwa. Ye Wam pre ka yegl dugwa ba ye ege swara ta angelo pre ka ta yegl di tekrukwa. 6 Te, God ye Wam komono auro yu makandigle edenabuka ege i pre ka yegl dugwa,

God angeloma mudu ye kagie kade tenaiglkwa pamiwe*

dugwa.

7 Ana angelo pre God kamo bage ta yegl dugwa,

Ye angeloma ede u ir mere yegl enaiglmedi eruko, ye ede u ir mere yegl eigwa.

Te, angelo ye niglmo kogonmo ere teigwa i, ede u doga bauglo mere yegl enaiglmedi eruko, ede u doga bauglo mere yegl eimiwe*

dugwa.

8 God ye angeloma pre ka yegl di togwa ba ye Wam pre yegl dugwa,

Ene God motnga i, ene sia king mina aimadi kamin moratnga.

Ene mabuno du keme ersre, yobanen suglno motnga.

9 Ene mabuno du, wakai kandre, mabuno kide yogwa i, kide kanga.

Yegl pre God, ene Godnen moglkwa i, kugo nuglo toide bitn mina edidre,

Ene gun podo yenatnedi erukwa.

Ene kunanma i, ama gun yeigwa,

Ba ene swara gun podo kaima yeniwe*

dugwa.

10 Ana God ye Wam pre ka ta ama yegl dugwa,

Yagl Kade yo, ene okna ibo dumo makan beke yenga.

Te, kamun mitna ibo paugwa i, ene ere yenga yagle motnga.

11 Kugugl gagl ta bugl kide erumere mere yegl,

Kamun mitna ya dumo makan mudu u kide pidre, dudinaiglkwa

Ba ene mogl pai moratnga.

12 Yoba kugugl ake perimere yegl,

Ene kamun mitna ya dumo makan ake pere si dudinatnga.

Te, yoba kugugl gagl goglo yogwa i gugl edidre, kor edimere yegl,

Ene kamun mitna ya dumo makan kor ere yenatnga.

Ba ene motnere yegl mogl pai moglsre, aimadi kamin moratniwe*

dugwa.

13 God ye Wam pre ka tau yegl didre, ama yegl dugwa,

Ene na ogona wo kra ame di moglo,

Na ene kudanen ikne yobuglo ere tedre, kagln mina atne edinaluwe*

dugwa. God ye Wam pre yegl dugwa ba angelo meglkwa i, ege swara ka yegl ta di tekrukwa. 14 Angelo mudu meglkwa i, ye murubuglo mogl, God kogonmo ersre, ye yobama ake ple di te meglkwa. God yoba ta okuo taragl wakai inaiglmedi ere yugwa yobamo i, angelo ake ple di teigwa.