1 Agrama abarama wagle, ene God yobama meglkwa i, God heven ibo moglsre, taragl tau akie inaiglmedi ene agle dugwa pre Jisas siragl mere moglkwa i, pre gi di molo. Jisas ugwa i, God Dedugwa yoba ta moglsre, ye tawa teigwa yoba bitno mere yegl ta moglkwa. Te, nono akie Jisas pre meduniwe dumga. 2 Ana God ye Jisas kogon yegl erabedi dedugo, dedumere ere kodugwa. Jisas yegl erukwa i, ye Moses okna ibo erumere kuno erukwa. Moses Israel yoba meglmara suna kogon erukwa i, Israel yoba God yugumo mere yegl meglko, Moses ye meglmara suna kogon tomere ere kodugwa.

3 Ana Moses ye God kogonmo wakai erukwa ba God ye Jisas kagie kade togwa i, podo pai, Moses kagie egre i atne edugwa. Kuno yegl mere yoba ta yugu wakai kenan, yoba yugu i kandre, yugu kagie kade ta tekraiglkwa ba yugu keigwa yobamo i, kagie kade tenaiglkwa. 4 Te, yugu ta yene plau dikrabuka ba yoba ta yugu kenan, yenabuka. Kuno yegl mere taragl kane kane paigwa i, God ere yogwa keme paigwa.

5 Ana God yugumo suna, Moses ye God niglmo kogonmo yoba moglsre, ye kogonmo wakai erukwa.* Moses God yugumo suna nigl kogonmo erukwa i, siragl okuo ka kaima di pogl norabere mere ere wakai ere, i nogugl edugwa. 6 Ana Moses yegl erukwa ba Krais yugugl i nigl kogon yoba mere moglkrukwa. Ye God Wam moglsre, ye swara mogl mitna ede, yugu i sugl moglkwa. Te, nono God ye dumere kaima ere norabedi pre moglsre, okuo gun yenamga i pre kaima panabedi prumun, nono ama God yugumo mere yegl moramga.

7 Ana nono ama God yugumo mere yegl munga pre Mudu Murubuglo ka yegl di norukwa,

Erme, ene na ka diga i ta pribi,

8 Ene nomano gigle dinabedi erekrio.

Ene kowano awano dumo wau yomara meglkwa igne,

Ye na kana sedidre, God no ere sinabo mo di,

Ye eran, kanamnedi erimere yegl, ene yegl ta erekrio.

9 Te, ene kowano awano i, ye bugla yugu 40-pela na yobuglna kan meglkwa

Ba ye nomano gigle dugo, ye na sinaglka mere erikwa.

10 Yegl pre na yugobuno i, dena kubro tedre, yegl diga,

Yoba i, ye na konbaunana kan pogl sikre,

Deno muduno mina ege ege ede eglke eimiwe diga.

11 Yegl pre na dena kubrimara i, ka gigledi yegl di padiglka,

Na yoba i auro i ede suna ebo, ye wakan moraiglme diga ikra,

Ka kaima ta plau dikrabiwe*

di, God ye kamo mina yegl dugwa.

12 Ana agrama abarama wagle, ene kan kun erio. Ene meglmara suna i, yoba swara ta nomane kide idre, God kor meglkwa mabuno moglkwa i pre medigl moglkre, moko tenan, i kide panabuka. 13 Ene kan kun ersre, ege ege deno muduno ikne ikne si gigle di tenaiglkwa paugwa. Ene yegl ta erekribi, tadaglme mabuno ene bakagl tedre, ene nomano si gigle di te dinabuka pre diga.

14 Na diga i, nono God kamo mabuno bogl pre medunga igne, ka i ka kaima pamedi prumga. Okna ka i kaima pamedi prumnere mere yegl pre gi di mogl pi goramga paugwa. Pre gi di mogl gun, Krais taragl wakai wakai inabuka i, nono ama inamga. 15 Ka mem yegl paugwa pre God kamo okna ibo yegl dugwa,

Erme, ene na ka diga i ta pribi,

Ene nomano gigle dinabedi erekrio.

Ene kowano awano na kana sedemere yegl, sedekrio*

dugwa.

16 Ana, aglode yoba okna ibo God kamo prisre, sedime? Moses ye yoba dumo Isip kane pai dinaiglmedi agre i ede meda ugwa yobamo i, mudu God kamo prisre, sedigwa. 17 Te, God yoba tau bugla yugu 40-pela mere dem kubro togwa i, aglode yoba tome? Tadaglme erikwa yobamo i, mudu dem kubro togwa. Yoba i, dumo wau yomara wan mogl, geglkwa. 18 Te, God ka gigledi di te padigl, yoba tau ede dumo Kenan suna pikre, wakan moglkraiglme dugwa i, ama aglode yoba pre dume? Ye kamo sedigwa yoba i pre dugwa. 19 Yegl pre nono kowano awano ikra, ye God kamo pre mediglkrikwa pre ye ede dumo Kenan suna enaiglkwa i, kuno ta erekruko, prumga.