1 Na, kay manga inulug, kaliman ku na pa-anenganeng kamayu ya Madyaw na Ubat-ubat kan Kristu na pigpa-edeꞌ ku kamayu idtu na muna. Pigdawat mayu yeiy, aw yan ya masalig na tullukanan sa pagpangintu-u mayu taman adun. 2 Kun padelegen mayu ya pagdalug sa Madyaw na Ubat-ubat yeiy, paluwa-en kamu na Tyumanem. Manang kun diliꞌ mayu padelegen ya pagdalug, masapad baling ya pagpangintu-u mayu. 3 Kay pigpalna-u ku kamayu ya nyadawat ku idtu muna aw ini ya kaliman ku na to-o mayu ka-ede-an: Nyatay si Kristu asuntu sa manga salaꞌ tadun kasiling na pigpasulat dadan na Tyumanem asini muna. 4 Piglebeng sakanan manang pagkatlu na allaw nyataw da kasiling na pigpasulat na Tyumanem sa un ma-imoꞌ kanan.* 5 Aw migpakitaꞌ sakanan kan Pédro, aw tigkas yan, adti eped na manga apostolés. 6 Pagkatigkas yan, migpakitaꞌ da uman adti sobla limanggatus (500) ya mangintu-uway na migkatipun. Ya eped kanilan nyangkamatay da, manang madég pa uman kanilan ya utaw pa taman adun. 7 Migpakitaꞌ sakanan uman adti kan Santiago, aw tigkas yan adti kadég na manga apostolés. 8 Aw aku ya moli na pigpakita-an nan, aw kasiling aku na iseꞌ na nyaleges nya͡utaw. 9 Aku ya madalem sa kadég na manga apostolés. Aw asuntu na to-o ku pigpamulayaman ya manga mangintu-uway kan Kristu idtu muna, diliꞌ aku galu umbaꞌ ngalanan na apostol. 10 Manang asuntu sa grasya na Tyumanem, nya-imoꞌ aku na maynini, aw walaꞌ kasapad ya grasya nan kanak. Pangkay aku ya to-o nyapagud kay sa manga eped na apostolés, manang bekeꞌ na kanak kabagseg. Nya-imoꞌ ya kadég yeiy asuntu saba sa grasya na Tyumanem kanak. 11 Yanagaw, pangkay aku aw manga eped na apostolés ya migpalna-u sa Madyaw na Ubat-ubat, asal nan mig-unawa ya pig-ubat-ubat nami aw nyangintu-u kamu.

12 Na, kun migpalna-u kami na nyataw da si Kristu lekat adti pagkamatay, anangaꞌ awun eped dun ni kamayu na maglong na walaꞌ ya pagkataw na nyangkamatay? 13 Kun walaꞌ ya pagkataw na manga nyangkamatay, walaꞌ galu uman matawa si Kristu. 14 Aw kun walaꞌ matawa si Kristu, syapadan ya kanami pagud migpa-edeꞌ sa Madyaw na Ubat-ubat, aw syapadan uman ya kamayu pagpangintu-u. 15 Aw katinawan kami baling na galuꞌ ya pigmatinaw nami na pigmataw na Tyumanem si Kristu lekat adti nyangkamatay. 16 Kay kun walaꞌ ya pagkataw na manga utaw na nyangkamatay, na, walaꞌ galu matawa si Kristu. 17 Aw kun walaꞌ si Kristu matawa, syapadan ya kamayu pagpangintu-u aw walaꞌ galu lanasa ya manga salaꞌ mayu. 18 Aw bekeꞌ oloꞌ na maynan, ya manga nyangkamatay na nyangintu-u kan Kristu, walaꞌ galu uman ya imanen nilan kay kenneꞌ pa nilan kya-eletan adti Tyumanem na walaꞌ ya tyamanan. 19 Kun ya pag-iman tadun kan Kristu taman oloꞌ na kanaten pag-eyaꞌ asini tas na lupaꞌ, kitadun ya to-o makalalat.

