1 Na, pagkamaselem da, migkasambuk ya ginawa na manga mangkatas na magdadugsu-ay, aw manga magdadumala͡ay sa manga Judiyu, aw manga magpalna-uway sa Uldin, aw kadég na mag-usayay kun unu ya un nilan imo-un kan Jisus. Yanagaw pigpagapus nilan si Jisus, aw pigpa-agad nilan adti kan Pilato na yan ya gubirnador na taga Roma.

2 Aw pig-usip ni Pilato si Jisus, "Unu, ikaw ya hariꞌ sa manga Judiyu?" Aw tyumubag si Jisus, "Piglong da mu." 3 Pagkatigkas yan, pig-ubat na manga mangkatas na magdadugsu-ay kan Pilato ya madég na diklamu nilan kan Jisus. 4 Yanagaw nyusip pa si Pilato kanan, "Walaꞌ kaꞌ ya matubag mu sa manga piglong nilan? To-o madég ya manga diklamu nilan kanmu." 5 Manang walaꞌ da tubag si Jisus. Aw nyabelengbeleng kanan si Pilato.

6 Na, awun katanem na gubirnador na kada umay dun ni Pista na Paglabay na Anghil na Tyumanem, magpaluwaꞌ sakanan sa sambuk na nyakalabusu na kaliman na manga utaw paluwa-en. 7 Aw dun ni kalabusuwanan awun manga utaw na nyakalabusu asuntu na nyatu silan sa gubirnu aw awun manga pigpatay nilan. Ya sambuk kanilan pigngalanan na si Barabas. 8 Aw migpangkatipun ya madég na utaw adti kan Pilato, kay ya tud nilan sekaten adti kanan na imo-un nan uman adun na umay ya kanan katanem na magpaluwaꞌ sa sambuk na utaw na pigkalabusu. 9 Aw nyusip si Pilato kanilan, "Unu, kaliman mayu na paluwa-en ku kamayu ya hariꞌ sa manga Judiyu?" 10 Kay kya-ede-an ni Pilato na to-o nyingaꞌ kan Jisus ya manga mangkatas na magdadugsu-ay aw yan ya du-an na pigtumbay nilan si Jisus adti kanan. 11 Manang pigdegdeg na manga mangkatas na magdadugsu-ay ya madég na manga utaw na yan ya sekaten nilan si Barabas. 12 Aw nyusip pa si Pilato kanilan, "Kun paluwa-en ku si Barabas, unun ku ya utaw yeiy na pagtawagen mayu na Hariꞌ na manga Judiyu?" 13 Aw tyumubag ya kadég nilan, "Pakalabuwan sakanan adti krus!" 14 Aw miglong pa si Pilato, "Anangaꞌ? Unu ya nya-imoꞌ nan na malat?" Manang to-o la baling silan nyamansag, "Pakalabuwan sakanan adti krus!" 15 Na, ya kaliman ni Pilato na magleya kanan ya manga utaw, yanagaw pigpaluwaꞌ nan si Barabas. Manang si Jisus pigpalabet nan aw pigtumbay nan adti kanilan pada pakalabu adti krus.*15:15 Ya lalabet na manga sundalu na Romanen, awun tinggaꞌ adti tuktuk, aw madég ya pesaꞌ na mangkatalem dun ni tengaꞌ.

16 Aw pigdala si Jisus na manga sundalu adti pamanag na palasyo na gubirnador. Aw pigtawag nilan ya kadég na manga sundalu.*15:16 Manga enemenggatus (600) ya kadég na manga sundalu na Romanen na nyeyaꞌ dun ni seled na kotaꞌ. 17 Aw pigpasut nilan si Jisus sa malawig na sa-ul na tapel ya batek kasiling na pagsutun na hariꞌ. Aw tigkas yan, mig-imoꞌ silan sa korona na suksukun aw pigsangkub nilan adti ulu ni Jisus. 18 Aw pig-odoy-odoy nilan na sallong kunu syumaludu silan kanan, law nilan, "Kay Hariꞌ na manga Judiyu, magkadugay pa galu ya pag-eyaꞌ mu asini tas na lupaꞌ!" 19 Aw gayed nilan pigbunalan ya ulu nan na bangkaꞌ, aw pigpan-eleban nilan si Jisus. Aw lyumuhud silan adti asdangan nan na sallong kunu silan migsimba kanan. 20 Pagkatigkas nilan sakanan odoy-odoyun, pigluwasan nilan sa malawig na sa-ul aw piglikuꞌ nilan pigpasut ya kanan kadégkadég. Aw tigkas yan, pigdala na manga sundalu si Jisus adti luwaꞌ na syudad na un nilan kalabuwan adti krus.

21 Dun ni dalan, pig-isungun nilan ya sambuk na eseg na si Simon na taga syudad na Ciréné, aw pigleges pigpapisan kanan na manga sundalu ya krus ni Jisus. Na, si Simon yan ya ama ni Aléjandro aw ni Rupo.*15:21 Si Rupo, yan ya pigngalanan ni Pablo adti Roma 16:13. 22 Aw dyala nilan si Jisus adti banwa na pigngalanan na Golgota, na ya kakawasan: Banwa na Pesaꞌ na Ulu. 23 Pagdateng nilan dun, pigdimilan nilan si Jisus na bino na pigdali-an na mirra, manang walaꞌ nan dawata. 24 Aw tigkas yan, pigkalabuwan nilan si Jisus adti krus. Aw migbunutbunut ya manga sundalu kun singalan kanilan ya makatagtun sa tagsambuksambuk na kadégkadég ni Jisus.

