2 Atantumo inda! Roonamo ande tamate tapoose tee Isa, maʼanana o kuasana dosa padhamo apanaindaia to ingkita. Atantumo ingkita bholi tatorotorosu tadhadhi i nuncana dosa mboomo wakutuuna ingkita indapo taose Al Masi! 3 Tee ingkomiu umataua ande wakutuuna bhari-bharikita tatopapebhaho mamudhaakana taposaangu tee Isa Al Masi, ingkita tamatemo tapoose tee Incia. 4 ✝6:4 Kol. 2:12.Maʼanana o kapapebhahoka sumai amembali tanda ande ingkita tamatemo tee tatokoburumo tapoose tee Al Masi. Tee wakutuuna Aulataʼala apake kuasana momulia to apadhadhiaka Isa pendua, ingkita uka tatopadhadhimo pendua i nuncana dhadhi mobhaau.

5 Roonamo ande taposaangu tee Isa, tee tamate tapobhawa-bhawa tee Incia, sumaimo ingkita bhetapoose tee Incia, tee tapokana tatopadhadhi pendua tee Incia. 6 Ingkita tamataua ande o karota momangengena padhamo atoloe i kau salib apobhawa tee Al Masi, mamudhaakana o kuasana dosa modhaangiana i nuncana karota atopahancuru, sabutuna inda mangapabhatua dosata. 7 Roonamo incema momatena, incia padhamo atopabebasi minaaka i kuasana dosana.