1 SAMUEL 21

Daud i Kota Nob

1 ✝ 21:1-6 Mat. 12:3-4; Mrk. 2:25-26; Luk. 6:3. Kasiimpo o Daud alingkamo i Kota Nob to apokawa tee Imamu Ahimelekh. Wakutuuna Ahimelekh apepago Daud, incia arengkuaka kaeka tee aabha, "Apokia uumba iwe sii samia-miamu tee inda samia uka mopoosena tee ingkoo?"

2 Daud alawani Imamu Ahimelekh, "Raja adhawuakaaku saangu tugasi, maka incia apogau, 'Bholi dhaangia o mia momatauna opea ipatugasiakaku to ingkoo sii.' Rampaakanamo sumai manga suludaduku padhamo kutumpua to aantagiaku i saangu tampa to pokawaamami. 3 Maka ande amembali kuabhapo, dhaangia tee giu momembalina ikande iwe sii? Dhawuakupo lima angu roti atawa opeapo uka momembalina ikande."

4 Pogauna Imamu Ahimelekh, "Inda dhaangia o roti biasa, maka modhaangiana tangkanamo rotina pasombaa.*21:4 roti pasombaa: Roti pasombaa sumai adhikaia i meja to apasombaakea i aroana Tampa Momangkilo i nuncana Kemana Aulataʼala. Roti incia sii asusuaka ande manga mia tangasaana i aroana Aulataʼala. Kananeana tangkanamo manga imamu momembalina mokandena roti incia sii. Kamata Im. 24:5-7 Ingkomiu amembali ualea tee ukande roti incia sumai somanamo ingkomiu inda siimpo padha ukole tee bhawine."

5 Daud alawani Imamu Ahimelekh, "Atantumo ingkami inda tatoundaaka takole tee bhawine mboomo kananeamami ande talimba tatugasi i potimbea mamudhaakana tasadhaadhaa tamangkilo moomini tangkanamo soo tugasi biasa. Ntaranamo uka i eo sii ingkami takarajaa tugasi mohususu." 6 ✝21:6 Im. 24:5-9. Rampaakanamo sumai, Imamu Ahimelekh adhawuakamo roti mopadhana ipasombaaka sumai to Daud, roonamo inda dhaangia o roti mosagaanana iwe sumai tee tangkanamo soo roti pasombaa siimpo mopadhana iangka minaaka i tampana pasombaa to KAWASANA OPU tee motobholosiakana tee roti mobhaau.

7 I eo incia sumai dhaangia samia o pagawena Saul moumbana iwe sumai to aose haroaana pasombaana KAWASANA OPU mokosaroakana Do’eg; incia o miana Edom mokapalaina manga gembalana Saul.

8 Daud apogaumo tee Imamu Ahimelekh, "Dhaangia tee pandanga atawa o hancumu momembalina ipakeku? Iaku kukaago-ago kupotibhaaka tugasi hususu minaaka i raja, sabutuna inda tee wakutuuku to kubhawa pandanga tee hancu atawa o ewanga mosagaanana uka."

9 ✝ 21:9 1Sam. 17:51; 17:54. Lawanina Imamu Ahimelekh, "Iwe sii modhaangiana tangkanamo hancuna Goliat miana Filistin mopadhana ipekamatemu i Mbolongana Tarbantin. Hancu incia sumai kutangeakea kae tee kudhikaia i talikuna bhaju efod. Ande upeelua, kualaakako, roonamo inda dhaangia o ewanga mosagaanana tangkanamo incia sumai."

Pogauna Daud, "Hancu incia itu inda dhaangia o sampodhimbana i saangua lipu sii; dhawuakaakumo!"

Daud i Kota Gat

10 I eo incia sumai uka o Daud apalaiaka karona minaaka i Saul, tee akawa i Tana Filistin to apokawa tee Akhis rajana Kota Gat. 11 ✝21:11 1Sam. 18:7; 29:5. Manga pagawena Akhis apogau tee raja mboo sii, "Mencuana incia buaka mokosaroakana Daud rajana lipu incia sumai? Mencuana pokaiana tee incia buaka mbakana manga incia alagu-laguakea tee apoose amanari mboo sii,

"Saul apekamate rewu-rewuna mia,

maka o Daud pulu-puluna rewu mia."

12 ✝ 21:12 Zab. 56:1. Daud afikiriakea torotorosu o pogau incia sumai, sabutuna incia amaeka mpuu tee Raja Akhis. 13 ✝21:13 Zab. 34:1. Rampaakanamo sumai o Daud apara-para amagila i aroana manga incia. Daud abhori-bhori bhambana lawa tee ataroakea o wiluna atiri i jangkuna.

14 Kasiimpo o Akhis apogau tee manga pagawena, "Buaka inda ukamatea o mia incia sumai amagila? Apokia ingkomiu ubhawea i aroaku? 15 Abharimo mpuu o mia magila iwe sii. Indamo afaraluu ubhawea iwe sii to apewauaka kagilana i aroaku sii! Tee bholi utaroakea apesua i nuncana bhanuaku!"