1 Coríntios 9

24 Na, dun ni pagdalug tadun sa Tyumanem, kasiling kitadun na mig-abay nyalaguy. Dun ni pag-abay madég ya utaw na nyalaguy, manang sambuk da oloꞌ ya makadawat sa tandan. Yanagaw dun ni kanaten pag-abay, tibagsegi mayu ya pagpalaguy pada makamang mayu ya tandan. 25 Ya tagsambuksambuk na utaw na mag-abay, matadeng sakanan magtagen sa pagka-utawun nan aw pagpakabagsegen nan ya kanan lawas pada makamang nan ya tandan. Pigtibagsegan nilan yeiy pangkay maksay magkalat ya palangad tandan.*9:25 Dun ni manga allaw ni Pablo, awun to-o dakulaꞌ na pag-abay na malapit dun ni Corinto. Madég ya manga utaw na nyalaguy, aw madég uman ya migtandaw. Aw yan ya palangad tandan sa utaw na nyaka-una adti sangku-anan, korona na pig-imoꞌ lekat adti manga dawun. Aw kitadun na manga mangintu-uway, tibagsegan tadun uman ya pagdalug sa Tyumanem, pada madawat tadun ya tandan na diliꞌ magkalat. 26 Sa pagdalug ku uman kan Kristu, kasiling aku na mig-abay nyalaguy na walaꞌ ya lingi-lingiꞌ pasinan adti sangku-anan. Aw kasiling aku uman na utaw na migbaksing, diliꞌ aku sumumbag na diliꞌ aku kumeleg. 27 Yanagaw pigtagilan da ku ya kanak lawas adti pangkay unu, kay pagaw matigkas da ku ya pag-ubat-ubat adti madég na utaw, aku baling ya diliꞌ makadawat sa tandan na lekat adti Tyumanem.