1 Talu eo sapadhana sumai, wakutuuna Daud tee manga ana buana akawa i Kota Ziklag, garaaka o miana Amalek padhamo ahumbuni Tana Negeb tee Ziklag. Manga incia apekatalo Ziklag tee atunua sakawana atopadha. 2 Manga incia uka ataangi manga bhawine tee bhari-bharia mia modhaangiana iwe sumai, siitumo minaaka i anaana sakawana i mancuana, maka inda samia uka ipekamatena. Bhari-bharia mia itaangina sumai abhawea apoose tee manga incia wakutuuna apalausaka lingkaana.

3 Wakutuuna Daud tee manga ana buana akawa i kota incia sumai, manga incia akamatamo saangua kota sumai amangaumo. Bhawinena tee anana manga incia, malape umane atawa o bhawine atotaangimo. 4 Kasiimpo Daud tee manga ana buana mopobhawana tee incia atangimo pekakaa sampe akaʼusuʼusu. 5 ✝Rua miaia bhawinena Daud atotaangi uka, siitumo Ahinoam miana Yizreel tee Abigail iaiarona Nabal miana Karmel sumai. 6 Manga ana buana Daud anarakaamo mpuu roonamo akailanga bhawinena tee manga anana manga incia. Rampaakanamo sumai manga incia ahaejati mamudhaakana o Daud atudhaakea tee bhatu. Tee mboo sumai o Daud adhaangia i nuncana karasai momaoge, maka o KAWASANA OPU apendua to apekatangkaaka ngangarandana Daud.

7 ✝Kasiimpo apogaumo o Daud tee Imamu Abyatar bin Ahimelekh, "Bhawaakaaku bhaju efod iwe sii." Kasiimpo Abyatar abhawaakamea o bhaju efodna sumai. 8 Kasiimpo Daud aabha i KAWASANA OPU pokaiana tee opea tabeana bheipewauna, "Buaka manga gorombola sumai tabeana kupajerea? Buaka manga incia amembali kupotibhaakea?"

Lawanina KAWASANA OPU, "Umbe pajeremea, roonamo manga incia amembali ututunia tee amembaliaka upabebasi manga mia mototaangi."

9 Sumaimo o Daud tee nama atu mia ana buana apajeremo manga gorombola sumai. Maka wakutuuna manga incia akawa i bhiwina Umala Besor, dhaangia rua atu mia minaaka i manga ana buana indamo amembali apalausaka lingkaana sabutuna manga incia ambooremo iwe sumai roonamo amangulemo mpuu. 10 Maka o Daud tee pata atu mia ana buana mosagaanana atorotorosu apalausaka lingkaana minaaka i Umala Besor to apajereaka manga gorombola sumai.

11 I nuncana lingkaana manga incia apokawamo tee samia ana umane mominaakana i Mesir i saangu tana lapa. Sapadhana sumai, ana umane sii abhawamea i aroana Daud kasiimpo adhawuakea roti to akandea tee adhawuakea uka o uwe isumpu, 12 tee adhawuakea uka satumpo hole-holena ara tee rua kance bhakena angguru matuu. Sapadhana akande, incia amatangkamo pendua o bukuna roonamo dhaangiamo talu eo talu malo inda akande tee asumpu.

13 Kasiimpo Daud aabhaki ana umane sumai, "Miana opea ingkoo sii tee incema o opumu?"

Lawanina, "Iaku o ana umane mangura mominaakana i Mesir. Iaku o bhatuana miana Amalek. Maka o opuku abholiaku talu eo molapana itu roonamo kumapii. 14 Talu eo molapana itu ingkami padhamo tahumbuni tampana mbooresana miana Kreti i Tana Negeb, kasiimpo i lipu tampana mbooresana miana Yehuda i Tana Negeb, tee uka i tampana mbooresana siwuluna Kaleb i Tana Negeb. Ingkami uka padhamo tahumbuni tee tatunu saangua Kota Ziklag."

