1 Sapadhana sumai afirimanimo KAWASANA OPU tee Nabii Samuel, "Sakawana naepia incamu amaporo rampaakanamo Saul inda kutarimaia amembali rajana miana Israel? Antokimea o tampana mina zaitunmu tee ulingkamo. Iaku kulambokoko to upokawaaka miana Bait Lahim mokosaroakana Isai sumai, roonamo Iaku padhamo kupili samia raja minaaka i manga anana."

2 Lawanina Samuel, "Tuaapa amembali iaku bhekulingka iwe sumai? Ande o giu incia sumai arangoa Saul incia dhaanamo bheapekamateaku."

Firimanina KAWASANA OPU, "Bhawamo sambaa anana sapi bhawine tee upogau, 'Iaku kuumba to kupasombaaka kurubani i aroana KAWASANA OPU.' 3 Kasiimpo ukembamo Isai i haroaana kurubani sumai, tee Iaku bhekupaumbaakako opea bheipewaumu, tee kususuakako mia bheilantimu to amembali raja."

4 Nabii Samuel apewaua bhari-bharia ifirimaniakana KAWASANA OPU sumai. Wakutuuna incia akawa i Kota Bait Lahim, manga mancuanana kota sumai aumba apokawaakea tee arengku, pogauna manga incia, "Buaka o umbaamu sii ubhawa kaʼamani?"

5 Lawanina Samuel, "Umbe, iaku kubhawa kaʼamani! Iaku kuumba to kupasombaaka kurubani i aroana KAWASANA OPU. Pekangkilomea o karomu tee umbamo upoose tee iaku i haroaana kurubani sii." Kasiimpo incia apekangkilo Isai tee manga anana tee akembaia i haroaana kurubani sumai.

6 Wakutuuna manga incia aumba, Samuel akamatamo Eliab ana tumpena Isai tee afikiri, "Dhaanamo mia mokabhale-bhalena i aroaku sii o mia bheilantina KAWASANA OPU."

7 Maka o KAWASANA OPU afirimani i Samuel, "Bholi ukamata bhanguna atawa o poningkarona, roonamo mencuana incia ipiliku. Iaku inda kunilai maanusia mboomo carana maanusia anilai maanusia rangana, roonamo maanusia anilai mia minaaka i bhanguna, maka Iaku kunilai mia minaaka i ngangarandana."

8 Kasiimpo Isai akemba Abinadab tee atumpua adhala i aroana Samuel. Maka o Samuel apogau, "Mencuana incia ipilina KAWASANA OPU." 9 Kasiimpo Isai atumpu uka Syama modhalana, maka o Samuel apogau, "Mencuana incia uka ipilina KAWASANA OPU." 10 Isai atumpu pitu miaia anana sumai to adhala i aroana Samuel, maka o Samuel apogau, "Minaaka i kabharina manga incia inda samia uka ipilina KAWASANA OPU." 11 Kasiimpo Samuel aabha, "Soomo incia sii o anamu umane?"

Lawanina Isai, "Dhaangia samiapo uka o kaepuku mokosaroakana Daud. Incia tangasaana awulu gulumana dumbamami."

Pogauna Samuel, "Tumpumo mia to akembaia, roonamo ingkita indapo tamembali tauncura takande ande incia indapo aumba iwe sii."

12 Jadi Isai atumpumo mia to akembaaka anana sumai. Garaaka o anana sumai amakesa o bhanguna, amangada o matana, tee amaleʼi o rouna. Kasiimpo afirimanimo KAWASANA OPU, "Siimo miana, ulantimea."

13 Sapadhana incia sumai o Samuel aalamo mina zaitun, kasiimpo alanti tee amina-minaiki bhaana Daud i aroana manga witinaina. Pepuu i eo incia sumai uka o Daud akuasaimea Rohina KAWASANA OPU. Kasiimpo Samuel ambuli i Kota Rama.

14 Wakutuu incia sumai o Rohina KAWASANA OPU amaridhomo minaaka i Raja Saul, tee incia aganggomea rohi madhaki mopadhana ilambokona KAWASANA OPU.

15 Rampaakanamo sumai manga pagawena Saul apogau, "Ingkami tamataua ande dhaangia tee rohi madhaki ilambokona Aulataʼala to moganggoko. 16 Ande usatuju, ingkami taunda tapeeloakako mia momakidhana momagasiaakana kecapi. Jadi ande o rohi madhaki sumai aumba aganggoko, mia incia sumai amembali amagasiaakako kecapina, sabutuna bheamalape o namisimu e opuku."

17 Pogauna Saul tee manga pagawena, "Peeloakaaku mia momakidhana momagasiaakana kecapi tee ubhawea iwe sii."

18 Kasiimpo alawanimo sala samia minaaka i pagawena, "Miana Bait Lahim mokosaroakana Isai sumai dhaangia tee anana momakidhana momagasiaakana kecapi. Incia abarani tee amakaa o bukuna. Incia aʼaarifu o bhatangana pogauna tee amakesa o poningkarona, tee bhari-bharia ipewauna sadia atulungia KAWASANA OPU."

19 Kasiimpo o Raja Saul alambokomo pia mia o potoloweana to apokawaaka Isai tee aposamea mboo sii, "Tumpua o Daud mogembalaakana manga gulumana dumbamu sumai to apoaroaka tee iaku." 20 Jadi o Isai aala sambaa keledai, sambaa anana bhembe, roti, tee kadhu kuli mokoantoakana angguru kasiimpo adhawuakea to Daud mamudhaakana abhawea apasombaakea to Saul.

21 Mboomo sumai o Daud aumba apokawaaka Saul, tee apepuumo alaiania. Saul amaasiaka Daud, sabutuna o Daud aangkea amembali pande kenina ewangana. 22 Rampaakanamo sumai o Saul atumpumo mia to apokawaaka Isai tee aposamea, "Taroakamo o Daud ambooreaka iwe sii to alaianiaku roonamo kumaasiakea."

23 Pepuu i wakutuu incia sumai, ande o Saul aumbatia rohi madhaki minaaka i Aulataʼala, sumaimo o Daud bheaala kecapina tee amagasiaakea. Kasiimpo rohi madhaki sumai abholi Saul, sabutuna o namisina Saul atanangi tee amalape pendua o fikirina.