1 Yanagaw, asuntu na madugay da kitadun nyangintu-u kan Kristu, diliꞌ da tadun gayed salutsalutun ya manga tagnaꞌ na pigpalna-u kanaten. Madyaw pa na padelegen tadun ya pagtulin magi sa palna-u na kyalabetan tadun. Kay kya-ede-an da mayu saba ya manga palna-u ini: ya pagselsel sa imo-unun na walaꞌ ya ma-untung, aw ya pagpangintu-u sa Tyumanem, 2 aw ya paglinis, aw ya pagpandung sa palad adti ulu na eped, aw ya pagmataw na Tyumanem sa manga nyangkamatay, aw ya pag-ukum nan kagaya na walaꞌ ya tyamanan. 3 Yanagaw to-o pa tadun baling padelegen ya pagtulin dun ni palna-u na kanaten kyalabetan, kun tumbay na Tyumanem.

4 Na, ya manga utaw na tengteng tyumalikud sa pagpangintu-u nilan, unun pa kaꞌ na sambuk na utaw ya pagpalikuꞌ kanilan adti pagselsel? Idtu muna, kya-ilawan da ya kanilan anenganeng magi sa Madyaw na Ubat-ubat kan Jisus aw pig-apet da nilan ya kallat na Tyumanem. Nyadawat nilan ya kanan Ispiritu, 5 aw pig-apet da nilan ya manga kadyawan na pigdengeg nilan adti tingeg na Tyumanem. Aw kyinitaꞌ nilan ya manga milagru aw katulus nan na un pa padelegen adti manga kamoliyan na allaw. 6 Manang kun pig-apet da nilan ya kadég yeiy aw tigkas yan pigtalikudan nilan, diliꞌ da mabatug na lumikuꞌ silan magselsel adti Tyumanem, kay kun yan da ya pagbayaꞌ nilan, kasiling na pigpakalabu nilan salut ya Iseꞌ na Tyumanem adti krus aw pigmulamula adti asdangan na manga utaw.

7 Ya utaw na nyakadalid da ya pagpangintu-u, kasiling sakanan na lupaꞌ na gayed pig-ulanan, tumulin ya manga tanem aw dakulaꞌ ya ma-untung na tagtun kay pigpakadyaw sakanan na Tyumanem. 8 Manang ya utaw na tyumalikud sa pagpangintu-u nan, kasiling uman sakanan na lupaꞌ na piggiti-an oloꞌ na manga sagbet na suksukun, walaꞌ ya ma-untung na tagtun, aw diliꞌ madugay katullunan na Tyumanem aw sunugun kagaya.

9 Kay manga inulug na to-o ku pigginawa͡an, pangkay maynan ya piglong nami manang nya-edeꞌ da kami na kya-untungan da kamu sa pagpaluwaꞌ kamayu na Tyumanem. 10 Matinaw saba ya pagbayaꞌ na Tyumanem, yanagaw diliꞌ nan kalingawan ya kadyaw na manga imo-unun mayu aw ya pagginawa mayu kanan magi sa pagpadeleg mayu tyumabang sa manga mangintu-uway. 11 Aw kaliman nami na magtibagseg ya tagsambuksambuk kamayu magpadeleg dun ni pagpangintu-u taman adti katigkasan pada tengteng malingeb ya pag-iman mayu. 12 Kay kun imo-un mayu ya maynan, diliꞌ kamu ma-imoꞌ mataka. Manang madalug mayu baling ya manga utaw na nyakadawat da sa pigpakang kanilan na Tyumanem, asuntu na nyakati-is silan aw nyakapadeleg dun ni pagpangintu-u nilan.

13 Dun ni pagpakang na Tyumanem kan Abraham asini muna, walaꞌ ya eped na ngalan na matas pa na pigpamatinaw nan. Yanagaw migsapaꞌ sakanan magi dun ni kanan ngalan, 14 law nan, "Pakadyawun ta kaw saba aw to-o ku pakadégen ya manga buwadbuwad mu."* 15 Aw asuntu na nyakatagad si Abraham sa piglong na Tyumanem, nyadawat nan ya pigpakang kanan.

16 Na, ya manga utaw na magsapaꞌ, pagngalanan nilan ya sambuk na matas pa kanilan pada yan ya magmatinaw sa pagsapaꞌ nilan. Aw ya pagsasapa-ay nilan, yan ya magbugtuꞌ sa kanilan pag-ayil. 17 Aw maynan uman ya pig-imoꞌ na Tyumanem asini muna. Kay kaliman nan pakitaꞌ adti kanan manga utaw na atag nan kanilan ya kanan pigpakang aw diliꞌ ma-uman ya pagbayaꞌ nan. Aw pigmatinaw nan yeiy magi dun ni kanan pagsapaꞌ. 18 Ya pakang aw ya sapaꞌ alag diliꞌ ma-uman, kay ya Tyumanem diliꞌ maggaluꞌ. Aw ya Tyumanem, yan ya gayed tadun pagpalaguyan. Aw asuntu seiy, magkabagseg da ya kanaten ginawa pada pakasaligen ya kanaten pag-iman na tumanen saba na Tyumanem ya kadég na pigpakang nan, 19 aw diliꞌ kitadun kabullugan. Aw ya pag-iman tadun kanan, kasiling na angkla na magpakatagen sa barko. Aw asuntu seiy, mabatug da tadun ya pagseled adti asdangan nan kay walaꞌ da ya nyakasaliben.* 20 Si Jisus nyuna la saba kanaten adti tengteng pag-eya-an na Tyumanem, aw nya-imoꞌ sakanan To-o Matas na Magdadugsu-ay na walaꞌ ya tyamanan, kasiling na pagkamagdadugsu-ay ni Mélkizédék.