1 ✝Saangu wakutuu manga miana Zif aumbati Raja Saul i Kota Gibea tee apogau, "Daud tangasaana abuniaka karona i Kabumbuna Hakhila mopoarona tee tana matuu."

2 Sumaimo Raja Saul alausakamo aporope i Tana Matuuna Zif apoose tee talu rewu tantarana Israel motopili to apeeloaka Daud. 3 Kasiimpo Saul tee tantarana apokema i bhiwina dhala i bhawona Kabumbuna Hakhila mopoarona tee tana matuu, sainamo Daud sadhaadhaa amboore i tana matuu. Wakutuuna Daud arango Saul aumba to apeeloa i tana matuu sumai, 4 Daud alamboko pia mia o mata-matana sabutuna amataumea ande o Saul atotuu-totuu aumbamo iwe sumai.

5 Kasiimpo Daud alingkamo apekadhei i pokemaana Saul sumai. Incia akamatamo Saul tee Abner bin Ner o kapitana tantarana tangasaana akole i tanga-tangana pokemaa sumai, sainamo bhari-bharia kemana manga tantarana abulilingi kemana Saul.

6 Kasiimpo Daud aabha i Ahimelekh miana Het sumai, tee Abisai o anana Zeruya* witinaina Yoab, "Incema moundana mopobhawana tee iaku to tapesuaaka i nuncana pokemaana Saul?"

Abisai alawani, "Iaku kuunda."

7 Malo incia sumai uka o Daud tee Abisai alingka i pokemaana Saul. Sakawana iwe sumai manga incia akamatamo Saul tangasaana akole i tanga-tangana pokemaana, tee o pandangana apatongkea i tana i saripina bhaana. Abner tee bhari-bharia tantarana tangasaana akole abulilingi Saul.

8 Kasiimpo Abisai apogaumo tee Daud, "Eo sii o Aulataʼala apasaraakaakea o musumu i limamu. Rampaakanamo sumai taroakamo iaku mopatongkea i tana tee pandangana karona. Iaku bhekupekamatea tee sampearo katumbosimea tee inda apendua rua mpearo."

9 Maka o Daud apogau tee Abisai, "Bholi upekamatea, roonamo inda dhaangia o mia momembalina molapana minaaka i kahukumuna KAWASANA OPU ande tapewau madhaki tee raja mopadhana ilantina!" 10 Daud apogau uka, "Iaku kuposumpa to sarona KAWASANA OPU modhadhi, ande naile itu o karona KAWASANA OPU bhemopekamatea, aipomo rampaakanamo akawamo ajalana atawa rampaakanamo amate i nuncana potimbea. 11 Maka taroakamo o KAWASANA OPU sadia ajaganiaku mamudhaakana inda kupekamate raja mopadhana ilantina. Alamea o pandanga tee bhosuna uwe i saripina bhaana sumai, kasiimpo maimo talingkaaka."

12 Sumaimo Daud aalamo pandanga tee bhosuna uwe modhaangiana i saripina bhaana Saul kasiimpo alingka tee inda dhaangia mokamatea, inda tee momataua, tee inda dhaangia o mia mobhanguna minaaka i koleana roonamo manga incia apakolea KAWASANA OPU.

13 Sapadhana sumai o Daud apolimbamo i sawetana mbolonga mosagaanana tee akabhale-bhale i bhawona lolona kabumbu, sabutuna apomaridhomo minaaka i pokemaana Saul. 14 Minaaka i iwe sumai, Daud agoraakamo Abner bin Ner tee tantarana Raja Saul, pogauna, "Abner! Urangoa o suaraku sii?"

Lawanina Abner, "Incema ingkoo mogoraakana raja sii?"

15 Daud apogau tee Abner, "Ingkoo itu o umane tuaapa? Saangua Israel sii inda dhaangia o sampodhimbamu! Apokia ingkoo inda ujagania o rajamu? Wakutuuna ukole dhaangia o mia mopesuana i nuncana kemamu to mopekamatena rajamu. 16 Inda amalape opea ipewaumiu itu. Iaku kuposumpa to sarona KAWASANA OPU modhadhi, ingkomiu ulaenga umate, roonamo inda ujagania o rajamiu mopadhana ilantina KAWASANA OPU sumai. Coba ukamatea! I iapaimo o pandanga tee bhosuna uwe modhaangiana i saripina bhaana rajamiu?"

17 Raja Saul amataua o suarana Daud, kasiimpo apogaumo o Saul, "Daud, suaramu itu anaku?"

Lawanina Daud, "Umbe, suaraku sii Opuku Raja." 18 Daud apogau uka, "E Opuku apokia dhaangiapo utorotorosu upajereaku? Opea o kasalahaku? 19 Sii-sii maasangia uperangoia o pogauna bhatuamu sii Rajaku. Ande o KAWASANA OPU motumpuko to mobhaliaku, taroakamo Incia apotibhaaka kurubani pasombaa momembalina mopauntona amaramu to iaku. Maka ande manga maanusia motumpuko, maasangia manga incia atotunda i aroana KAWASANA OPU, roonamo sii-sii manga incia padhamo apadhencuaku tee apogau, 'Lingkamo i lipu mosagaanana tee usombamo dewa-dewana manga incia!' sabutuna iaku inda kupotibhaaka tinauraka i nuncana pusakana KAWASANA OPU. 20 Rampaakanamo sumai bholi utaroakea o raaku atobusaka i tana tee amaridho minaaka i aroana KAWASANA OPU. Opea o gunana rajana Israel aumba to apekamate sambaa kutu mboo iaku sii? To opea incia apajereaku mboomo mia mopajerena manu koo i tanga-tangana manga gunu?"

21 Kasiimpo o Saul apogau, "Iaku kukodosamo. E anaku Daud, mbulimo. Iaku indamo uka bhekupewau dosa pendua tee ingkoo, roonamo sii-sii o inyawaku akoharagaa i matamu. Satotuuna iaku kukabhongo-bhongo mpuu tee amaoge mpuu o kasalahaku."

22 Lawanina Daud, "Siimo o pandangana raja! Tumpumo sala samia suludadumu to aumbaaka aalea iwe sii. 23 KAWASANA OPU bheabarakati mia mobanara tee mia motoparacaea. Roonamo i eo sii o KAWASANA OPU padhamo apasaraakaakako i limaku, maka iaku inda kupacilaka mia mopadhana ilantina KAWASANA OPU. 24 Mboomo inyawamu akoharagaa i mataku i eo sii, jadi maasangia mboomo sumai uka o KAWASANA OPU bheajaganiaku tee arambasakaaku minaaka i sagala giuna kanarakaa."

25 Pogauna Saul, "Maasangia o KAWASANA OPU abarakatiko! Opeapo uka ipewaumu dhaanamo bheakohasili."

Kasiimpo o Daud apalausaka lingkaana, sainamo Saul ambulimo i bhanuana.