1 Saangu wakutuu Yonatan bin Saul apogau tee pande kenina ewangana, "Maimo tapolimbaaka i tampana suludadu mojaganina posuna miana Filistin i sawetana sumai." Maka o giu incia sumai inda apaumbaakea i amana.

2 Wakutuu incia sumai o Saul dhaangiapo i saripina Kota Gibea, tee incia tangasaana auncura i tambena puuna dalima i Migron, tee o tantara mopoosena tee incia kera-kera dhaangia 600 mia. 3 I tanga-tangana manga incia sumai dhaangia tee Ahia bin Ahitub. Ahitub sumai o witinaina Ikabod, tee Ahitub tee Ikabod sumai o anana Pinehas bin Eli imamuna KAWASANA OPU i Silo. I wakutuu incia sumai Ahia apake bhaju efod roonamo amembalimo imamu mobholosina Eli. Bhari-bharia manga incia inda amataua ande o Yonatan alingkamo abholi pokemaana miana Israel.

4 Yonatan aʼusaha mpuu mamudhaakana amembali akawa i tampana posuna suludaduna miana Filistin, rampaakanamo sumai incia tabeana alaloi rua angu pimpi momalanga, modhaangiana iwe sii tee modhaangiana iwe sumai. Pimpi sii akosaroaka Bozes tee Sene. 5 Pimpi modhaangiana i weta napa apoaro i Mikhmas, sainamo pimpi i weta salata apoaro i Kota Gibea.

6 Kasiimpo Yonatan apogau tee pande kenina ewangana sumai, "Maimo takompaaka tahumbuni suludaduna manga mia inda mototandaki sumai. Incema amataua o KAWASANA OPU amembali mangapakana, roonamo KAWASANA OPU inda amarasai to mangatulungi, malape ingkita tabhari atawa saidhe."

7 Sumaimo alawanimo pande kenina ewangana sumai, "Pewaumea bhari-bharia ipeelumu itu. Iaku kusatuju."

8 Yonatan apogau, "Umbe, ingkita tapatokamataaka karota wakutuuna takompa tahumbuni manga incia. 9 Ande manga incia mangatumpu taunto tee taantagia sakawana mangaumbati, sumaimo ingkita tasadhaadhaa takabhale-bhale i tampata, tee bholi tapene tapokawaakea. 10 Maka ande manga incia apogau, 'Penemo iwe sii,' siimpomo ingkita tapeneikia, roonamo giumo incia sumai o tandana ande manga incia padhamo apasaraakaakea KAWASANA OPU i limata."

11 Wakutuuna manga incia apatokamataaka karona i suludadu mojaganina posuna miana Filistin, apogaumo manga suludadu sumai, "Kamatea, manga miana Ibrani sumai alimbamo minaaka i bhalo tampana opoana manga incia." 12 Kasiimpo manga suludadu mojagani posu sumai apogau tee Yonatan tee pande kenina ewangana, "Penemo iwe sii, mamudhaakana kudhawukomiu kaadhari." Kasiimpo o Yonatan apogaumo tee pande kenina ewangana sumai, "Maimo tapeneaka tee uoseaku, roonamo manga incia padhamo apasaraakaakea KAWASANA OPU i limana miana Israel."

13 Yonatan tee pande kenina ewangana tabeana apekangka tee limana tee aena to apene i bhawona pimpi i tampana posuna miana Filistin sumai; Yonatan moporikanana mopenena tee o pande kenina ewangana moosea i talikuna. Sakawana i posuna suludaduna miana Filistin, Yonatan asimbiakamo hancuna to manga suludadu modhaangiana i posu sumai, sainamo pande kenina ewangana apekamate manga suludadu mopadhana isimbina Yonatan. 14 I nuncana potimbea bhaa-bhaana, Yonatan tee pande kenina ewangana sumai apekamate kera-kera rua pulu mia i nuncana karidhona saparapa hektar.

15 Sumaimo amingkirimo manga miana Filistin modhaangiana i pokemaa, modhaangiana i tana lapa, bhari-bharia suludadu mojagani posu, tee manga rombongana parampo sumai. Kasiimpo dunia apepuumo akolendu tee bhari-bharia mia amingkirimo roonamo Aulataʼala mopasapona kamingkiri incia sumai.

16 Wakutuu incia sumai o mata-matana Raja Saul i Kota Gibea modhaangiana i lipu Binyamin akamata suludaduna Filistin apalaiaka karona i iapai-iapai. 17 Sumaimo Saul apogaumo tee tantara mopoosena tee incia, "Gagaria tee uparakisaaia, soomo saopea o kabharita." Sapadhana agagaria, garaaka o Yonatan tee pande kenina ewangana inda motokamatana.

