1 Maka o Nabii Yunus amapii incana tee aʼamara mpuu roonamo Aulataʼala inda asidha apabinasa Niniwe. 2 ✝Kasiimpo incia adoʼa i KAWASANA OPU, pogauna, "E KAWASANA OPU, buaka mencuana giu incia sii mopadhana ipogauakaku wakutuuna iaku dhaangiapo i lipuku? Rampaakanamo sumai, iaku kupalaiaka karoku i Tarsis. Iaku kumataua ande Ingkoo Aulataʼala Mobukeakana Rahumati tee Momaogena Kaasina, inda amasimba uʼamara, molagina kaasina tee Ingkoo sadia mangamaasiaka, sabutuna inda asidha uumbaaka balaa. 3 E KAWASANA OPU, ande amembali uhobutimea o inyawaku, roonamo salabhina kumate tee kudhadhi."

4 Maka o KAWASANA OPU afirimani, "Ingkoo inda tee alasamu to uʼamara mboo itu."

5 Yunus alingkamo minaaka i Kota Niniwe sapadhana apakawaaka Firimanina Aulataʼala i raʼeati tee ambooremo i weta i timbuna kota incia sumai. Iwe sumai incia apakaro saangu wale to apeuluaka i nuncana, tee aantagi opea bhemomembalina tee Kota Niniwe sumai.

6 Kasiimpo KAWASANA OPU Aulataʼala apatuwu saangu puuna penembula mopapeuluna bhaana Yunus to apauntoaka kasabhanarandana. Yunus akaunde-unde mpuu roonamo penembula incia sumai. 7 Maka samainawana tee dhaangiapo raneeo, Aulataʼala aumbaakamo ulo-ulo to apapaki tee abhaloki bhatana penembula sumai sakawana amalau. 8 Sapadhana incia sumai tee sabhetena matana eo, Aulataʼala aumbaakamo uka ngalu momasodho mominaakana i timbu tee mokangkanaina tee mopekapiina bhaana Yunus, sabutuna incia amalutemo tee saidhepo amalimpu, roonamo bhaana akangkanaia kilana matana eo. Pogauna, "Salabhina kumate tee kudhadhi mboo sii!"

9 Maka o Aulataʼala afirimani Yunus, "Ingkoo inda tee alasamu to uʼamara mboo itu roonamo penembula incia sumai!"

Lawanina, "Iaku kulaenga kuʼamara, tee o amaraku sii kubhawea sakawana kumate!"

10 Maka o KAWASANA OPU afirimani uka, "Ingkoo umaasiaka penembula sumai, garaaka moomini saidhe inda umanguleakea, tee inda udhambaakea. Penembula sumai atuwu kangengena samalomea, tee o matena samalo uka. 11 Inda amungki Iaku inda kumaasiaka Niniwe o kota momaoge mokoraʼeatina alabhi minaaka i 120.000 mia inda momatauna mopaposalana lima kaai tee kaanana* tee mobharina kadhambaakana sumai!"