20 Manang ya tengteng na matinaw: Pigmataw si Kristu lekat adti pagkamatay, aw yeiy ya migmatinaw na matawun saba ya manga nyangkamatay, aw si Kristu, yan ya nyuna nyataw sa kadég. 21 Kay ya salaꞌ na sambuk na utaw na si Adan asini muna, yan ya du-an na dyatengan ya kadég na utaw na pagkamatay. Manang magi uman sa sambuk na utaw na si Kristu, un matawun ya manga nyangkamatay. 22 Ya du-an na matay kitadun kay asuntu na alag kitadun buwadbuwad ni Adan. Manang ya kadég na nyakasambuk da kan Kristu alag silan matawun. 23 Aw maynini ya pagmataw: Si Kristu, yan ya nyuna nyataw. Aw sa paglikuꞌ nan kagaya asini tas na lupaꞌ, panmatawun ya kadég na utaw na nyangintu-u kanan. 24 Pagkatigkas yan, dumateng ya kamoliyan, aw patenengen ni Kristu ya katundanan na kadég na manga migdumala adti dalem na langit aw asini tas na lupaꞌ na nyagagad na manga busaw. Aw tigkas yan, atag nan ya Kasakupan nan adti kanan Ama na yan ya Tyumanem. 25 Kay maynan ya pigpalpa dadan na Tyumanem na ka-ilangan si Kristu ya maghariꞌ mendaꞌ na mabus nan degen ya kadég na kanan manga po-on aw alag nan silan betang adti salad na siki nan.* 26 Aw ya to-o kamoliyan na po-on na un nan degen, yan ya pagkamatay. 27 Kay ini ya pigpasulat asini muna, "Pigbetang na Tyumanem ya kadég yeiy adti salad na siki nan." Manang ya Tyumanem oloꞌ ya walaꞌ paka-akup adti kadég na pigdumala͡an ni Kristu. Kay ya Tyumanem, yan saba ya migtumbay kan Kristu na un maghariꞌ sa kadég. 28 Aw pagkatigkas na Tyumanem atag adti Iseꞌ nan ya katundanan sa kadég, magpasakup ya Iseꞌ nan adti Ama nan. Kay yan saba ya mig-atag kan Kristu sa paghariꞌ, yanagaw ya Tyumanem ya magdumala sa kadég.

29 Anenganenga mayu ya ini: Awun manga utaw na migpaba͡utismu pada sa manga nyangkamatay na walaꞌ pa ba͡utismuwi. Na, anangaꞌ silan magpaba͡utismu kun walaꞌ ya pag-iman nilan na matawun ya nyangkamatay?

30 Aw kun walaꞌ ya pagkataw na manga utaw lekat adti pagkamatay, anangaꞌ kaꞌ gayed nami pigsolok ya kalatayan kada allaw aw kada udas kun walaꞌ ya ma-untung nami dun? 31 Piglongan ta kamu, kay manga inulug, na kada allaw pigsolok ku ya kalatayan. Manang kamu saba ya dengeg ku, aw migleya aku asuntu sa manga pigpan-imoꞌ ni Kristu Jisus na kanaten Matas na Pangulu dun ni kadég mayu. 32 Aw unu ya un ku ma-untung sa malug na pagpakabetang ku asini Épéso kun diliꞌ matawun ya manga nyangkamatay? Unu kaꞌ ya du-an ku magti-is sa manga utaw na mig-ampang sa palna-u ku? Kasiling silan na manga mannanap na to-o mangkabulut. Aw kun diliꞌ matawun ya manga nyangkamatay, na, madyaw pa na dalugun tadun ya paglongun, "Naten pangintamanen ya kuman aw badasan tadun ya minem, pagaw matay da kitadun kunallaw!"

33 Manang diliꞌ mayu pagpangintu-uwan ya piglong nilan, kay oloꞌ yan pagpasuway kamayu! Ini baling ya tengteng matinaw: "Kun sumambuk kaw adti manga utaw na malatay ya bet, diliꞌ madugay katapunan kaw na bet nilan." 34 Yanagaw una mayu anenganenga ya madyaw aw ya matinaw, aw botoni mayu ya pag-imoꞌ sa salaꞌ. Piglong ku yeiy kay kya-ede-an ku na awun manga utaw dun ni kamayu na walaꞌ nilan ka-ede-i ya Tyumanem. Aw yeiy ya makamulamula kamayu.

35 Pagaw awun utaw na musip, "Unu ya pagkataw na manga utaw na nyatay da? Aw unu lawasa ya un pagsayu dun ni kanilan pagbangun?" 36 Ayin kaꞌ pakabetang ya anenganeng na utaw na miglong sa maynan? Unu, walaꞌ nan ka-ede-i na kun magtanem ya utaw sa biniꞌ dun ni lupaꞌ, una malandak ya biniꞌ aw pagkatigkas gumitiꞌ da? 37 Aw ya pigtanem mayu dun ni lupaꞌ bekeꞌ saba na lawās manang oloꞌ biniꞌ kasiling na biniꞌ na trigu aw manga eped pa na punganan na tanem. 38 Manang pagbayaꞌ dadan na Tyumanem kun unu tanema ya gumitiꞌ lekat adti biniꞌ yan.

39 Maynan uman ya lawas na manga awun ginawa, kay walaꞌ pag-unawa ya lawas na kadég. Sangkapungan ya lawas na utaw aw sangkapungan uman ya lawas na manga ayep aw ya lawas na manga langgam aw ya lawas na manga isdaꞌ. 40 Aw walaꞌ pag-unawa ya manga punganan na manga pig-imoꞌ na Tyumanem na awun ni langit aw ya manga asini tas na lupaꞌ. Pig-imoꞌ nan ya kadég na alag manenggeya, manang walaꞌ pag-unawa ya kanenggeya nilan. Sangkapungan ya kanenggeya na manga pig-imoꞌ nan adti langit aw sa manga pig-imoꞌ nan asini tas na lupaꞌ. 41 Aw sangkapungan ya kanenggeya na sega aw bulan aw ya manga bitun. Aw walaꞌ pag-unawa ya kanenggeya na kadég na manga bitun.