25 Na, manga alas nibi na maselem ya pagkalabu nilan kan Jisus adti krus. 26 Aw awun pigsulat nilan dun ni tabla na limanda kanan aw pigtapliꞌ nilan adti krus na maglong: "Yeiy ya Hariꞌ na manga Judiyu." 27 Na, dun ni tampid ni Jisus awun duwa ya ribildi*15:27 Ya eped na pag-ubad: matakaw. Asini muna, ya kakawasan na "lēstas" dun ni tingeg na Grigo: matakaw. Manang dun ni allaw ni Jisus, pig-uman da ya kakawasan na "lēstas" aw yan ya: ribildi. Adti bala-ud na manga Romanen, diliꞌ pagkalabuwan adti krus ya matakaw, manang oloꞌ migribildi sa gubirnu na taga Roma. na pigkalabuwan uman adti manga krus nilan, ya sambuk apit adti kalintu aw ya sambuk uman apit adti kawala. 28 [Nyatuman agaw ya pigpasulat na Tyumanem asini muna, law nan: "Nyaka-iyeped sakanan sa manga makasasalaꞌ."]*15:28 Ya lyekatan na birsikulu ini, Isayas 53:12.

29 Aw ya manga utaw na lyumabay dun, mig-odoy-odoy silan kan Jisus aw mig-eleng-eleng silan, law nilan, "Miglong kaw na kalaten mu ya Témplo aw seled na tulungallaw pa-indegen mu uman salut ya bagu. 30 Na! Tabangi ya kanmu pagka-utawun aw panog kaw dun ni krus!" 31 Aw maynan uman, migpan-odoy-odoy kanan ya manga mangkatas na magdadugsu-ay aw ya manga magpalna-uway sa Uldin, law nilan, "Mabatug nan tabangan ya eped, manang diliꞌ nan mabatug tabangan ya kanan pagka-utawun. 32 Misiyas kunu sakanan aw Hariꞌ sa manga utaw na Isra-él! Kun kita-en nami na manog sakanan dun ni krus, mangintu-u kami kanan!" Aw pangkay ya duwa na eped nan na pigkalabu adti krus, mig-odoy-odoy uman kanan.

33 Pagka-alas dosi la, migkangitngit ya banwa seled na tulungka udas. 34 Pagka-alas trés da na ambung, mig-ulangag si Jisus, law nan, "Éloi, Éloi, lama sabaktani?" Ya kakawasan na piglong nan: "We…Tyumanem ku! We…Tyumanem ku! Anangaꞌ aku mu ayawan?"*15:34 Ya piglong ni Jisus lekat adti Salmo 22:1. 35 Sa pagdengeg na manga utaw na malapit dun, miglong ya eped kanilan, "Pakanyegi mayu! Pigtawag nan ya propita na si Éliyas." 36 Aw sambuk kanilan maksay nyangay sa ispongha aw pig-elem nan adti bino na malagsing. Aw pigbetang nan adti tuktuk na layiꞌ aw pigsungit nan kan Jisus na un pasepsep kanan. Aw miglong sakanan, "Na, tagadan pa tadun! Tanawun naten kun madi si Éliyas pada magpapanog kanan lekat adti krus."

37 Aw mig-ulangag to-o si Jisus aw nyabugtuꞌ ya ginawa nan. 38 Aw nyakisay ya to-o madakmel na téla na pigsaliben na awun ni seled na Témplo, aw dayaw nyatengaꞌ lekat adti tas taman adti dalem.*15:38 Ya pagkakisay na madakmel na téla yeiy, yan ya migpakitaꞌ na pigkamang da ni Jisus ya nyaka-elet pada makapalapit da ya manga utaw adti Tyumanem. 39 Aw ya kapitan na manga sundalu na nyindeg dun ni asdangan na krus, kyinitaꞌ nan ya pagkamatay ni Jisus. Aw nyakapaglong sakanan, "Matinaw kadiꞌ! Ya utaw ini, tengteng Iseꞌ na Tyumanem!"

40 Awun uman manga ka͡ubayan na migtandaw adti mawatawat. Eped dun ni kanilan si Salomé aw si Maria na taga lunsud na Magdala, aw si Maria na ina ni Santiago aw ni José. 41 Silan ya eped na manga umagakan ni Jisus na gayed mig-agad-agad kanan. Aw silan ya migsanggilaꞌ kanan talana na adtu pa silan ni Galiliya. Aw madég pa uman ya eped na manga ka͡ubayan na nyagad kanan adti Jérusalim.

42 Na, yan ya allaw na magtagilan ya manga Judiyu sa Allaw na Paglagdeng. Aw sa pagkamagsiklep da, 43 si José na taga Arimatiya walaꞌ pagduwaduwa kadtu ni kan Pilato, aw pigsekat nan ya lawas ni Jisus. Si José pagbasa͡an na manga eped nan adti matas na usayanan aw migtagad pa uman sa Paghariꞌ na Tyumanem sa Kasakupan nan. 44 Sa pagdengeg ni Pilato na nyatay da si Jisus, kyumegaꞌ sakanan. Yanagaw pigtawag nan ya kapitan na manga sundalu aw pig-usip nan kun tengteng na nyatay da si Jisus. 45 Pagdengeg ni Pilato sa piglong na kapitan, pigtumbay nan kan José ya pagkamang sa lawas ni Jisus. 46 Pagkatigkas yan, nyayad si José sa téla na linum, aw pigkamang nan ya lawas ni Jisus lekat adti krus aw pigbedbedan nan na téla. Aw pigbetang nan adti seled na ilib na dadan da pigkutkutan adti kilid na pangpang na un paglebengan sa utaw, aw miglilid sakanan sa dakulaꞌ na batu pada pagtampeng sa bakaꞌ na ilib. 47 Aw pigtandawan ni Maria na taga Magdala aw ni Maria na ina ni José, yanagaw pigka-ede-an nilan kun ayin lebengan si Jisus.