1 Sapadhana incia sumai o Nabii Samuel aalamo bhosu-bhosu mokoantoakana mina tee alalia i bhawona bhaana Saul, kasiimpo aikia tee apogau, "Buaka mencuana KAWASANA OPU mopadhana mominakiko to umembaliaka raja to tinaurakana Aulataʼala?* 2 Sapogaata i eo sii, ingkoo bheupokawa tee rua mia umane i saripina koburuna Rahel i Zelzah modhaangiana i potidhaana tanana lipuna Binyamin. Manga incia bheapogau tee ingkoo, 'Manga keledai bhawine ipeelomu sumai atokamatamo, tee sii-sii o amamu indamo afaduliaka manga keledaina sumai, maka incia tangkanamo afikiriaka ingkomiu, tee apogau, "Opea bheipewauku to anaku?" ' "

3 "Kasiimpo ulingka torosu sakawana i puuna tarbantin i Tabor. Iwe sumai ingkoo bheupokawa tee talu mia umane bhemolingkana mopasombaakana kurubani to Aulataʼala i Kota Bait-El. Dhaangia samia mobhawana talu mbaa anana bhembe, samiana abhawa talu angu roti, tee samiana uka abhawa kadhu kuli mokoantoakana uwena angguru. 4 Manga incia bheaabhaaka kadhaangiamu tee adhawuakako rua angu roti. Tarimamea o giu incia sumai minaaka i limana manga incia."

5 "Sapadhana incia sumai, ingkoo bheukawa i kabumbuna Aulataʼala i Kota Gibea. Iwe sumai dhaangia tee tampana pokemaana suludaduna Filistin. Wakutuuna upesua i kota, ingkoo bheupokawa tee manga rombongana nabii mosapona minaaka i tampana ibaadati. Manga incia abukeaka rohi, tee dhaangia pia mia o mia mosagaanana momagasiaakana gambusu, ganda, suli, tee kecapi i aroana. 6 Kasiimpo rohina KAWASANA OPU bheakuasaiko tee ingkoo bheupakawaaka kasameana Aulataʼala upobhawa tee manga incia, tee ingkoo bheumembali mboomo mia mosagaanana. 7 Ande manga tanda incia sumai amondomo i karomu, pewaumea opea iabhimu momalapena, roonamo Aulataʼala apoose tee ingkoo."

8 "Sapadhana incia sumai, ulingkamo i Kota Gilgal uporikanaakaaku tee uantagiaku iwe sumai kangengena pitu eo sakawana kuumba kupasombaakako kurubani tunua tee kurubani pomalapea tee kupaumbaakako opea bheipewaumu."

9 Maka inda amangenge sapadhana Saul abholi Samuel, Aulataʼala abhaliimo ngangarandana Saul tee incia atarimamo sifatu mobhaau. Kasiimpo bhari-bharia tanda mopadhana ipaumbaakana Samuel amondomo i eo incia sumai uka. 10 Wakutuuna Saul tee sampoosena sumai akawa i Kota Gibea, manga incia apokawamo tee sarombongana nabii. Wakutuu incia sumai o Saul akuasaia Rohina Aulataʼala, sabutuna o Saul apakawaakamo kasameana Aulataʼala apobhawa tee manga incia. 11 Bhari-bharia mia mopomatauna tee Saul minaaka i piamo itu aposamente, roonamo incia apakawaakamo kasameana Aulataʼala apobhawa tee manga nabii sumai. Kasiimpo manga mia apoabha-abhakimo podho-podho manga incia tee apogau, "Apokia sii o anana Kis sii? Buaka o Saul sii amembalimo samia nabii?"

12 ✝Dhaangia samia o mia momboorena iwe sumai mopogauna, "Incema o amana manga nabii incia sumai?" Sababuna adhaangiamo tee ibarati incia sii, "Buaka o Saul amembalimo nabii?" 13 Sapadhana apakawaaka kasameana Aulataʼala apobhawa tee manga nabii, Saul alingkamo i tampana ibaadati.

