1 Umuruna Saul talu pulu tao* wakutuuna amembali raja tee kangengena pata pulu rua tao*. incia amembali rajana Israel. 2 Raja Saul apili talu rewu mia minaaka i tanga-tangana miana Israel; rua rewu mia mopoosena tee Saul i Kota Mikhmas tee i manga gununa Bait-El, sainamo sarewu miana apoose tee anana Saul mokosaroakana Yonatan i Kota Gibea modhaangiana i lipu Binyamin, tee o labhina atumpua ambuli i bhanuana samia-samia.

3 Yonatan apekatalo sakolompo suludaduna miana Filistin modhaangiana i Kota Gibea, tee o giu incia sumai arangoa miana Filistin. Kasiimpo Raja Saul atumpu mia to atowiiaka sangkakala i saangua lipu, pogauna, "Taroakamo arangoa miana Ibrani." 4 Jadi bhari-bharia miana Israel arango lele, "Raja Saul padhamo apekatalo suludaduna miana Filistin, sabutuna o miana Filistin abanci miana Israel." Rampaakanamo sumai manga raʼeati aose kakemba to aposaangu tee Saul i Gilgal.

5 Wakutuu incia sumai uka o miana Filistin aporomusakamo to apotimbe abhali miana Israel tee talu rewu karetana potimbea, nama rewu mia suludadu mokoajara, tee o suludadu modhalana ae kabharina mboomo bhone i bhiwina tawo. Manga incia apokema i Mikhmas i sawetana timbuna Kota Bet-Awen. 6 Kasiimpo miana Israel asadaria ande manga incia i nuncana balaa ogena roonamo tantarana aopimea musu, sabutuna abhari manga miana Israel moopona i nuncana lia, i nuncana rumpu mokorui, i talikuna bhatu ogena, i bhalona tana, tee i nuncana sumu. 7 Sampe dhaangia uka o miana Ibrani mopolimbana i Umala Yordan tee apesua i Tana Gad tee Gilead, maka o Saul asadhaadhaa amboore i Gilgal, tee bhari-bharia tantarana moosea arengkuaka kaeka.

8 ✝Kangengena pitu eo o Raja Saul aantagi Nabii Samuel mboomo wakutuu mopadhana itantuakana Samuel, maka o Samuel indapo uka akawa i Gilgal, sabutuna manga tantarana sumai apepuumo apogaa-gaa abholi Saul. 9 Rampaakanamo sumai o Saul apogau, "Bhawaakaakumo kurubani tunua tee kurubani pomalapea." Kasiimpo incia apasombaakamea o kurubani tunua sumai. 10 Siimpo mpuu incia apadha apasombaaka kurubani tunua, saanampuu aumbamo Nabii Samuel. Kasiimpo Raja Saul alingka apokawaakea tee aposalamuakea.

11 Maka o Samuel aabha, "Opea mopadhana ipewaumu?"

Saul alawani, "Wakutuuna kukamata manga tantara sumai apepuumo apogaa-gaa abholiaku maka ingkoo inda uumba i wakutuu mopadhana itantuakamu, garaaka o miana Filistin aporomusakamo i Mikhmas, 12 sumaimo kufikiri, 'Indamo amangenge o miana Filistin bheahumbuniakumo i Gilgal, garaaka iaku indapo kuemani tulungi i KAWASANA OPU.' Rampaakanamo sumai iaku kunamisia tabeana kupasombaaka kurubani tunua."

13 Kasiimpo Nabii Samuel apogau tee Raja Saul, "Tapanamo kabhongo-bhongo giu ipewaumu sumai! Apokia ingkoo inda ukeniakea pekatangka o parintana KAWASANA OPU mopadhana idhawuakana to ingkoo? Garaaka o KAWASANA OPU gauna apatotapuakako to umembali rajana Israel saʼumurua, 14 ✝maka sii-sii o pamarintamu indamo bheatorotorosu tee kuasana. KAWASANA OPU padhamo apili mia imasanaakana incana tee o KAWASANA OPU padhamo apatotapuakea to mokapalaikina uumatina, roonamo ingkoo inda ukeniakea pekatangka o parintana KAWASANA OPU mopadhana idhawuakana to ingkoo."

15 Sapadhana sumai o Nabii Samuel alingkamo minaaka i Kota Gilgal tee apene i Gibea, maka o Saul tee manga suludaduna moosea alingka to aporomuaka tee manga tantara i kapalaina Yonatan i lipu Binyamin. Wakutuuna Raja Saul agagari manga suludaduna mopoosena tee incia, garaaka soomo nama atu mia inda mopalaiakana karona!

16 Saul tee Yonatan apoose tee tantarana amboore i Kota Gibea modhaangiana i lipu Binyamin, sainamo miana Filistin apokema i Mikhmas. 17 Wakutuu incia sumai alimbamo talu rombongana parampo minaaka i pokemaana miana Filistin. Rombonga mobhaa-bhaana adhala aporope i Ofra i Tana Syual, 18 rombonga rua anguna adhala aporope i Bait-Horon, tee o rombonga saanguna uka aala dhala moporopena i lipu mopoarona i Mbolongana Zeboim i weta i tana matuu.

19 Wakutuu incia sumai inda dhaangia o pande ase i Tana Israel roonamo alarangia miana Filistin, tee o miana Filistin apogau, "Ancosala manga miana Ibrani akarajaa hancu tee pandanga." 20 Jadi manga miana Israel tabeana alingka i miana Filistin to awinto matana tambalina, bhingkuna, tee ndamuna. 21 Manga incia tabeana apomea tee haragaa momaali mpuu, siitumo walu haramu doi pera to awintoaka matana bhingkuna tee tambalina, tee apomea pata haramu doi pera to awintoaka ndamu tee kasulaana sapina.

22 Jadi, i wakutuuna potimbea sumai inda samia uka mominaakana i miana Israel mokenina hancu atawa o pandanga, maka tangkanamo Raja Saul tee Yonatan o anana sumai mokenina hancu tee pandanga.

23 Miana Filistin alamboko suludaduna to amaju tee ajagani kabhangka momembalina polotaana Kota Mikhmas tee Kota Gibea.