18 Pogauna Saul tee Imamu Ahia, "Bhawamea iwe sii o Sorongana Pojanjiana KAWASANA OPU sumai mamudhaakana tamembali taabha i Aulataʼala opea bheipewauta ." (Wakutuu incia sumai Sorongana Pojanjiana KAWASANA OPU apoose tee miana Israel.)* 19 Maka wakutuuna apogau tee imamu sumai, kaheru i pokemaana suludaduna Filistin ajulumo kaogena, sabutuna o Saul apogau tee imamu sumai, "Bholimo."

20 Kasiimpo Saul tee manga tantarana aporomusaka tee amaju apesua i nuncana potimbea. Iwe sumai manga incia akamatea amaoge mpuu o kaheru i tanga-tangana suludaduna Filistin, roonamo manga incia apopekamate podho-podho manga incia. 21 Manga miana Ibrani momboorena i lipuna miana Filistin, tee mopadhana mopoosena tee suludaduna miana Filistin uka ambuli aposaangu pendua tee tantarana Israel to atulungi Saul tee Yonatan. 22 Manga miana Israel moopona i manga gununa lipuna Efraim arangomea ande o suludaduna Filistin apalaiakamo karona, sabutuna manga incia uka aose apajere manga suludaduna Filistin i nuncana potimbea. 23 Mboomo sumai o KAWASANA OPU apasalaamati miana Israel i eo incia sumai. I potimbea sumai manga miana Filistin amatalo tee atopajere sakawana alaloi i Kota Bet-Awen.

24 Maka i eo incia sumai o tantarana Israel anamisi kanarakaa, roonamo Saul padhamo aposumpa tee tantarana mboo sii, "Atotundamo o mia mokandena kinande ande indapo asoo matana eo, tee ande indapo kubalasiaka kapiina incaku i manga musuku!" Rampaakanamo sumai inda samia uka minaaka i tantarana Israel mokandena i eo incia sumai.

25 Kasiimpo manga incia akawamo i saangu koo tee apotibhaakamo golana uwani motirina i tana, 26 maka inda samia uka mobaranina to mokandena golana uwani incia sumai, roonamo amaeka tee katunda ibhoasakana Saul. 27 Maka o Yonatan inda amataua ande o amana padhamo aposumpa tee tantarana. Rampaakanamo sumai incia apaulumo katukona tee apalondoa i nuncana bhanuana uwani sumai kasiimpo apenamia, sabutuna ambulimo pendua o kakaana. 28 Kasiimpo dhaangia samia minaaka i tanga-tangana manga tantarana sumai mopogauna, "Amamu padhamo manga sumpa tee mpuu-mpuuna incana, pogauna, 'Atotundamo mia mokandena opeapo uka i eo sii.' Rampaakanamo sumai manga tantarana amalutemo."

29 Kasiimpo Yonatan alawani, "Amaku padhamo apanarakaa lipu sii. Kamatea, tapanamo kainawa o mataku sapadhana kupenami saidhe golana uwani sii. 30 Ntaranamo uka ande i eo sii o tantarana atoundaaka to akande giu mopadhana irampasi minaaka i musu, dhaanamo bheahanda abhari o miana Filistin momembalina ipekamate."

31 I eo incia sumai o miana Israel apekatalo miana Filistin sapadhana apotimbe minaaka i Mikhmas sakawana i Ayalon, tee manga tantarana amalutemo mpuu. 32 Rampaakanamo sumai manga incia apolopologomo to aala bara irampasi ipotibhaakana minaaka i musu, manga incia aala gulumana dumba, sapi tee manga anana sapi. Kasiimpo asumbelea i bhawona tana tee alausaka akande dagi dhaangiapo mokoraa sumai. 33 ✝Kasiimpo giu incia sumai akabarataakea i Saul mboo sii, "Kamatea, tantarata akodosa tee KAWASANA OPU roonamo akande dagi dhaangiapo mokoraa."

Lawanina Saul, "Ingkomiu inda uose parintana KAWASANA OPU! Padolea o bhatu ogena itu sii-sii uka." 34 Kasiimpo Saul apogau uka, "Lingkamo i tanga-tangana manga tantara sumai tee upogau tee manga incia mamudhaakana abhawea o sapi tee dumbana kasiimpo asumbelea tee akandea iwe sii. Pakawaakamea o parinta incia sii to bhari-bharia tantarata, 'Bhawamea o binata irampasi sumai i bhawona bhatu sii mamudhaakana usumbelea tee upalemboa o raana. Bholi ukodosa tee KAWASANA OPU rampaakanamo ukande dagi dhaangiapo mokoraa.' "

Sumaimo i malo incia sumai bhari-bharia tantara abhawa sapi umanena tee asumbelea iwe sumai. 35 Kasiimpo Saul abhangu saangu tampana tunuana kurubani to KAWASANA OPU, siitumo tampana tunuana kurubani mobhaa-bhaana ibhanguna to KAWASANA OPU.

