1 Inda amangenge sapadhana sumai, amatemo o Nabii Samuel. Bhari-bharia miana Israel aporomusaka to atangisia, tee incia atokoburu i bhanuana i Kota Rama. Sapadhana sumai o Daud alausakamo alingka i Tana Matuuna Paran.

2 I Kota Maon dhaangia samia umane mokosaroakana Nabal. Mia incia sumai arangkaea mpuu, tee o kabharina gulumana dumbana dhaangia talu rewu mbaa tee o bhembena sarewu mbaa. Incia tangasaana agunti buluna dumbana i Karmel. 3 Nabal dhaangia tee bhawinena mokosaroakana Abigail. Bhawinena sumai aʼaarifu tee amakesa o rouna, sainamo umanena akasara tee amadhaki o feʼelina. Incia aminaaka i siwuluna Kaleb.

4 Wakutuuna Daud adhaangia i tana matuu incia arangomo lele, ande o Nabal tangasaana agunti buluna manga dumbana. 5 Sumaimo Daud alambokomo sapulu mia ana umane mangura tee apogau, "Lingkamo i Karmel to upokawaaka tee Nabal tee upaumbaia kuabhaakea o kadhaangiana, 6 tee upaumbaia mboo sii, 'Maasangia ingkoo tee manga keluargamu udhadhi malape, tee adhadhi malape bhari-bharia opea modhaangiana i karomu.' "

7 " 'Indapo amangenge sii iaku kurango lele, ande ingkoo tangasaana ugunti buluna dumbamu. Manga gembalamu modhaangiana i lipumami inda aperna tapanarakaaia, tee manga incia inda akailangaaka opeapo uka kangengena amboore i Karmel. 8 Coba abhakia manga bhatuamu, atantumo manga incia bheapabanarea o hali incia sii. Rampaakanamo sumai ingkami taemani kaasimu, mamudhaakana mangatarima taumba i eona raraea. Tulungi mangadhawuaka opeapo uka modhaangiana i karomu to manga bhatuamu sii tee uka to anamu o Daud.' "

9 Wakutuuna manga potumpuana Daud akawa iwe sumai, manga incia apogaumo tee Nabal pokaiana tee opea ipogauakana Daud, kasiimpo manga incia aantagi kalawanina Nabal.

10 Maka o Nabal alawani, "Incema buaka o Daud sumai? Buaka o anana Isai sumai o mia momalangana pangkatina? Sii-sii abhari o bhatua mopalaiakana karona minaaka i opuna. 11 Buaka iaku tabeana kuala rotiku, uweku, tee dagina dumba mopadhana isumbeleku to manga pande guntina buluna dumbaku, kasiimpo kudhawuakea to manga mia inda motomatauna asalana?"

12 Jadi manga potumpuana sumai ambulimo tee sakawana i tampana Daud, manga incia apaumbaakamea bhari-bharia opea mopadhana ipogauakana Nabal. 13 Sumaimo Daud apogaumo tee manga ana buana, "Bhokemea o hancumiu i tangamiu samia-samia!" Kasiimpo Daud tee manga ana buana abhoke hancuna i tangana. Kera-kera pata atu umane moosena Daud, tee dhaangia rua atu umane mosagaanana inda moosea, siitumo to mojaganina manga bara.

14 Maka sala samia minaaka i bhatuana Nabal apaumbamo bhawinena Nabal, siitumo Abigail, mboo sii, "Daud alamboko pia mia o potumpuana minaaka i tana matuu to apakawaaka salamuna kabarakatina to Nabal, maka o oputa soo amangkatua. 15 Garaaka manga mia incia sumai amalape tee ingkami. Manga incia inda mangaganggo, tee inda dhaangia o pewauamami mokailangana kangengena taposabhangka tee manga incia i tana lapa. 16 Manga incia mboomo tondo, tee malo eona mangajagani kangengena tagembalaaka gulumana dumbamami i saripina manga incia. 17 Rampaakanamo sumai, ufikirimea tee umambotuakamea opea tabeana bheipewaumu to giu incia sii, roonamo oputa tangasaana aaro-aro balaa, tee o giu incia sumai amembali aumbaaka kahancuru to bhari-bharia keluargamu. Oputa sii o mia momadhakina pewauna, sabutuna incia inda amembali takembaia to tapogauaka malape."

18 Sumaimo Abigail alausakamo aala rua atu dhodho roti, rua kanto angguru, lima mbaa dagina dumba mosiapuna motonasu, talu pulu litere gandum itunu, saatu bungkusu kismis, tee rua atu angu hole-hole minaaka i bhakena ara. Bhari-bharia sumai auleaia i bhawona manga keledai. 19 Kasiimpo Abigail apogau tee manga ana buana, "Lingkamo porikanaakaaku, dhaampomo kututunikomiu." Maka o giu incia sumai inda apaumbaakea i Nabal umanena.

20 Tee asawiki keledaina, Abigail asapo alaloi dhala ijolina manga kabumbu, kasiimpo akamatamo Daud tee manga ana buana atitingkulu aporope i weta i incia, sabutuna manga incia apokawamo. 21 Daud padhamo abhoasaka pogau incia sii wakutuuna indapo apokawa tee Abigail, "Asia-siamo kujagani pewauana mia incia sii, sampe inda dhaangia o harataana mokailangana wakutuuna i tana matuu, maka o kalapeku sumai abalasia tee kadhaki. 22 Mboo siimo o KAWASANA OPU bheahukumuaku,* tee aipomo bhealabhi minaaka i incia sii, ande inda kupekamate bhari-bharia umane modhaangia i bhanuana Nabal wakutuuna indapo abhete matana eo."

