1 Samuel apogau tee manga miana Israel, "Iaku padhamo kuperangoi bhari-bharia ipogauakamiu tee padhamo kuangkaakakomiu samia raja. 2 Sii-sii o rajamo incia sumai bhemokapalaikikomiu tee rua mia anaku umane uka dhaangia i tanga-tangamiu. Iaku kukapalaikomiu apepuu dhaangiapo kumangura sakawana i eo sii, maka sii-sii iaku kumancuanamo tee kukouwamo. 3 Sii-sii iaku kukakaro i aroamiu! Ande dhaangia tee kasalahaku, raeakaakumo i aroana KAWASANA OPU tee i aroana raja mopadhana ilantina. Incema mopadhana ialaku sapina tee keledaina? Incema mopadhana itipuku tee ipisakiku? Buaka apernamo urangoaku kutarima doina kasogo mamudhaakana kututubhi mataku? Pogaumo, mamudhaakana ande dhaangia o giu mopadhana ialaku minaaka i ingkomiu amembali kupambuliakakomiu pendua."

4 Manga incia alawani, "Ingkoo indapo aperna mangatipu tee mangapisaki, atawa utarima doina kasogo."

5 Kasiimpo Samuel apogau, "KAWASANA OPU tee mia mopadhana ilantina amembali sakusii i eo sii, ande iaku saidhe mpuu uka inda tee kasalahaku."

Pogauna manga incia, "Umbe atotuu, KAWASANA OPU momembalina sakusiita."

6 ✝Kasiimpo Samuel apogau uka, "KAWASANA OPU uka mopilina Nabii Musa tee Harun, tee mobhawana opu-opuamiu alimba minaaka i Tana Mesir. 7 Sii-sii ukakaromo, iaku bhekuraeakako i aroana KAWASANA OPU pokaiana tee sagala giuna pewau mobanara ipewauna KAWASANA OPU to ingkomiu tee opu-opuamiu."

8 ✝"Saumbana Yakub i Tana Mesir tee sapadhana opu-opuamiu aemani tulungi tee KAWASANA OPU, sumaimo KAWASANA OPU alambokomo Musa tee Harun to apalimbaaka opu-opuamiu minaaka i Tana Mesir tee ataroakea amboore i tampa incia sii."

9 ✝"Maka manga incia amalinguaka KAWASANA OPU Aulataʼalana, sabutuna manga incia apekataloa tee apasaraakaakea i Sisera momembalina kapalana tantarana Kotana Hazor, tee apasaraakaakea uka i limana miana Filistin tee i limana raja Moab. 10 ✝Kasiimpo manga incia adoʼa i KAWASANA OPU tee apogau, 'Ingkami takodosamo roonamo tabholi KAWASANA OPU tee tasomba manga patuna dewa Baal tee patuna dewi Astoret. Maka sii-sii mangarambasakamo minaaka i limana manga musumami, sumaimo ingkami bhetasombako.' 11 ✝Kasiimpo KAWASANA OPU alamboko Yerubaal,* Barak, Yefta tee iaku to arambasakakomiu minaaka i limana bhari-bharia manga musu mobulilingikomiu, sabutuna amembali udhadhi malape tee uʼamani."

12 ✝"Maka wakutuuna ukamata Nahas rajana miana Amon bheahumbunikomiu, sumaimo ingkomiu upogau tee iaku, 'Inda, ingkami tabeana tee rajamami.' Garaaka o KAWASANA OPU satotuuna o rajamiu. 13 Sii-sii kamatamea o raja mopadhana ipili tee iemanimiu sumai, KAWASANA OPU padhamo aangkaakakomiu samia raja. 14 Ande uhoromati KAWASANA OPU, usombaia, utaʼatia, tee inda ugua tee parintana, tee ande ingkoo tee raja mokapalaikikomiu sumai udhadhi uose KAWASANA OPU Aulataʼalamiu, sumaimo bheamalape o kadhaangiamiu. 15 Maka ande inda utaʼati KAWASANA OPU tee ugua tee parintana, sumaimo limana KAWASANA OPU bheabhalikomiu mboomo abhali opu-opuamiu i piamo itu."

16 "Sii-sii kamatea o giu maoge inda momentela bheipewauna KAWASANA OPU i aroamiu! 17 Iaku bhekugora i KAWASANA OPU, tee moomini o bulaana paneeo KAWASANA OPU bheapasapo guntu tee wao to kalawanina doʼaku. Wakutuu incia sumai ingkomiu bheusadara ande tapanamo kaoge o dosamiu tee KAWASANA OPU roonamo uemani samia raja."

18 Kasiimpo Nabii Samuel agora i KAWASANA OPU, tee i eo incia sumai uka o KAWASANA OPU apasapo guntu tee wao, sabutuna saangua lipu sumai amaeka i KAWASANA OPU tee Samuel.

19 Kasiimpo manga incia apogau tee Samuel, "Mangadoʼaakamo i KAWASANA OPU Aulataʼala, mamudhaakana ingkami inda tamate. Sii-sii ingkami tasadaramo ande mencuana tangkanamo dosamami i piamo itu, maka ingkami uka takodosamo roonamo padhamo taemani samia raja."

20 Lawanina Samuel, "Bholi umaeka, moomini padhamo upewau giu madhaki mboo sii, maka bholi uunto uose KAWASANA OPU tee usombamo KAWASANA OPU tee saangua ngangarandamiu. 21 Bholi usaladhala tee usomba manga barahala inda mokofaʼeda inda momembalina mopasalaamatikomiu, roonamo bhari-bharia sumai o giu mosia-sia. 22 KAWASANA OPU inda bheabholi uumatina to sarona momulia sumai, roonamo KAWASANA OPU padhamo apamembalikomiu uumatina. 23 Pokaiana tee karoku, iaku inda bhekuunto to kudoʼaakakomiu mamudhaakana inda kukodosa tee KAWASANA OPU. Iaku uka bhekuadhariakakomiu dhala momalape tee momakate. 24 Horomatia o KAWASANA OPU tee utaʼatimo uʼibaadati tee Incia tee mpuu-mpuuna incamiu. Udhania tapanamo kaoge manga giu mopadhana ipewauna to ingkomiu. 25 Maka ande ingkomiu usadhaadhaa upewau giu madhaki, sumaimo ingkomiu tee rajamiu bheutopabinasa."