1 Daud apalai minaaka i Nayot i saripina Kota Rama, kasiimpo alingka apokawaaka Yonatan tee apogau, "Opea mopadhana ipewauku, opea o kasalahaku, opea o dosaku tee amamu sampe incia bheapekamateaku?"

2 Lawanina Yonatan, "Bholi upogau mboo itu! Amaku inda bheapekamateko. Incia sadia apaumbaakaaku bhari-bharia giu ihaejatiakana, malape momaogena atawa momaidhi-idhina. Jadi inda amungki bhearahasiaakaaku haejatina. Rampaakanamo sumai opea ipogauakamu itu inda atotuu!"

3 Maka o Daud aposumpamo uka pendua tee apogau, "Amamu amataua mpuu ande umaasiakaaku. Jadi i fikirina amamu, 'Ancosala giu incia sii amataua Yonatan, roonamo dhaanamo bheamaporoakea incana.' Maka kuposumpa to sarona KAWASANA OPU modhadhi tee uka to dhadhimu, satotuuna o dhadhiku sii soomo sabhengkalapo o karidhona minaaka i mate."

4 Kasiimpo Yonatan apogau tee Daud, "Opeapo uka iemanimu bhekupewaua."

5 ✝Jadi o Daud alawani Yonatan, "Naile o kariaana bula bhaau tee iaku tabeana kuuncura kukande tee raja. Maka, taroakamo kulingka kuopo i tana lapa sakawana naipua i wakutuuna soo matanaeo. 6 Ande o amamu aabhaakaaku, paumbaia, 'Daud aemani mpuu tee iaku mamudhaakana kuundaakea to ambuli i kampona i Bait Lahim roonamo i kota incia sumai dhaangia tee haroaana kurubani satao-satao to bhari-bharia manga witinaina.' 7 Ande incia apogau, 'Umbe,' maʼanana iaku kusalaamati, maka ande aʼamara, maʼanana incia bheahaejati apacilakaaku. 8 Rampaakanamo sumai, susuakaakumo kaasimu, roonamo ingkita padhamo tabhoke pojanjia i aroana KAWASANA OPU. Maka ande iaku mosalana, taroakamo upekamateaku, maka bholi upasaraakaaku i amamu."

9 Lawanina Yonatan, "Bholi umeri! Roonamo ande atotuu-totuu kumataua o amaku padhamo ahaejati to apacilakako, inda amungki iaku inda bhekupaumbaakako!"

10 Kasiimpo Daud aabha uka i Yonatan, "Incema bhemopaumbaakaaku ande o amamu akasara alawaniko?"

11 Pogauna Yonatan tee Daud, "Maimo talingkaaka i tana lapa." Kasiimpo manga incia alingkamo i tana lapa.

12 Kasiimpo Yonatan apogau tee Daud, "Iaku kuposumpa to sarona KAWASANA OPU, Aulataʼala isombana miana Israel. Naile saeona atawa naipua i wakutuu mopokana mboo sii uka, iaku bhekuʼusaha to kumatauaka antona ngangarandana amaku. Ande amalape o kadhaangiana, iaku bhekutumpu mia to alambokoakako lele. 13 Maka ande incia ahaejati to apacilakako, dhaanamo iaku kupaumbaakako mamudhaakana umembali upasalaamati karomu. Ande o giu incia sumai inda kupewaua taroakamo KAWASANA OPU ahukumuaku. Maasangia o KAWASANA OPU atulungiko mboomo Incia atulungi amaku i piamo itu. 14 Ande dhaangiapo kudhadhi, udhanimea o pojanjiata i aroana KAWASANA OPU tee ususuakaakumo kaasina. Maka ande kumate, 15 ✝iaku kuemani mpuu mamudhaakana bholi ubhotukia o kaasimu minaaka i witinaiku saʼumurua, sampe moomini uka o KAWASANA OPU padhamo apabinasa bhari-bharia musumu minaaka i bhawona alamu sii."

16 Mboomo sumai o Yonatan abhoke pojanjiana tee siwuluna Daud, tee apogau, "Taroakamo KAWASANA OPU apabinasaaka bhari-bharia musumu." 17 Kasiimpo Yonatan atumpu Daud to aposumpa pendua to asusuaka kaasina Daud tee incia, roonamo Yonatan amaasiaka Daud mboomo kaasina tee karona.

18 Kasiimpo Yonatan apogau, "Naile o kariaana bula bhaau. Manga mia dhaanamo bheapeeloko roonamo kauncuramakamu akoso. 19 Naipua wakutuuna soona eo, usapomo pekadhei tee ulingkamo i tampana opoamu i piamo itu, kasiimpo uantagimo i saripina Bhatu Ezil. 20 Iaku bhekurambasaka talu angu anana pana i saripina bhatu sumai, mboomo kabilanga dhaangia tee imetaku. 21 Kasiimpo iaku bhekutumpu bhatuaku to aene pendua manga anana pana sumai. Ande kupogau tee bhatuaku, 'Kamatea manga anana pana i weta iwe sii', pogauku sumai akomaʼana ingkoo uʼamanimo tee umembalimo ulimba. Iaku kuposumpa to sarona KAWASANA OPU modhadhi, ande ingkoo usalaamatimo tee indamo dhaangia o mia bhemopacilakako. 22 Maka ande kupogau mboo sii tee bhatua sumai, 'Kamatea, manga anana pana momaridhona i weta iwe sumako,' pogauku sumai akomaʼana ulingkamo, roonamo KAWASANA OPU atumpukomo ulingka. 23 Pokaiana tee giu mopadhana ipogauakata sumai, satotuuna o KAWASANA OPU dhaangia i tanga-tangaku tee i tanga-tangamu saʼumurua."

