1 Kay manga inulug, kaliman ku na ka-ede-an mayu ya nyangka-imoꞌ sa manga tyugbulan nami na manga Judiyu. Alag silan pig-alladan na Tyumanem aw pigtamengan dun ni kanilan pagpanaw magi sa labun na nyalibunbun na migma-una kanilan, aw pigtabangan nan ya kadég nilan dun ni pagtalipag nilan sa Dagat na Mapula. 2 Aw magi sa labun na mig-allad kanilan, aw magi uman sa dagat na pigtalipag nilan, liwan na kyaba͡utismuwan da ya kadég nilan, aw dun da ka-ede-i na tengteng silan dyumalug kan Moysis. 3 Ya kadég nilan alag kyuman sa kakan na lekat adti Tyumanem, 4 aw alag silan uman nyinem sa tubig na lekat adti batu na gayed mig-agad-agad kanilan magi sa katulus na Tyumanem, aw ya Batu yeiy, yan saba si Kristu. 5 Pangkay pigtabangan silan na Tyumanem, manang madég kanilan ya gayed mig-imoꞌ sa malatay na diliꞌ makatutuk kanan. Aw asuntu seiy, nyangkamatay silan aw nyangkabélét ya lawas nilan dun ni kaligbinan.*

6 Na, ya kadég na nya-imoꞌ kanilan asini muna, alag yeiy pigpa-edeꞌ na Tyumanem kanaten pada diliꞌ kitadun magsiling kanilan na magkalim mag-imoꞌ sa malatay. 7 Diliꞌ mayu pagdalugun ya pig-imoꞌ na eped kanilan na migsimba sa inutaw. Kay awun pigpasulat na Tyumanem asini muna: "Nyingkud ya manga utaw aw kyuman silan, aw migpan-ineman, aw nyan-indeg na un silan sumayaw."* 8 Ka-ilangan na diliꞌ kitadun magkasala-enen kasiling na pig-imoꞌ na manga eped kanilan. Kay asuntu sa manga pigpan-imoꞌ nilan, pigpa-emel-emel silan na Tyumanem, aw manga kaluwa͡an tag tulu kamalalan (23,000) ya nyangkamatay seled oloꞌ na sangallaw.* 9 Diliꞌ tadun pagtanda-en si Kristu. Yeiy ya pig-imoꞌ na eped na manga tyugbulan tadun, yanagaw pigpamangaꞌ silan na ulud aw nyangkamatay silan.* 10 Aw diliꞌ kitadun uman magdiklamu kasiling na manga eped kanilan. Yeiy ya du-an nan na pigsuguꞌ ya Anghil na pamatayen ya eped kanilan.*

11 Ya kadég na kyagamakan nilan, nya-imoꞌ yeiy pundinganan kanaten, aw pigpasulat asini muna pada magpa-edeꞌ kanaten na diliꞌ kitadun mag-imoꞌ sa maynan. Kay malapit da dumateng ya katigkasan.

12 Yanagaw kun awun utaw na maglong, "To-o la masalig ya kanak pagpangintu-u," magpakatadeng sakanan pagaw magagad baling dun ni pag-imoꞌ sa salaꞌ. 13 Ya kadég na pagtandaꞌ na kya-agiyan mayu, kya-agiyan uman na eped na manga utaw. Manang tumanen saba na Tyumanem ya manga pigpakang nan kay kasaligan sakanan. Yanagaw diliꞌ nan tumbay ya manga pagtandaꞌ na diliꞌ mayu mabatug ti-isen. Manang kun dumateng kamayu ya pagtandaꞌ, atagan kamu nan na pa-agi na degen mayu pada makapadeleg kamu dun ni kamayu pagpangintu-u.

14 Yanagaw, kamu na kanak pigginawa͡an, pagpakawat kamu lekat adti pagsimba sa manga tyumanem na galuꞌ. 15 Piglong ku yeiy adti kamayu kay mabatug saba mayu kalabetan. Yanagaw kamu la ya pag-anenganeng sa piglong ku kamayu. 16 Adti pagkatipun tadun na un mag-anenganeng sa pagkamatay ni Kristu, sa pag-inem tadun dun ni tabuꞌ na pigpasalamatan da adti Tyumanem, kya-untungan kitadun sa manga kadyawan na duguꞌ ni Kristu. Aw sa pagkan tadun sa pan na pigtenga-tengaꞌ, yan ya pangilala na nyaka-akup da kitadun sa kasakupan ni Kristu na yan ya kanan lawas. 17 Pangkay madég kitadun dun ni kasakupan ni Kristu, manang ya kadég tadun sambuk da na lawas, kay kyuman kitadun sa sambuk na pan.

