1 ✝Saangu wakutuu o KAWASANA OPU afirimani i Yunus bin Amitai mboo sii, 2 "Lingkamo pekadhei i Niniwe*). Miana Yahudi abanci mpuu miana Asyur tee aabhia kabilanga bhalina. Nabii Yunus aʼamara mpuu roonamo raʼeatina Niniwe mencuana siwuluna miana Yahudi. Yunus aharapu mpuu mamudhaakana manga incia bheahukumua Kawasana Opu. i kota momaoge sumai to uudhaniaka manga incia, roonamo kumataua o pewauna manga incia amadhaki mpuu."

3 Maka o Yunus apekadhei alingka aporope i weta i Tarsis* to apekaridhoaka karona minaaka i KAWASANA OPU. Yunus alingka i Kota Yafo tee iwe sumai dhaangia saangu o kapala bhemobhosena i Tarsis. Sapadhana apomea sewana kapalana, incia akompamo i bhawona kapala sumai kasiimpo abhose to apekaridhoaka karona minaaka i KAWASANA OPU apobhawa-bhawa tee manga mia mobhosena i Tarsis.

4 Sumaimo KAWASANA OPU aumbaakamo ngalu momakaa mpuu i tawo, kasiimpo atiumbamo garura momaoge, sabutuna o kapala sumai saidhepo amapasa. 5 Bhari-bharia ana buana kapala uka amaekamo mpuu, kasiimpo manga incia adoʼa tee aemani tulungi i dewana samia-samia. Bhari-bharia barana manga incia abhanakamea i tawo to amagaa-gaaaka o bhawana kapala sumai.

Maka o Yunus asapomo i tambena kapala, kasiimpo apotidhole tee atokole mpuu iwe sumai. 6 Wakutuuna anakodana kapala sumai asapo i tambena kapala, incia apokawaakamo Yunus tee apogau, "Tuaapa amembali ingkoo utokole mpuu mboo sii? Bhangumo! Doʼamo i dewamu! Incema amataua o dewamu sumai dhaangiapo mangaudhani tee indaaka tabinasa."

7 Manga ana buana kapala sumai apogaumo podho-podho manga incia, "Maimo tabhanakaaka undi to tamatauaka incema mosababuakana ingkita mangakangkanai balaa incia sii." Kasiimpo manga incia abhanakamo undi, tee o Yunus ikangkanaina undi sumai.

8 Kasiimpo manga incia apogau tee Yunus, "Mangapaumbaakapo, incema buaka moumbaakana balaa sii? Opea o karajaamu tee aminaaka i iapai o asalamu? Iapai o lipumu tee uminaaka i suku i iapai?"

9 Lawanina Yunus, "Iaku sii o miana Ibrani. Iaku kusomba KAWASANA OPU, Aulataʼala momboorena i sorogaa, mopadhaangiana tawo tee ati."

10 Sapadhana incia sumai, Yunus apetulatulaakamo ande incia tangasaana apalaiaka karona minaaka i KAWASANA OPU. Sarangona pogauna Yunus, manga ana buana kapala sumai amaekamo mpuu, tee apogau, "Apokia upewau mboo itu?"

11 Wakutuu incia sumai o tawo ahandamo akogarura tee o ewo amakaa mpuu, sabutuna manga ana buana kapala sumai aabhamo, "Opea tabeana ipewaumami tee ingkoo mamudhaakana o garura sii aunto?"

12 Lawanina Yunus, "Tudhaakaakumo i tawo mamudhaakana aunto garura sii, roonamo kumataua ande rampaakanamo iaku iumbaakana garura ogena sii."

13 Maka o Yunus inda alausaka atudhaakea i tawo. Manga ana buana kapala sumai dhaangiapo aʼusaha to ajao kapalana mamudhaakana ambuli i ati, maka o usahana manga incia asia-sia, roonamo garura sumai ahandamo ajulu o kakaana. 14 Rampaakanamo sumai, manga incia adoʼamo tee aemani tulungi i KAWASANA OPU, "E KAWASANA OPU, maasangia bholi mangapabinasa rampaakanamo tapekamate mia incia sii, tee bholimo mangapatanggoaka raana mia inda mosala, roonamo Ingkoo KAWASANA OPU padhamo upewau mboomo ipeelumu karomu." 15 Kasiimpo manga incia aangka Yunus tee atudhaakea i tawo, sabutuna auntomo pamuruna garura sumai. 16 Manga ana buana kapala sumai amaekamo mpuu tee KAWASANA OPU, sabutuna sasandarana i ati manga incia apasombaakamo kurubani isumbele to KAWASANA OPU tee ajanjiakamo tolauna onina.

17 ✝Wakutuu incia sumai o KAWASANA OPU aparintamo sambaa ikane maoge to adhokuaka Yunus. Sumaimo Yunus ambooremo i nuncana kompona ikane sumai kangengena talu malo talu eo.