1 Wakutuu incia sumai o miana Filistin apasiapu tantarana to apotimbeaka tee tantarana Israel. Kasiimpo apogaumo Raja Akhis tee Daud, "Atantumo umataua, ande ingkoo tee ana buamu bhetaposaangu tee suludaduku i nuncana potimbea sumai."

2 Lawanina Daud, "Umbe, atantumo bheukamataakea karomu opea momembalina ipewauku to Opuku."

Pogauna Raja Akhis, "Rampaakanamo sumai iaku bhekuangkako umembali kapitana manga suludadu to mojaganiaku saʼumurua."

3 ✝Wakutuu incia sumai o Nabii Samuel amatemo. Bhari-bharia miana Israel atangisia tee o Samuel atokoburu i Kota Rama, siitumo i kotana karona. Wakutuu incia sumai o Raja Saul padhamo apadhencu manga bhawine pande kembana sumanga tee manga umane pande sihiri minaaka i Israel.

4 Tantarana Filistin aporomusaka tee apokema i saripina Kota Sunem. Saul uka aromusaka bhari-bharia tantarana Israel, kasiimpo manga incia apokema i Gunu Gilboa. 5 Wakutuuna Saul akamata tantarana Filistin, incia amaekamo tee arengkumo. 6 ✝Saul aabhamo i KAWASANA OPU pokaiana tee opea tabeana bheipewauna, maka o KAWASANA OPU inda alawania, malape alaloi pongipina, alaloi Urim atawa alaloi potoloweana manga nabii. 7 Rampakaanamo sumai o Saul apogaumo tee manga pagawena, "Peeloakaaku samia bhawine pande kembana sumanga, mamudhaakana kulingka kupokawaakea tee kuabhaakea pokaiana tee opea tabeana bheipewauku."

Manga pagawena alawani, "I Kota En-Dor dhaangia tee bhawine pande kembana sumanga."

8 Kasiimpo o Saul apakemo pakea mosagaanana mamudhaakana inda dhaangia o mia momataua tee alingka apobhawa tee rua mia umane. Manga incia akawa i bhanuana bhawine pande kembana sumanga sumai wakutuuna amalo. Kasiimpo Saul apogaumo, "Pekilalaakaakumo alaloi potoloweana sumanga, tee ukembaakaakumo mia bheibhotoakaku sarona to ingkoo."

9 Lawanina bhawine pande kembana sumanga sumai, "Atantumo ingkoo umataua ande o Raja Saul padhamo apadhencu manga bhawine pande kembana sumanga tee manga umane pande sihiri minaaka i Israel. Apokia ingkoo dhaangiapo uka ucoba to upacilakaaku tee upekamateaku?"

10 Kasiimpo o Saul aposumpa, pogauna, "Iaku kuposumpa to sarona KAWASANA OPU modhadhi, ingkoo inda bheakangkanaiko kahukumu rampaakanamo giu incia sii."

11 Sapadhana sumai aabhamo bhawine pande kembana sumanga sumai, "Sumangana incema bheikembaakaku to ingkoo?"

Lawanina Saul, "Kembaakaaku sumangana Nabii Samuel."

12 Wakutuuna bhisa bhawine sumai akamata Samuel, incia apekeemo tee apogau tee Saul, "Apokia ingkoo utipuaku? Ingkoo sii garaaka o Raja Saul!"

13 Lawanina Raja Saul, "Bholi umaeka! Opea buaka ikamatamu?" Bhawine sumai alawani, "Iaku kukamata sumanga atiumba minaaka i nuncana tana! Bhanguna atokamata mboomo kanjoli!"

14 Saul aabha, "Tuaapa o bhanguna?" Lawanina bhawine sumai, "Dhaangia samia mancuana motiumbana i aroaku, tee incia apake juba." Saul amataua ande isarongina sumai o Samuel, kasiimpo incia asuju tee o rouna atumpu i tana to adhawu horomati.

15 Sapadhana incia sumai apogaumo Samuel tee Saul, "Apokia ingkoo uganggoaku tee ukembaaku minaaka i nuncana koburuku?"

Lawanina Saul, "Iaku kubingu mpuu roonamo tantarana Filistin ahumbuniaku, sainamo Aulataʼala abholiakumo tee indamo alawaniaku, malape alaloi potoloweana manga nabii, atawa alaloi pongipiku. Rampaakanamo sumai iaku kuemani tee ingkoo, mamudhaakana upaumbaakaaku opea tabeana bheipewauku."

16 Kasiimpo apogaumo Samuel, "Opea o gunana ukembaaku sii-sii, sainamo KAWASANA OPU abholikomo tee amembalimo musumu? 17 ✝KAWASANA OPU padhamo apewau opea ifirimaniakana alaloi potoloweaku. KAWASANA OPU padhamo aalea o pamarintamu minaaka i limamu tee adhawuakea to mia i salipumu siitumo o Daud. 18 ✝Roonamo ingkoo inda utaʼati tee inda ubalasiaka pamuruna KAWASANA OPU to miana Amalek, sumaimo giumo incia sii bheipewauna KAWASANA OPU to ingkoo i eo sii. 19 Ingkoo tee lipuna Israel bheapasaraakaakakomiu KAWASANA OPU i limana tantarana Filistin. Naile ingkoo tee manga anamu umane bheupoose tee iaku i alamuna mia mate. KAWASANA OPU uka bheapasaraakaaka tantarana Israel i nuncana limana tantarana Filistin."

20 Wakutuu incia sumai uka o Saul atobhata tee akotibu i tana, roonamo kaekana arango pogauna Samuel sumai. Kakaana bukuna Saul uka ailamo, roonamo saeo samalomo inda tee ikandena.

21 Bhawine pande kembana sumanga sumai apasari i Saul tee akamatea ande o Saul apaangka ngangarandana. Kasiimpo bhisa bhawine sii aabha, "Satotuuna iaku padhamo kuose opea ipogauakamu. Iaku padhamo kutaaka inyawaku tee kuperangoi opea ipogauakamu tee iaku. 22 Sii-sii kuemani mamudhaakana uperangoi opea ipogauakaku sii, ande amembali ukandepo saidhe o kinande ipatalaakaku sii, mamudhaakana dhaangia tee kakaana bukumu to upalausakaaka lingkaamu."

23 Maka o Saul amendeu tee apogau, "Iaku kumendeu kukande." Maka sapadhana apakisaaia manga pagawena tee bhawine sumai, sabutuna o Saul aosemo opea ipogauakana manga incia tee abhangumo minaaka i tana kasiimpo auncura i kolema.

24 Bhisa bhawine sumai alausaka asumbele sambaa anana sapi momalompo modhaangiana i kandana, tee incia uka alaa tarigu tee alausaka akusoa kasiimpo atunua apamembalia roti inda mokoragi. 25 Kasiimpo apatalamea o kinande sumai to Saul tee manga pagawena to akandea. Sapadhana sumai manga incia alingkamo i malo incia sumai uka.