18 Anenganenga mayu ya katanem na manga utaw na Isra-él: Dun ni pagkan nilan sa abus da dugsu-an adti Tyumanem, nyaka-akup da silan sa pagsimba kanan. 19 Pagaw musip kamu, "Unu, awun kaꞌ ma-untung dun ni manga tyumanem na galuꞌ aw adti pagdugsuꞌ kanilan?" 20 Walaꞌ saba! Manang kaliman ku kalabetan mayu na kun dugsu-an na utaw na Héntil ya tyumanem nilan na galuꞌ, yan ya pigdugsu-an nilan ya manga busaw aw bekeꞌ na tengteng Tyumanem! Aw diliꞌ aku malim na sumambuk kamu sa manga busaw. 21 Diliꞌ mayu mabatug pagdenganen ineman ya tabuꞌ na Matas na Pangulu tadun aw ya tabuꞌ na manga busaw. Aw diliꞌ mayu uman mabatug pagdenganen ya pagkan adti kakananan na Matas na Pangulu tadun aw ya kakananan na manga busaw. 22 Na, unu kaꞌ, kaliman mayu pakadawayen ya Matas na Pangulu tadun? Kya-ede-an tadun na to-o matulus ya Tyumanem aw diliꞌ tadun saba mabatug ya pagdeg kanan.

23 Na, miglong kamu, "Pigpabayaꞌ kanak ya pag-imoꞌ sa pangkay unu!" Aw tyumubag aku kamayu na matinaw yan, manang diliꞌ ya kadég makakadyaw kanaten aw makapasalig sa kanaten pagpangintu-u. 24 Diliꞌ mayu pag-olo-un ya kamayu pagka-utawun manang anenganenga mayu uman ya makakadyaw sa eped na manga utaw.

25 Yanagaw pigpabayaꞌ kamayu na mayad sa pangkay unu ya unud na pigbaligyaꞌ dun ni palingki, aw diliꞌ da kamu mag-usipenen kun ayin yan lekat pada diliꞌ kamu magduwaduwa kun kanen mayu aw ya diliꞌ. 26 Kay pigpasulat na Tyumanem asini muna, law nan,"Tyumanem saba ya tagtun sa kadakulaꞌ na banwa aw sa kadég na asini tas na lupaꞌ."*

27 Aw kun awun utaw na walaꞌ pangintu-u kan Kristu na migpilit kamayu na kuman adti tampid nan, aw kun kaliman mayu madtu, kana la mayu ya pangkay unu ya pakan nan kamayu, aw diliꞌ da kamu mag-usipenen kun pigdugsuꞌ yeiy adti manga tyumanem na galuꞌ aw ya walaꞌ, pada diliꞌ malinggal ya kamayu anenganeng. 28 Manang pagaw awun utaw na maglong kamayu, "Nyadugsuꞌ da yeiy." Na, kun maynan ya piglong nan, diliꞌ kamu san magkan, asuntu na pigpa-edeꞌ kaw nan, 29 pada diliꞌ malinggal ya anenganeng nan. Manang pagaw musip kamu kanak, "Anangaꞌ ku tagenan ya pagkaliman ku asuntu oloꞌ sa anenganeng na eped? 30 Aw anangaꞌ pa aku pasala-en sa pigkan ku kun abus da ku pasalamati adti Tyumanem?"

31 Yanagaw ini ya tubag ku kamayu: Pangkay kuman kamu aw minem, aw pangkay unu ya imo-un mayu, imo-a na madeyen ya Tyumanem. 32 Diliꞌ mayu pag-imo-un ya pangkay unu na makapasungkul sa manga Judiyu aw manga Héntil na diliꞌ da silan malim mangintu-u, aw maynan uman sa manga eped mayu na mangintu-uway kan Kristu. 33 Daluga mayu ya kanaken pig-imoꞌ: Walaꞌ ku olo-a ya kanaken pagka-utawun manang pigtibagsegan ku na ka-untungan ya kadég na utaw pada mabatug silan paluwa-en na Tyumanem.