1 Pogauna Samuel sumai arangoa bhari-bharia miana Israel.

Saangu wakutuu, miana Israel alingka apotimbe tee miana Filistin. Miana Israel apakaro kemana i saripina Eben-Haezer, sainamo miana Filistin apakaro kemana i Afek. 2 Kasiimpo miana Filistin apasiapumo suludaduna to apotimbeaka tee manga miana Israel. Wakutuuna tangasaana potimbea sumai, miana Israel amatalomo, tee abhari o suludaduna momatena kera-kera pata rewu mia i nuncana potimbea sumai. 3 Wakutuuna manga suludaduna sumai ambuli i kemana, manga mancuanana miana Israel apogaumo, "Apokia i eo sii o KAWASANA OPU mangataroaka tamatalo minaaka i miana Filistin? Maimo tabhawaaka Sorongana Pojanjiana KAWASANA OPU minaaka i Silo. Ande o soronga sumai apobhawa tee ingkita, ingkita dhaanamo tasalaamati minaaka i manga musuta."

4 ✝Kasiimpo manga incia atumpu pia mia o suludaduna to alingkaaka i Silo tee aala Sorongana Pojanjiana KAWASANA OPUNA Aulataʼalana saangua alamu modhaangiana i bhawona manga kerub.* Rua miaia anana Eli, siitumo Hofni tee Pinehas aose manga incia abhawa Sorongana Pojanjiana KAWASANA OPU sumai i pokemaa.

5 Sakawana Sorongana Pojanjiana KAWASANA OPU sumai i pokemaana miana Israel, manga incia asambo-sambomo tee apekee momakaa mpuu, sabutuna o dunia akolendu. 6 Wakutuuna o miana Filistin arango suarana sambo-sambo sumai, manga incia apogaumo, "Opea isambo-samboakana manga miana Ibrani* sumai?"

Kasiimpo manga incia amataumea, ande o Sorongana Pojanjiana KAWASANA OPU akawamo i pokemaana manga miana Israel. 7 Manga miana Filistin amaekamo tee apogau, "Dhaangia tee manga dewana miana Israel moumbana i pokemaana manga incia!" Manga incia uka apogau, "Tacilakamo roonamo indapo aperna tanamisi giu mboo sii. 8 Tacilakamo! Incema bhemomangatulungina minaaka i limana manga dewa momakaa sii? Manga dewamo incia sumai mopadhana mopekamatena miana Mesir tee sagala giuna balaa i tana matuu i piamo itu. 9 E miana Filistin, pekatangkea o ngangarandata tee tabaranimo tapotimbe mboomo samia umane, ande inda ingkita bhetamembali bhatuana miana Ibrani, mboomo i piamo itu manga incia amembali bhatuata. Rampaakanamo sumai maimo tapotimbeaka mboomo samia hiri mobarani!"

10 Kasiimpo apotimbemo miana Filistin, tee amatalomo miana Israel, sabutuna manga incia apalaiakamo karona i kemana samia-samia. Amaoge mpuu o katalona miana Israel, siitumo talu pulu rewu o tantarana momatena i eo incia sumai. 11 Inda soo incia sumai, maka o Sorongana Pojanjiana KAWASANA OPU uka atorampasi, tee uka rua miaia anana Eli siitumo Hofni tee Pinehas atopekamate.

12 I eo incia sumai dhaangia samia o suludadu mominaakana i suku Binyamin mopalaiakana karona minaaka i tampana potimbea tee akawa i Silo. Pakeana amabhenci-bhenci tee adhikaakea ngawuna tana i bhaana. 13 Wakutuuna akawa i Silo, Eli tangasaana auncura i kurusii i bhiwina dhala aantagi lelena potimbea sumai. Ngangarandana alilaho rampaakanamo Sorongana Pojanjiana KAWASANA OPU sumai. Wakutuuna suludadu sumai apesua i nuncana kota tee apetulatulaaka lele madhaki sumai, bhari-bharia miana kota apekee tee suara makaa.

14 Wakutuuna Eli arango mopekeena sumai, incia aabhamo, "Karobhona opea sumai?"

Kasiimpo mia incia sumai alausakamo aumbati Eli to apaumbaakea o kajadia opea modhaangiana iwe sumai. 15 Wakutuu incia sumai umuruna Eli sio pulu walu taomo, tee o matana amarawumo sabutuna incia indamo amembali apokamata.

16 Pogauna mia incia sumai tee Eli, "Iaku siimpo kuumba minaaka i tampana potimbea. Eo sii iaku kupalaiaka karoku minaaka i tampana potimbea sumai."

Pogauna Eli, "E anaku, tuaapa o kadhaangiana potimbea sumai?"

17 Mobhawana lele sumai alawani, "Miana Israel apalaiaka karona minaaka i suludaduna Filistin, amaoge mpuu o katalomami tee tanarakaa mpuu i nuncana potimbea sumai. Rua miaia anamu Hofni tee Pinehas uka amatemo, tee o Sorongana Pojanjiana Kawasana Opu arampasimea musu."

18 Wakutuuna mia incia sumai apetulatulaaka opea momembalina tee Sorongana Pojanjiana KAWASANA OPU, Eli akotibu akambara-mbara minaaka i kurusiina i saripina bhambana lawa sumai. Laena bhorokona amakatu, sabutuna o Eli alausaka amate roonamo incia amaoge o bukuna tee amancuanamo. Eli akapalai miana Israel kangengena pata pulu tao.

19 Wakutuu incia sumai o ana maniana Eli, siitumo bhawinena Pinehas tangasaana abhawa-bhawa tee amakasumo akoana. Wakutuuna arango lelena Sorongana Pojanjiana KAWASANA OPU atorampasi, tee uka o umanena tee maniana amatemo, incia anamisimo kapii tee akapengke-pengkemo, tee inda amangenge sapadhana sumai incia akoanamo roonamo incia aumbatimea kapiina mia mokoana. Kasiimpo incia amatemo. 20 Wakutuuna ajalana amakasumo, apogaumo manga bhawine motulungia, "Bholi umaeka, roonamo ingkoo padhamo upalaahiri samia ana umane!" Maka incia inda alawani tee inda afaduliakea ipogauakana manga incia.

21 Bhawinena Pinehas adhawuakea saro Ikabod to anana sumai, roonamo, "Kamuliangina Aulataʼala ailamo minaaka i Israel." Incia apogau mboo sumai roonamo Sorongana Pojanjiana KAWASANA OPU atorampasimo, tee rampaakanamo matena maniana tee umanena uka. 22 Pogauna, "Kamuliangina Aulataʼala ailamo minaaka i Israel roonamo Sorongana Pojanjiana KAWASANA OPU atorampasimo."