42 Na, maynan uman ya kanaten lawas adun, diliꞌ mag-unawa sa lawas na un matawun kagaya na Tyumanem. Kay ya lawas tadun adun, matay saba aw malandak, manang ya lawas na matawun kagaya, diliꞌ da matay. 43 Ya lawas na utaw na nyatay da, diliꞌ madyaw pagtandawan aw walaꞌ da ya ma-untung. Manang kun matawun da, to-o la manenggeya kay baguwun saba magi sa katulus na Tyumanem. 44 Ya lawas tadun adun, asini la oloꞌ taman ni tas na lupaꞌ, manang kun matawun da, ya lawas yan umbaꞌ meyaꞌ adti tas na langit. Kay awun lawas na asini oloꞌ taman ni tas na lupaꞌ aw awun uman lawas na adtu kagaya ni tas na langit.

45 Aw pigpasulat asini muna na "ya tagnaꞌ na utaw na si Adan pig-atagan na ginawa."* Manang ya palangad Adan na nyakamoli, yan si Kristu na nyataw lekat adti pagkamatay aw mig-atag sa bagu na ginawa. 46 Pakanyegi mayu: Ya lawas na muna pig-imoꞌ na Tyumanem, yan ya lawas na magkamatay. Manang ya makamoli kagaya yan ya lawas na atag lekat adti tas na langit. 47 Ya tagnaꞌ na utaw na si Adan, pig-imoꞌ lekat adti kutu na lupaꞌ. Manang ya kadwa na utaw, yan si Kristu na lyumekat adti tas na langit. 48 Aw lyumekat saba ya kadég tadun adti tagnaꞌ na utaw na pig-imoꞌ lekat adti kutu na lupaꞌ aw nyasiling uman kitadun kanan. Manang ya kadég tadun na dyumalug kan Kristu, masiling kitadun saba kanan kay atagan kitadun na bagu na lawas na umbaꞌ meyaꞌ adti tas na langit. 49 Ya kanaten lawas adun kasiling na lawas ni Adan na pig-imoꞌ lekat dun ni kutu na lupaꞌ, aw dumateng uman ya allaw na ya lawas tadun masiling da na lawas ni Kristu.

50 Yanagaw, kay manga inulug, ya lawas tadun na magkamatay, diliꞌ makaseled adti Kasakupan na Pighari-an na Tyumanem na adti tas na langit kun diliꞌ una sayuwan na lawas na diliꞌ da magkamatay.

51 To-o mayu pakanyegi ya un ku paglongun: Pigbukasan kanak ya palpa na Tyumanem na pigtaguꞌ nan asini muna. Diliꞌ ya kadég tadun mabus mangkamatay kay ya eped kanaten kasaban na paglikuꞌ ni Kristu, aw ya kadég tadun na nyangintu-u kanan, un baguwun na Tyumanem ya kanaten lawas. 52 Aw biglaꞌ na ma-imoꞌ yeiy na diliꞌ pag-imanmanen, kasiling na pagpilek na mata, kay dun ni moli na uni na trumpita, ya kadég na manga nyangkamatay un matawun. Aw kitadun na nyangintu-u kan Kristu, mabagu la ya lawas tadun. 53 Kay ya kanaten lawas na magkamatay, ka-ilangan saba sayuwan na bagu na lawas na diliꞌ da magkamatay. 54 Yanagaw kun ya lawas tadun na magkamatay kasayuwan da na bagu na lawas na diliꞌ da magkamatay, dun da katuman ya pigpasulat na Tyumanem asini muna, law nan, "Pigdeg da ya kamatayen, aw walaꞌ da ya katulus nan!"* 55 Aw pigpasulat pa na Tyumanem asini muna, law nan, "Ayin da ya katulus na kamatayen? Aw ayin da ya bisa nan?"* 56 Ya bisa yeiy na kamatayen, yan ya pagpa-emel-emel na Tyumanem na un dumateng adti manga utaw asuntu sa manga salaꞌ nilan. Aw ya sampetan na salaꞌ, yan ya pagpa-emel-emel kay piglakadan na manga utaw ya suguꞌ na Tyumanem. 57 Manang pigpasalamatan tadun ya Tyumanem kay pigdeg da nan ya salaꞌ aw ya kamatayen, aw pig-atag nan kanaten na mabatug da tadun uman degen ya kadég yeiy magi sa kanaten Matas na Pangulu na si Jisu-Kristu.

58 Yanagaw, kay manga inulug na kanak pigginawa͡an, pakasaliga to-o ya kamayu pagpangintu-u aw tibagsegi na diliꞌ kamu makasuway adti pangkay unu. Aw gayed mayu ka͡asebi ya manga imo-unun na pigtaligu kamayu na Matas na Pangulu tadun, kay kya-ede-an mayu na diliꞌ saba masapad ya kamayu kyapagudan dun ni kanan.