36 Kasiimpo Saul apogau uka, "Maimo malo sii talingkaaka tapajere miana Filistin tee tarampasia sakawana raneeo, bholi dhaangia samia uka iundaakata adhadhi."

Lawanina manga mia sumai, "Pewaumea opea iabhimu momalapena."

Maka o imamu apogau, "Maimo taabhaakea porikana i Aulataʼala."

37 Kasiimpo Saul aabha i Aulataʼala mamudhaakana amatau opea ipeeluna, "Amembali iaku kulingka kupajere suludaduna Filistin? Buaka manga incia bheupasaraakaakea i limana miana Israel?" Maka i eo incia sumai o Aulataʼala inda alawania.

38 Kasiimpo Saul apogau tee manga kapalana tantarana sumai, "Maimo iwe sii bhari-bharikomiu tee uparakisaamea o dosa opea mopadhana ipewauta eo sii. 39 Iaku kuposumpa to sarona KAWASANA OPU modhadhi mopasalaamatina miana Israel, moomini o dosa sumai apewaua Yonatan, incia dhaanamo atohukumu mate." Maka inda samia uka minaaka i tanga-tangana tantarana sumai mobaranina molawania.

40 Kasiimpo Saul apogau tee bhari-bharia tantarana Israel, "Ingkomiu bhari-bharikomiu ukakaro i weta iwe sumai, iaku tee Yonatan kukakaro i weta iwe sii."

Lawanina tantara sumai, "Pewaumea opea iabhimu momalapena."

41 ✝Pogauna Saul, "E KAWASANA OPU, Aulataʼala isombana miana Israel, apokia inda ulawaniaku? Ande iaku tee Yonatan dhaangia tee kasalahamami mangasusuakamo tee Urim. Maka ande o tantaraku mosalana mangasusuakamo tee Tumim." Garaaka o Saul tee Yonatan ikangkanaina undi,*). Moomini o limana maanusia moʼundia, maka o Kawasana Opu moalana kambotu (kamata Aar. 16:33 ). tee o tantarana inda asala. 42 Pogauna Saul, "Undiakumo tee Yonatan." Kasiimpo o Yonatan atomambotuaka mosalana.

43 Saul apogau tee Yonatan, "Paumbaakaaku opea mopadhana ipewaumu." Jadi Yonatan alawani, "Inciamo iaku padhamo kupenami saidhe o golana uwani ialaku tee lolona katukoku sii, tee mboo sumai iaku kusiapu kutohukumu mate rampaakanamo pewauku sumai ."

44 Pogauna Saul, "Yonatan, ingkoo tabeana umate, tee o Aulataʼala bheahobuti inyawaku ande inda utohukumu mate rampaakanamo dosamu sumai!"

45 Maka o tantara sumai apogau tee Saul, "Buaka o Yonatan tabeana amate, garaaka incia padhamo apewau kasalaamati momaoge to miana Israel? Inda! Ingkami taposumpa to sarona KAWASANA OPU modhadhi mopasalaamatina miana Israel, ande i eo sii incia inda bheakailanga satake uka o bulua minaaka i bhaana, roonamo tee katulungina Aulataʼala incia amembali akana minaaka i potimbea i eo sii." Mboomo sumai o Yonatan apasalaamatia tantarana minaaka i kahukumu mate.

46 Saul auntomo apajere suludaduna Filistin, tee o suludaduna Filistin uka ambulimo i mbooresana.

47 Samembalina rajana Israel, Saul apotimbe apoewangi tee bhari-bharia musuna Israel i sagala giuna tampa: apotimbe tee miana Moab, miana Amon, miana Edom, manga raja mominaakana i lipuna Zoba [sala saangu kota i Tana Suria], tee miana Filistin. I iapaipo uka apotimbe incia sadia akana. 48 Incia apotimbe tee kabaranina tee apekatalo miana Amalek, tee arambasaka miana Israel minaaka kuasana manga mia morampoa i piamo itu.

49 Siimo saro-sarona anana Saul umane: Yonatan, Yiswi, tee Malkisua. Sainamo sarona rua miaia anana bhawine siitumo Merab momembalina tumpe tee o Mikhal momembalina kaepu. 50 Sarona bhawinena Saul siitumo Ahinoam binti Ahimaas, tee o sarona kapalana tantarana siitumo Abner bin Ner, tee o Ner sii o pinoamana Saul. 51 Kis amana Saul, tee Ner amana Abner; manga incia podho anana Abiel.

52 Potimbeana tee suludaduna Filistin sumai anamisia Saul saʼumurua dhadhina. Rampaakanamo sumai, ande o Raja Saul akamata samia umane mangura momakaana tee mobaranina, sumaimo mia incia sumai alausaka aalea to apamembalia tantarana.