15 Daud aabhamo uka pendua, "Uunda ususuakaaku dhala to taporopeaka i tampana manga gorombola sumai?"

Lawanina, "Umbe, maka somanamo uposumpapo tee sarona KAWASANA OPU ande ingkoo inda bheupekamateaku tee uka inda bheupasaraakaaku i opuku."

16 Daud uka asatujumo, sabutuna o Daud tee ana buana aʼantaramea ana umane mominaakana i Mesir sumai i tampana gorombolana miana Amalek. Manga miana Amalek sumai apontalesaka tee tangasaana akokariaa akande tee asumpu roonamo manga incia abhari apotibhaaka bara irampasina minaaka i lipuna miana Filistin tee i Tana Yehuda. 17 Kasiimpo Daud tee manga ana buana ahumbuni manga miana Amalek sii, minaaka i raneeo sakawana asoo matana eo. Inda dhaangia samia uka minaaka i gorombola sumai mosalaamatina, maka dhaangia pata atu mia ana umane mangura mopalaiakana karona tee asawiki untana. 18 Daud aalea pendua bhari-bharia giu irampasina miana Amalek sumai, mboo sumai uka tee rua miaia bhawinena. 19 Inda dhaangia mokurana, minaaka i anaana maidhiidhi sakawana i mancuana, malape o ana umane atawa o bhawine. Jadi o Daud amembali aala tee apambuli pendua opeapo uka mopadhana irampasina manga gorombola sumai. 20 Daud uka arampasi bhari-bharia gulumana bhembe tee sapina miana Amalek. Kasiimpo manga kadhambaaka sumai awulua i aroana gulumana binata mosagaanana, tee apogau, "Siimo dhawuna Daud."

21 Sapadhana sumai o Daud ambulimo pendua i tampana rua atu mia ana buana momangulena moosea tee ibholina i bhiwina Umala Besor sumai. Manga incia alingkamo to apepago Daud tee ana buana, tee o Daud asarimo manga incia to aabhaaka kadhaangiana manga incia. 22 Maka dhaangia pia mia o ana buana Daud sii momadhakina feʼelina tee momadhakina pemingkuina, manga incia apogau, "Manga mia incia sii inda alingka apoose tee ingkita, jadi manga incia inda tee hakuna to apotibhaaka opeapo uka minaaka i bara irampasita pendua sii. Manga incia tangkanamo soo amembali aala bhawinena tee anana samia-samia kasiimpo alingka."

23 Maka o Daud alawani, "E manga witinaiku, bholi upewau mboo itu tee opea mopadhana irahumatiakana KAWASANA OPU to ingkita! Roonamo Incia padhamo mangajagani tee apasaraakaakea i limata o gorombola mangahumbunina sumai. 24 Jadi bholi dhaangia samia uka mosatujuina giu incia sumai! Bhari-bharikita bhetapotibhaaka dhawu mopokanana kabharina. Manga suludadu momboorena to mojaganina manga bara tabeana apotibhaaka uka dhawu mopokana tee manga suludadu molingkana mopotimbe." 25 Jadi o giu incia sumai apamembalia Daud amembali saangu katotapu apepuu minaaka i eo incia sumai tee apakea miana Israel sakawana sii-sii.

26 Wakutuuna Daud ambuli pendua i Kota Ziklag, incia alamboko sagaa manga bara irampasina minaaka i hasilina potimbea to manga mancuana i Tana Yehuda, siitumo to manga sabhangkana, tee aposamea, "Siimo dhawumu minaaka i hasilina bara irampasi i potimbea tee aminaaka i manga musuna KAWASANA OPU."

27 Daud alambokoakea uka to manga mia momboorena i Bait-El, i Ramot i Tana Negeb, i Yatir, 28 i Aroʼer, i Sifmot, i Eshtemoa, 29 i Rakhal, i kota-kotana miana Yerahmeel, i kota-kotana miana Keni, 30 to mia i Horma, i Bor-Asan, i Atakh, 31 to mia i Kota Hebron tee bhari-bharia tampa mopadhana ilaloina Daud tee manga ana buana.