14 Saul tee sampoosena sumai akamatea pinoamana, kasiimpo pinaoamana aabhamo, "Minaaka i iapai ingkomiu?"

Manga incia alawani, "Tapeelo manga keledai bhawine momambuuna sumai, maka rampaakanamo inda tapotibhaakea, sabutuna ingkami talingkamo tapokawaaka Nabii Samuel."

15 Pinoamana Saul apogau, "Paumbaakaaku opea ipogauakana Samuel to ingkomiu."

16 Lawanina Saul, "Incia mangapaumbaaka ande o keledai bhawine sumai atopotibhaakamo." Maka o Saul inda apetulatulaakea to pinoamana ande incia padhamo alantia Samuel to amembali raja.

17 Kasiimpo Nabii Samuel akemba raʼeatina lipuna Israel to aporomusakaaka tee apoaro tee KAWASANA OPU i Kota Mizpa, 18 tee apogau, "Mboo siimo firimanina KAWASANA OPU, Aulataʼala isombana miana Israel, 'Iaku padhamo kubhawa miana Israel alimba minaaka i Mesir. Iaku padhamo kurambasakakomiu minaaka i limana miana Mesir tee bhari-bharia pamarinta mosagaanana mopisakikomiu.' 19 Maka i eo sii ingkomiu umendeu Kawasana Opumiu to mopasalaamatikomiu minaaka i bhari-bharia kasukara tee kanarakaa. Ingkomiu uka upogau tee Incia, 'Inda, mangaangkaakamo samia raja.' Jadi sii-sii, ukakaromo i aroana KAWASANA OPU uose manga suku tee manga kaumumiu samia-samia."

20 Samuel atumpu bhari-bharia sukuna Israel amaju i aroa, tee o suku Binyamin mopotibhaakana undi. 21 Sapadhana sumai, incia atumpumo suku Binyamin apoaro tee aose suku tee kaumuna samia-samia, sabutuna o miana Matri mopotibhaakana undi, tee aahirina o Saul bin Kis mopotibhaakana undi. Maka wakutuuna Saul atopeelo, incia inda atopotibhaaka. 22 Rampaakanamo sumai, manga incia aabhamo uka i KAWASANA OPU, "Buaka o mia incia sumai dhaangia iwe sii?"

KAWASANA OPU alawani, "Kamatea, incia aopo i talikuna manga bara sumai."

23 Sumaimo manga incia abuntulimo to aalea minaaka iwe sumai. Wakutuuna Saul akakaro i aroana manga mia incia sumai, kalangana badana Saul alabhi minaaka i kalangana badana manga incia, tee bhari-bharia miana Israel soo adhika i awaana. 24 Pogauna Samuel to bhari-bharia mia iwe sumai, "Kamatamea o mia ipilina KAWASANA OPU sii! Inda dhaangia o sampokanana minaaka i tanga-tangana lipu sii."

Kasiimpo asambo-sambomo saangua lipu sumai, pogauna, "Adhadhimo o raja!"

25 Kasiimpo Samuel apakawaakamo manga tuturana to raʼeati pokaiana tee haku tee iwaajibuakana raja, tee aburia i nuncana saangu kitabi tee adhikaia i aroana KAWASANA OPU. Sapadhana incia sumai o Samuel arambasakamo bhari-bharia raʼeatina lipu sumai to ambuliaka i bhanuana samia-samia.

26 Raja Saul uka ambuli i bhanuana i Kota Gibea apoose tee manga hiri* mopadhana itumpuna Aulataʼala. 27 Maka dhaangia pia mia o mia momadhakina pogauna, "Inda amungki o mia incia sii amembali mangapasalaamati." Manga incia apandaʼente Saul tee amendeu abhawa hadia to incia. Maka o Saul inda tee uuʼuuna.