24 Jadi o Daud aopomo i tana lapa. Tee wakutuuna kariaana bula bhaau akawamo o Raja Saul aumba tee auncura akande i kariaa sumai. 25 Mboomo kananeana, incia auncura i kauncuramaka i saripina rindi, sainamo Yonatan auncura i aroana, tee o Abner auncura i saripina Raja Saul; maka o tampana Daud asadhaadhaa akoso. 26 I eo incia sumai o Saul inda apogauaka opeopea, roonamo afikiria, "Aipomo dhaangia tee saangu hali monaajisi mokangkanaina Daud,* sampe incia inda aumba i kariaa sii, umbe, koroo mboo sumai." 27 Maka samainawana, siitumo i eo rua eona i kariaana bula bhaau sumai, kauncuramakana Daud sadhaadhaana uka akoso. Sumaimo o Saul aabhamo i Yonatan, "Apokia minaaka i iawi sakawana i eo sii o anana Isai sumai indapo uka aumba akande i kariaa sii?"

28 Yonatan alawani Raja Saul, "Daud padhamo aemani mpuu tee iaku mamudhaakana kuundaakea to ambuli i Bait Lahim. 29 Pogauna, 'Undaakaakumo kulingkaaka, roonamo bhari-bharia mia tangasaana apadhaangia kariaana kurubani i kotamami, tee o akaku atumpuaku kuumba iwe sumai. Jadi ande umaasiakaaku, undaakaakumo kulingkaaka kupokawa tee manga witinaiku sii-sii.' Giumo incia sumai mosababuakana incia inda aumba i kariaana raja sii."

30 Sumaimo aʼamaramo mpuu o Saul tee Yonatan tee apogau, "Ingkoo sii o anana minaaka i bhawine pasunda tee modorohaka! Buaka iaku inda kumatauko ande uewaaka anana Isai sumai? Ingkoo sii upekaea karomu tee inamu! 31 Kangengena anana Isai sumai dhaangiapo adhadhi i bhawona dunia sii, ingkoo tee pamarintamu inda bheamatangka. Sii-sii tumpumo mia to abhawaaka Daud iwe sii roonamo incia alaenga to amate tee iaku bhekupekamatea."

32 Maka o Yonatan aabhaki amana, "Apokia incia bheupekamatea? Opea o dosana?" 33 Kasiimpo Saul atudhaaka pandangana tee gauna apekamate Yonatan. Sumaimo o Yonatan amataumea ande o amana atotuu-totuu bheahaejati apekamate Daud.

34 Rampaakanamo sumai o Yonatan aʼamara mpuu tee alausaka abholi kariaa sumai. Incia inda akande opeapo uka i eo rua eona kariaana bula bhaau sumai. Ngangarandana amaheru rampaakanamo o amana padhamo ahina Daud.

35 Samainawana o Yonatan alingkamo i tana lapa to apokawaaka Daud tee incia abhawa samia anaana maidhiidhi to bhatuana mboomo mopadhana imambotuakana. 36 Kasiimpo apogaumo Yonatan tee bhatuana sumai, "Buntulimo tee upeelomea o matana pana ipalimbaku!" Siimpo mpuu o bhatuana sumai abuntuli, Yonatan apalimbamo samata anana panana modhalana i bhawona bhaana bhatuana sumai. 37 Wakutuuna o bhatua sumai akawa i tampana kandawuna matana pana sumai, Yonatan agoramo minaaka i talikuna bhatuana sumai, pogauna, "Maju saidhepo uka i weta iwe sumako!" 38 Yonatan apogau uka, "Siapumo, lingkamo pekadhei tee bholi soo ukabhale-bhale!" Bhatua sumai aenemo matana pana sumai kasiimpo ambuli pendua i Yonatan. 39 Bhatuana sumai inda amaʼanaia opea ipogauakana Yonatan, maka tangkanamo Yonatan tee Daud momataua. 40 Sapadhana sumai o Yonatan adhawuakamo panana to bhatuana sumai tee apogau, "Lingkamo, bhawamea i kota."

41 Salingkana bhatuana sumai, Daud alimbamo minaaka i tampana opoana i weta i salatana bhatu sumai, kasiimpo asuju talu mpearo tee o rouna atumpu i tana. Manga incia atangi tee aposakulaka, tee o tangina Daud alabhi o kabharina minaaka i tangina Yonatan.

42 Yonatan apogau tee Daud, "Maasangia o KAWASANA OPU apasalaamatiko roonamo ingkita padhamo taposumpa, 'KAWASANA OPU bheadhaangia i tanga-tangata, tee o siwuluta bheatorotorosu akeniaka pojanjiata saʼumurua.' " Sapadhana sumai o Daud alingkamo, tee o Yonatan ambulimo pendua i kota.