1 ✝Saangu wakutuu o Nabii Samuel apogau tee Raja Saul, "KAWASANA OPU alambokoaku to kuminakiko umembaliaka raja to uumatina, siitumo Israel. Rampaakanamo sumai uperangoimea o firimanina KAWASANA OPU. 2 ✝Mboo siimo firimanina KAWASANA OPU Aulataʼalana saangua alamu, 'Iaku bhekubalasi opea ipewauna miana Amalek to miana Israel, roonamo miana Amalek ajoli-joli miana Israel salimbana minaaka i Tana Mesir. 3 Jadi sii-sii ulingkamo uhumbuni miana Amalek tee upahancuru bhari-bharia pewauana. Bholi tee kaasina incamiu tee miana Amalek, maka upekamatemea bhari-bharia umane tee bhawine, anaana tee manga anaana dhaangiapo modudu, sapi tee dumba, unta tee keledaina.' "

4 Kasiimpo Saul aromusaka tantarana tee agagaria i Kota Telaim. Minaaka i Israel kabharina manga incia modhalana ae dhaangia rua atu rewu mia tee minaaka i Yehuda o kabharina dhaangia sapulu rewu mia. 5 Sapadhana incia sumai o Saul alingkamo i kotana miana Amalek tee atumpu tantarana to apentaa musuna i tambena mbolonga. 6 Saul uka alamboko kasameana to audhaniaka manga miana Keni,* pogauna, "Lingkamo tee ubholimea o miana Amalek sumai, mamudhaakana inda kupahancurukomiu tee manga incia, roonamo i piamo itu opu-opuamiu apomalape tee miana Israel wakutuuna alimba minaaka i Mesir." Sumaimo miana Keni alingkamo minaaka i iwe sumai.

7 Kasiimpo Saul apotimbe tee miana Amalek, tee apekataloa pepuu minaaka i Kota Hawila sakawana i Kota Syur i weta i timbuna Mesir. 8 Bhari-bharia raʼeatina Amalek apekamateakea tee matana hancu, sainamo Agag rajana miana Amalek arakoa akadhadhi-dhadhi. 9 Raja Agag apasalaamatia Saul tee tantarana. Manga incia uka inda apekamate manga gulumana dumba tee sapi momalapena bhanguna, tee inda uka apekamate tee apahancuru manga anana dumba tee manga bara mokoharagaa, maka tangkanamo apahancuru manga kadhambaaka momadhakina bhanguna tee bara inda mokoharagaa.

10 Kasiimpo asapomo firimanina KAWASANA OPU to Samuel mboo sii, 11 "Iaku kusoso mpuu kuangka Saul to kupamembalia raja roonamo incia abholiaku tee inda aose parintaku." Samuel aʼamara, sabutuna incia samaloa agora i KAWASANA OPU.

12 Samainawana, dhaangiapo saeona mpuu o Samuel abhangumo to apokawaaka Saul, maka dhaangia mopaumbaia mboo sii, "Saul alingkamo i Kota Karmel tee apakaro saangu tugu kaudhania to karona kasiimpo incia alausaka aporope i Gilgal."

13 Wakutuuna Samuel apokawa tee Saul, apogaumo Saul, "Maasangia o KAWASANA OPU abarakatiko! Iaku padhamo kuose firimanina KAWASANA OPU."

14 Maka o Samuel aabha, "Ande mboo sumai, apokia kurango gulumana dumba mokomee tee gulumana sapi mokomburu iwe sii?"

15 Lawanina Saul, "Bhari-bharia sumai o binata mopadhana irampasi minaaka i miana Amalek, roonamo tantaraku apasalaamati gulumana dumba tee gulumana sapi momalapena bhanguna to apasombaakea apamembalia kurubani i aroana KAWASANA OPU Aulataʼalamu. Maka o bhilaana padhamo tapabinasea."

16 Sarangona incia sumai o Samuel apogaumo tee Saul, "Untomo upogau! Iaku bhekupaumbaakako opea mopadhana ifirimaniakana KAWASANA OPU i malo."

Saul alawani, "Paumbaakaakumo."

17 Pogauna Samuel, "I piamo itu ingkoo uabhi karomu inda tee maʼanana, maka sii-sii ingkoo umembalimo kapala to manga sukuna miana Israel, tee o KAWASANA OPU padhamo alantiko umembali rajana miana Israel, 18 tee o KAWASANA OPU aparintaakako tee afirimani, 'Lingkamo, pabinasea manga miana Amalek mokodosa sumai, tee upotimbemo ubhali manga incia sakawana abinasa.' 19 Pokia ingkoo inda utaʼati parintana KAWASANA OPU, sampe uala bara irampasi tee upewau giu momadhaki i matana KAWASANA OPU?"

