1 Na, ini ya tengteng puntu na piglong nami kamayu: Awun saba To-o Matas na Magdadugsu-ay na migpatengaꞌ kanaten na adtu la ni tas na langit. Nyingkud sakanan apit adti kalintu na trunu na Ama na yan ya Tyumanem na To-o Pagdeyen. 2 Aw pig-imoꞌ nan ya kanan manga imo-unun dun ni tengteng pagsimba͡an sa Tyumanem. Aw ya pagsimba͡an yeiy, walaꞌ na manga utaw imo-a manang Tyumanem ya mig-imoꞌ.

3 Asini tas na lupaꞌ, ya pigpamalliꞌ na ma-imoꞌ pangulu na manga magdadugsu-ay, yan ya mag-atag sa manga dugsuꞌ adti Tyumanem. Yanagaw ya kanaten uman To-o Matas na Magdadugsu-ay, ka-ilangan na awun uman kanan atag na dugsuꞌ. 4 Na, kun kenneꞌ ni Jisus asini tas na lupaꞌ, diliꞌ sakanan ma-imoꞌ magdadugsu-ay kay awun da manga magdadugsu-ay na dyumalug sa Uldin na Tyumanem.* 5 Aw ya pagsimba͡an nilan sa Tyumanem, oloꞌ yeiy alung sa adti tas na langit. Kya-ede-an tadun kay piglongan na Tyumanem si Moysis, "Sa pag-imoꞌ mayu sa un pagsimba͡an kanak, magpakatadeng kaw na dayaw mu madalug ya kadég na pigpakitaꞌ ku kanmu adti buntud." * 6 Manang to-o pa madyaw ya imo-unun ni Jisus na migpatengaꞌ adun kay sa manga magdadugsu-ay na migpatengaꞌ adti Témplo. Kay to-o pa madyaw ya bagu na pakang na Tyumanem, asuntu na pigpaligenaꞌ nan dun ni kanan manga pigpakang na to-o pa madyaw.Pigdalug ni Moysis ya piglong na Tyumanem sa pag-imoꞌ sa Tabirnakulu na un pagsimba͡an kanan adti kaligbinan.

7 Kun nyalingeb pa na muna pakang ya palpa na Tyumanem, diliꞌ da ka-ilangan ya bagu. 8 Manang kyinitaꞌ na Tyumanem na awun pa pagsalaꞌ sa pagdalug na manga utaw na Isra-él sa muna pakang. Yanagaw miglong ya Tyumanem:

"Dumateng ya allaw na mag-imoꞌ aku sa bagu na pakang adti manga utaw na Isra-él aw sa manga utaw na Juda.

9 Aw diliꞌ da kasiling na tagnaꞌ na pakang ku idtu muna na pig-imoꞌ ku adti manga tyugbulan nilan, dun ni pag-agak ku kanilan lekat adti nasud na Ihiptu.

Walaꞌ nilan padelega ya pagdalug sa manga suguꞌ ku,

yanagaw pigpabaya-an da ku silan.

10 Manang ini ya bagu na pakang na un ku imo-un sa manga buwadbuwad ni Isra-él sa manga allaw na dumadateng pa:

Betang ku ya kanak manga suguꞌ dun ni anenganeng nilan aw dayaw ku tanemen adti seled nilan.

Ma-imoꞌ aku Tyumanem nilan, aw silan uman ma-imoꞌ kanak manga utaw.

11 Aw diliꞌ da nilan ka-ilangan palna-uwan ya kanilan manga eped kun singalan aku,

kay alag da silan maka-edeꞌ kanak, pangkay ya manga tagituꞌ aw manga utaw na dengganen.

12 Kay kallatan ku silan, aw kalingawan da ku ya manga malatay na imo-unun nilan, aw diliꞌ da ku anenganengen ya manga salaꞌ nilan." *

13 Yanagaw, sa paglong na Tyumanem na awun bagu na pakang, dun da nan pa-ede-an na walaꞌ da ya katukanan sa muna pakang, aw diliꞌ madugay malagak da.