1 Endaꞌ, aku ya sambuk na apostol aw walaꞌ ya makabayaꞌ kanak sa umbaꞌ ku imo-un. Kyinitaꞌ ku saba ya kanaten Matas na Pangulu na si Jisus, aw ya pagpangintu-u mayu kanan bunga saba na imo-unun na pigtaligu nan kanak. 2 Awun manga eped na mig-anenganeng na diliꞌ aku apostol, manang kamu saba ya puliba na aku apostol. Kay magi kanak nyangintu-u la kamu sa kanaten Matas na Pangulu. 3 Yanagaw, ini ya kanak tubag adti pangkay singalan ya musip sa katundanan na pagka-apostol ku: 4 Ya kadég nami na manga apostol, umbaꞌ saba kami dumawat sa makan aw ma-inem lekat adti manga utaw na dyumawat sa palna-u nami. 5 Aw sa pagpanaw nami, pigtumbay sa kanami eped na magpa-agad sa kanilan ka͡ubayan, kasiling na pig-imoꞌ ni Pédro aw manga eped na apostolés, aw manga inulug ni Jisu-Kristu. 6 Anangaꞌ kaꞌ na kami oloꞌ si Bérnabi ya ka-ilangan magtalabahu pada awun pagkamangan nami? 7 Awun pa manga usip ku: Singalan kaꞌ sundaluwa ya magtandan sa kanan pagka-utawun? Walaꞌ saba. Aw singalan utawa ya migtanem adti parasan na diliꞌ kuman sa bunga na pigtanem nan? Walaꞌ saba! Aw singalan ya mig-ipat sa karniro aw kambing na diliꞌ uman bagi-an na gatas? Walaꞌ uman.

8 Ya piglong ku yeiy, walaꞌ oloꞌ lekat adti anenganeng na manga utaw manang lekat saba adti Uldin. 9 Kay pigpasulat na Tyumanem adti Uldin na pig-atag nan magi kan Moysis, law nan "Kun, patagunaꞌ mayu sa baka ya pig-ani, ya-i mayu pagpungusa ya bakaꞌ nan."* Na, unu kaꞌ, baka oloꞌ ya pigkaypengan na Tyumanem? Bekeꞌ nan saba. 10 Kay dala kitadun uman piglongan na Tyumanem seiy. Ya utaw na nyapagud migdaru aw mig-ani, pig-iman nan na ka-atagan sa kyapagudan nan. 11 Dun ni pag-ubat-ubat nami kamayu sa tingeg na Tyumanem, kasiling na nyananem kami sa biniꞌ dun ni kamayu anenganeng. Yanagaw, unu, mabegat kamayu ya pag-atag sa kapelekan nami? 12 Kun ya eped na manga magpalna-uway umbaꞌ silan atagan sa kapelekan nilan, na, to-o pa dun na umbaꞌ galu kami atagan. Manang walaꞌ kami salig sa un mayu atag kanami. Pigti-isan nami ya kadég pada diliꞌ kabalabagan ya pagpa-edeꞌ nami sa Madyaw na Ubat-ubat kan Kristu.Ya pagtagunaꞌ na baka sa pig-ani

13 Unu, walaꞌ mayu ka-ede-i na ya manga utaw na migtalabahu adti Témplo na manga Judiyu, pigtumbay kanilan ya pagkamang sa pagkan nilan dun ni seled na Témplo? Aw ya manga magdadugsu-ay umbaꞌ uman silan makakamang, yanagaw kyumamang silan dun ni pigdugsuꞌ.* 14 Aw maynan uman, migsuguꞌ ya kanaten Matas na Pangulu na si Jisu-Kristu na umbaꞌ atagan sa manga kapelekan ya migpa-edeꞌ sa Madyaw na Ubat-ubat.