20 Saul alawani Samuel, "Iaku padhamo kutaʼati parintana KAWASANA OPU tee kupewau opea mopadhana isusuakana. Iaku kubhawa Agag rajana Amalek iwe sii, sainamo bhari-bharia raʼeatina padhamo kupekamatea. 21 Maka minaaka i bara irampasi sumai, tantaraku inda apekamate bhari-bharia binata kadhambaaka. Manga incia aala gulumana dumba tee gulumana sapi momalapena bhanguna mopadhana ihususuaka to apasombaakea i KAWASANA OPUNA Aulataʼalamu i Gilgal."

22 Lawanina Samuel,

"Buaka o KAWASANA OPU alabhi amaasiaka kurubani tunua tee kurubani isumbele

tee tataʼati parintana?

Satotuuna tataʼati parintana KAWASANA OPU alabhi o kalapena minaaka i kurubani isumbele,

tee taperangoi pogauna alabhi o kalapena minaaka i tabhana dumba umane.

23 Roonamo kadorohaka apokana mboomo dosana mia mopekilala,

tee o ngangaranda mosombo apokana o kadhakina mboomo mia mosombana barahala tee terafim.*

Rampaakanamo ingkoo umendeu utarima firimanina KAWASANA OPU

sumaimo Incia uka amendeumo atarimako umembali raja."

24 Sarangona pogauna Samuel sumai, Saul apogaumo, "Iaku kukodosamo roonamo indamo kutaʼati tee parintana KAWASANA OPU tee pogaumu. Iaku kumaeka tee tantaraku sabutuna kuose pogauna manga incia. 25 Maka sii-sii kuemani mpuu uʼamponia o dosaku tee umbulimo upoose tee iaku mamudhaakana amembali kusomba KAWASANA OPU."

26 Samuel alawani Saul, "Iaku kumendeumo kupoose tee ingkoo roonamo inda uose firimanina KAWASANA OPU, tee o KAWASANA OPU uka amendeu atarimako to umembali rajana miana Israel."

27 Wakutuuna Samuel bhealingka, Saul akeniakamo tapana jubana Samuel, sabutuna o jubana amabhenci. 28 Sabutuna Samuel apogaumo, "Apokana mboomo ingkoo ukeniaka tapana jubaku sii sabutuna amabhenci, mboomo itu uka o KAWASANA OPU i eo sii ahobuti kuasamu minaaka i pamarintamu tee adhawuakea to mia mosagaanana molabhina kalapena minaaka i ingkoo. 29 KAWASANA OPU o Aulataʼala Momulia isombana miana Israel inda agau-gau tee inda abhaliia o fikirina roonamo Incia mencuana maanusia."

30 Lawanina Saul, "Iaku kukodosamo, maka ande amembali kuemani mamudhaakana uhoromatiaku i aroana manga mancuanana lipuku tee i aroana miana Israel. Mbulimo pendua upoose tee iaku mamudhaakana amembali kuʼibaadati i KAWASANA OPUNA Aulataʼalamu." 31 Jadi o Samuel ambulimo pendua apoose tee Saul, tee o Saul uka asombamo KAWASANA OPU.

32 Sapadhana sumai o Samuel apogaumo, "Bhawea iwe sii o rajana miana Amalek sumai." Kasiimpo aumbamo o Agag tee akaunde-unde* roonamo incia afikiria, "Balaa imateaka alapamo."

33 Kasiimpo Samuel apogau,

"Apokana mboomo hancumu padhamo apamembali manga bhawine akailanga anana,

mboomo sumai uka tee inamu; sii-sii incia bheamembali bhawine mokailangana anana."

Kasiimpo Samuel atata-tata Agag i aroana KAWASANA OPU i Gilgal.

34 Sapadhana sumai o Samuel ambulimo i Kota Rama, sainamo Saul ambuli i bhanuana i Kota Gibea. 35 Sampe amate o Samuel indamo aperna apokawa tee Saul, roonamo Samuel amaporo mpuu incana tee Saul. KAWASANA OPU uka asoso roonamo padhamo aangka Saul to apamembalia rajana miana Israel.