23 Wakutuuna Abigail akamata Daud, incia apekadheimo asapo minaaka i keledaina, kasiimpo asujumo tee o rouna atumpu i tana to ahoromati Daud. 24 Kasiimpo incia apogau, "E Opuku, taroakamo bhatuamu sii bhemotanggona kasalaha incia sumai. Undaakaakupo kupogau, tee uperangoipea o pogauna bhatuamu sii. 25 E Opuku, iaku kuemani mpuu mamudhaakana inda ufaduliaka Nabal momadhakina pewauna sumai. Incia akabhongo-bhongo apokana mboomo sarona.* Satotuuna iaku inda kukamatea manga potumpua ilambokomu sumai. 26 Sii-sii o KAWASANA OPU padhamo apasalaamatiko mamudhaakana inda ubalasi tee upekamate manga musumu tee limamu karomu. Rampaakanamo sumai iaku kuposumpa to sarona KAWASANA OPU modhadhi tee i aroamu, iaku kuharapu bhari-bharia musumu tee incemapo uka bhemohaejatina to mopacilakako bheapokana tee dhadhina Nabal. 27 E Opuku, tarimamea o kadhawu ibhawaku sii tee udhawuakea to manga ana buamu."

28 "Maasangia uʼamponia o kasalahana bhatuamu sii. KAWASANA OPU bheabalasiko tee manga siwulumu aundaakea amembali rajana Israel roonamo ingkoo upotimbe i nuncana potimbea ipeeluna KAWASANA OPU, tee ingkoo inda bheupewau madhaki saʼumurua dhadhimu. 29 Ande dhaangia o mia mopajereko tee bhemopekamateko, sumaimo inyawamu bheatangea i nuncana katangena manga mia modhadhina moosena KAWASANA OPUNA Aulataʼalamu, maka o dhadhina manga musumu bheatotudhaaka mboomo bhatuna pate. 30 Ande o KAWASANA OPU padhamo apewau bhari-bharia giu momalape mboomo mopadhana ifirimaniakana to ingkoo, tee Incia padhamo apatotapuakako to umembali rajana miana Israel, 31 sumaimo ingkoo inda bheutosunu atawa amaheru incamu tee usoso roonamo indamo upekamate mia inda tee alasana, tee ingkoo inda uose kapeeluamu karomu wakutuuna ubalasi mia. Udhania, ande o KAWASANA OPU padhamo adhawuakako kasalaamati, bholi umalinguakaaku."

32 Kasiimpo Daud apogau tee Abigail, "Atopujimo KAWASANA OPU, Aulataʼala isombana miana Israel. Incia padhamo alambokoko to upokawaakaaku i eo sii. 33 Atopujimo kaʼaarifumu tee atopujimo karomu, roonamo pemingkuimu tee pogaumu motulungiaku indaaka kupekamate mia, tee inda kuose kapeeluaku karoku to kupeelo kaʼadili tee limaku karoku. 34 Maka kuposumpa to sarona KAWASANA OPU modhadhi mopadhana motaangiaku mamudhaakana inda kupekamateko, tee ande ingkoo inda uumba madhei upokawaakaaku, sumaimo bhari-bharia ana buana Nabal bhekupekamatea wakutuuna indapo abhete matana eo."

35 Kasiimpo Daud atarimamo bhari-bharia opea ibhawana Abigail sumai tee apogau, "Mbulimo tee utanangimo i bhanuamu tee bholimo umaheru. Iaku kuperangoimea bhari-bharia opea ipogauakamu."

36 Wakutuuna Abigail ambuli i bhanuana, garaaka o Nabal tangasaana apadhaangia kariaa maoge mboomo kariaana samia raja. Ngangarandana akaunde-unde tee incia amalango mpuu, sumaimo Abigail inda apetulatulaaka opeapo uka tee Nabal sakawana saeona. 37 Maka wakutuuna Nabal asadaramo minaaka i kalangona, Abigail apetulatulaakamea bhari-bharia giu incia sumai, tee o Nabal alausaka apaangka ngangarandana tee saangua badana indamo amembali akomingku. 38 Kera-kera sapulu eo sapadhana kajadia incia sumai, Nabal amatemo roonamo ahukumumea KAWASANA OPU.

39 Wakutuuna Daud arango lelena Nabal amatemo, incia apogaumo, "Bhari-bharia kapujia to KAWASANA OPU mopadhana moewaakana parakaraku pokaiana tee kahinana Nabal! Incia ajaganiaku mamudhaakana inda kupewau giu madhaki. Kadhakina Nabal sumai padhamo apambuliakea KAWASANA OPU pendua to karona."

Kasiimpo Daud alamboko manga potumpuana to apogau tee Abigail, pokaina tee haejatina to alosaaka Abigail to apamembalia bhawinena. 40 Wakutuuna manga potumpuana sumai apokawa tee Abigail i Karmel, manga incia apogaumo, "Daud mangatumpu to talosaakako mamudhaakana umembali bhawinena."

41 Abigail alausakamo asuju tee o rouna atumpu i tana tee apoose apogau, "Iaku sii o bhatuana oputa mosiapuna motarimana parinta to kubhanuiaka aena manga ana buana sumai." 42 Abigail alausakamo aposintuwu tee asawimo i keledaina. Incia aosea lima mia bhatuana bhawine tee manga incia alingkamo aose manga potumpuana Daud sumai. Kasiimpo Abigail amembalimo bhawinena Daud. 43 Wakutuuna Daud indapo akobhawineaka Abigail, incia padhamo akawiaka Ahinoam minaaka i Yizreel. Jadi rua miaia bhawine sumai amembalimo bhawinena. 44 Sainamo Mikhal anana Saul momembalina bhawinena Daud mobhaa-bhaana, padhamo adhawuaka Palti bin Lais mominaakana i Kota Galim to apamembalia bhawinena.