15 Manang yan ya kanak pagbayaꞌ na diliꞌ aku magsalig na atagan aku mayu sa kanaken manga kapelekan. Aw asini pigsulat ku, walaꞌ aku uman pagsekat kamayu. Palabiyen ku ya matay kay sa makamang ya pagpalibantug ku na walaꞌ aku pagpabayad sa pagpa-edeꞌ ku sa tingeg na Tyumanem. 16 Kay kun pa-edeꞌ ku adti manga utaw ya Madyaw na Ubat-ubat kan Kristu, walaꞌ ya indeganan ku magpalibantug, yeiy saba ya ka-ilangan ku pa-edeꞌ adti manga utaw. Manang kun diliꞌ ku pa-edeꞌ ya Madyaw na Ubat-ubat, malatay ya un ku datengan. 17 Kun aku pa ya migbayaꞌ sa imo-unun ku yeiy, magtagad aku galu sa tandan. Manang ya tengteng matinaw, pig-imoꞌ ku ya imo-unun na Tyumanem kay yeiy saba ya pigtaligu nan kanak. 18 Yanagaw unu kaꞌ ya tandan kanak? Yan ya kanak pagleya͡an na palangad tandan, ya pagpa-edeꞌ sa Madyaw na Ubat-ubat pangkay walaꞌ ya imanen ku na tandan.

19 Pangkay walaꞌ ya mig-allang kanak, manang nya-imoꞌ aku kasiling na allang adti kadég pada madég pa ya madala ku adti kan Kristu. 20 Adti kadégan ku na manga Judiyu, pigdalug ku ya manga katanem na manga Judiyu pada madala ku silan adti kan Kristu. Walaꞌ aku pagpa-allang sa kadég na manga suguꞌ na pig-imoꞌ na manga eped ku na Judiyu, manang kenneꞌ ku pigdalug ya Uldin na pig-atag na Tyumanem. Pig-imoꞌ ku yeiy pada mangintu-u pa ya manga kadégan ku na Judiyu. 21 Maynan uman, kun adtu aku ni manga Héntil na walaꞌ atagi na Tyumanem na Uldin, ya bet ku kasiling uman na Héntil. Bekeꞌ na palabet ku na pigkele͡an ku ya Uldin na Tyumanem, kay pigdalug ku saba ya manga suguꞌ ni Kristu. 22 Aw kun adtu aku ni tampid na manga madalem na utaw, migpadalem aku uman pada madala ku silan adti kan Kristu. Yanagaw, pangkay ayin aku pag-eyaꞌ, pigsilingan ku ya pagpakabetang nilan pada madala ku silan adti kan Kristu. 23 Pig-imoꞌ ku ya kadég yeiy kay kaliman ku makasambuk sa manga kadyawan eped na manga dyumawat sa Madyaw na Ubat-ubat.

24 Na, dun ni pagdalug tadun sa Tyumanem, kasiling kitadun na mig-abay nyalaguy. Dun ni pag-abay madég ya utaw na nyalaguy, manang sambuk da oloꞌ ya makadawat sa tandan. Yanagaw dun ni kanaten pag-abay, tibagsegi mayu ya pagpalaguy pada makamang mayu ya tandan. 25 Ya tagsambuksambuk na utaw na mag-abay, matadeng sakanan magtagen sa pagka-utawun nan aw pagpakabagsegen nan ya kanan lawas pada makamang nan ya tandan. Pigtibagsegan nilan yeiy pangkay maksay magkalat ya palangad tandan.* Aw kitadun na manga mangintu-uway, tibagsegan tadun uman ya pagdalug sa Tyumanem, pada madawat tadun ya tandan na diliꞌ magkalat. 26 Sa pagdalug ku uman kan Kristu, kasiling aku na mig-abay nyalaguy na walaꞌ ya lingi-lingiꞌ pasinan adti sangku-anan. Aw kasiling aku uman na utaw na migbaksing, diliꞌ aku sumumbag na diliꞌ aku kumeleg. 27 Yanagaw pigtagilan da ku ya kanak lawas adti pangkay unu, kay pagaw matigkas da ku ya pag-ubat-ubat adti madég na utaw, aku baling ya diliꞌ makadawat sa tandan na lekat adti Tyumanem.