1 Sapadhaana sumai Saul apogaumo tee Yonatan o anana tee uka bhari-bharia pagawena, ande Daud tabeana atopekamate. Maka o Yonatan amaasiaka mpuu Daud. 2 Rampaakanamo sumai o Yonatan apogau tee Daud, pogauna, "Amaku o Saul gauna apekamateko, jadi upengkaanakamo. Naile saeona uopomo i saangu tampa morahasia tee umbooremo iwe sumai. 3 Iaku bhekulimba minaaka i kota kupobhawa tee amaku to talingka i tana lapa i tampana opoamu sumai. Iaku bhekuabha i amaku pokaiana tee ingkoo, tee opea ipogauakamami sumai dhaampomo kupaumbaakako."

4 Kasiimpo Yonatan apogau tee Saul pokaina tee giu malape mopadhana ipewauna Daud, pogauna, "Rajaku, bholi upewau dosa tee uhukumu Daud, roonamo incia inda apewau dosa tee ingkoo, tee incia abharimo mpuu o jasana to ingkoo. 5 Daud padhamo ataa inyawana wakutuuna apaewa Goliat miana Filistin sumai to apotimbe sakawana apekamatea, sabutuna KAWASANA OPU adhawuakea kamangantalo momaoge to bhari-bharia uumatina Israel. Wakutuuna ukamatea o kajadia incia sumai ingkoo ukaunde-unde. Apokia uka ingkoo gaumu bheupewau dosa tee mia inda mosala mboomo Daud tee upekamatea inda tee sababuna?"

6 Saul aperangoi opea ipogauakana Yonatan, tee incia aposumpa, "Iaku kuposumpa to sarona KAWASANA OPU modhadhi, iaku inda bhekupekamate Daud."

7 Sapadhana sumai o Yonatan akembamo Daud, tee apetulatulaakea bhari-bharia opea mopadhana ipogauakana tee Saul i saao. Kasiimpo Yonatan abhawamo Daud to apoaro tee Saul, tee o Daud ambulimo alaiani Saul mboomo mobhaa-bhaana.

8 Kasiimpo adhaangiamo uka o potimbea tee manga tantarana Filistin, jadi o Daud apenduamo uka to akapalai manga suludaduna i nuncana potimbea sii, tee manga incia abhari mpuu apekamate miana Filistin sampe o bhilaana manga tantarana Filistin inda motopekamatena apalaiaka karona.

9 Maka o rohi madhaki* ilambokona KAWASANA OPU aumba pendua to akuasai Saul wakutuuna incia tangasaana auncura i bhanuana tee pandangana i limana. Wakutuu incia sumai o Daud tangasaana amagasiaaka kecapina, 10 saanampuu o Saul aʼusahamo mamudhaakana o Daud apatongkeakea tee pandangana i rindi. Maka o Daud amembali apasala sabutuna o pandangana Saul soo akangkanai rindi tee i malo incia sumai uka o Daud apalaiaka karona.

11 ✝Kasiimpo Saul atumpu pia mia o potumpuana to alukutiaka Daud i bhanuana mamudhaakana atopekamate wakutuuna saeona. Maka o Mikhal o bhawinena Daud, apaumbaia mboo sii, "Ande inda upalai malo sii, dhaanamo naile saeona ingkoo bheutopekamate." 12 Jadi Daud apasapoa Mikhal alaloi bhalo-bhalo tee apalaiaka karona. 13 Sapadhana sumai o Mikhal aalamo saangu barahala isombana to ajagani manga miana i bhanua isarongiaka "terafim" tee apadholea i kolemana Daud, tee i weta i bhaana adhikaakea buluna bhembe kasiimpo atutubhiakea tee kakumu.

14 Wakutuuna Saul alamboko manga potumpuana to arako Daud, Mikhal apogau, "Daud amapii."

15 Kasiimpo Saul apendua alamboko manga potumpuana sumai to akamataaka Daud, pogauna, "Sodhamea o kolemana tee ubhawea iwe sii mamudhaakana kupekamatea." 16 Maka wakutuuna manga potumpuana sumai apesua, garaaka motokamatana i kolema sumai tangkanamo terafim tee buluna bhembe modhaangiana i weta i bhaana.

17 Saul apogau tee Mikhal, "Apokia utipuaku? Apokia urambasaka musuku to apalaiaka karona?"

Lawanina Mikhal i Saul, "Incia apogau tee iaku, 'Taroakaakumo kulingkaaka. Buaka tabeana kupekamateko?' "

18 Wakutuuna Daud apalaiaka karona, incia alingka i bhanuana Nabii Samuel i Kota Rama tee apaumbaakea bhari-bharia opea mopadhana ipewauna Raja Saul tee incia. Kasiimpo Daud alingka apoose tee Samuel tee amboore i Nayot. 19 Maka o Saul dhaangia tee mopaumbaakea ande o Daud dhaangia i Nayot i saripina Kota Rama. 20 Rampaakanamo sumai o Saul alambokomo uka manga potumpuana to arako Daud. Maka wakutuuna manga potumpuana Saul sumai akamata sakolompo nabii ikapalaina Samuel tangasaana apakawaaka kasameana Aulataʼala, saanampuu asapomo Rohina Aulataʼala asampaiki manga incia, sabutuna manga potumpuana Saul sumai uka apakawaaka kasameana Aulataʼala mboomo manga nabii sumai. 21 Wakutuuna o lele incia sumai arangoa Saul, incia alambokomo uka manga potumpuana mosagaanana, maka manga incia uka apepuumo apakawaaka kasameana Aulataʼala mboomo manga nabii. Sakawana talu mpearo o Saul alamboko potumpuana, maka manga incia uka asadhaadhaa apakawaaka kasameana Aulataʼala mboomo manga nabii sumai. 22 Sumaimo Saul o karona molingkana i Kota Rama. Sakawana i sumu ogena i Sekhu, incia aabhamo, "Iapai o Nabii Samuel tee Daud?"

Lawanina manga mia iwe sumai, "Dhaangia i Nayot i saripina Kota Rama."

23 Jadi Raja Saul alingkamo iwe sumai, i Nayot i saripina Kota Rama, maka incia uka apesuaikia Rohina Aulataʼala, sabutuna i nuncana lingkaana sumai incia apakawaaka kasameana Aulataʼala sakaaratea dhala sakawana i Nayot. 24 ✝Sakawana iwe sumai o Saul arambasakamo pakeana tee apakawaaka kasameana Aulataʼala tee akakee-kee i aroana Samuel, kasiimpo akotibu i tana tee akalealea saeoa tee samaloa. Rampaakanamo sumai o mia apogau, "Buaka o Saul uka amembali nabii?"