1 Dhaangia samia umane minaaka i suku Efraim. Incia amboore i Kota Rama* i weta i manga Gununa Efraim mokosaroakana Elkana bin Yeroham bin Elihu bin Tohu bin Zuf. 2 Incia akobhawine rua mia, mokosaroakana Hana tee Penina. Penina dhaangia tee anana, maka o Hana inda tee anana.

3 Satao-satao Elkana alimba minaaka i Kota Rama to alingka aʼibaadati tee apasombaaka kurubani i aroana KAWASANA OPU Aulataʼalana saangua alamu i Kota Silo.* Momembalina imamuna KAWASANA OPU iwe sumai siitumo Hofni tee Pinehas, rua miaia o anana Eli. 4 Wakutuuna Elkana apasombaaka kurubani, incia sadia adhawuakea o dagina kurubanina sumai sabage-sabage to Penina tee bhari-bharia anana malape umane atawa o bhawine. 5 Maka to Hana incia adhawuakea rua bage roonamo incia amaasiakea mpuu moomini o KAWASANA OPU inda adhawuakea o siwulu. 6 Hana sadia atopekapii incana tee ahinaia maruena sumai, roonamo KAWASANA OPU inda adhawua siwulu. 7 Kajadia incia sumai anamisia satao-satao. Gagari o Hana alingka i Kemana KAWASANA OPU, maruena sumai apekapiia incana sabutuna o Hana atangi tee amendeu akande. 8 Kasiimpo Elkana aabhakia, "Hana, apokia utangi? Apokia umendeu ukande? Apokia amakidhi-kidhi incamu? Buaka alabhi akoharagaa sapulu mia ana umane minaaka i kaasiku to ingkoo?"

9 Saangu wakutuu sapadhana manga incia akande i Silo i Kemana KAWASANA OPU, Hana akakaromo minaaka i kauncuramakana. Wakutuu incia sumai o Imamu Eli tangasaana auncura uka i kauncuramakana i saripina ariina bhambana Kemana KAWASANA OPU.*. 10 Tee kaporona incana, Hana adoʼa i KAWASANA OPU apoose atangi tee akaʼusuʼusu. 11 ✝Incia apalimba tolauna onina, pogauna, "E KAWASANA OPU, Aulataʼalana saangua alamu, tilikimea o bhatuamu sii! Kamatamea o kanarakaana bhatuamu tee mpuu-mpuuna incamu! Udhaniakumo tee bholi umalinguakaaku! Ande Ingkoo udhawuakaaku samia ana umane, iaku kujanji bhekudhawuakea to alaianiko saʼumurua dhadhina, tee o buluana uka inda bhekukuruia."

12 Wakutuuna bhawine sumai atorotorosu adoʼa i aroana KAWASANA OPU, Imamu Eli atiliki bhiwina bhawine sumai. 13 Hana adoʼa i nuncana ngangarandana, jadi tangkanamo bhiwina mokamingku-mingkuna, maka o suarana inda atorango. Rampaakanamo sumai, Eli aabhia ande o Hana sii tangasaana amalango. 14 Kasiimpo Eli apogau tee incia, "Apokia umalango iwe sii? Untomo usumpu angguru!"

15 Maka o Hana alawani, "Inda opuku, iaku samia bhawine motangasaana momakidhi-kidhina incana. Iaku inda kusumpu angguru atawa o giu isumpu imalangoaka, maka iaku siimpo padha kupetulatulaaka sagala giuna kapiina incaku i aroana KAWASANA OPU. 16 Bholi uabhiaku samia bhawine inda momalapena feʼelina rampaakanamo abhari mpuu ipeenciakaku tee kanarakaa inamisiku, mbakana o bhiwiku akamingku-mingku minaaka i saao."

17 Lawanina Eli, "Ande mboo itu, ulingkamo, maasangia usalaamati tee maasangia o Kawasana Opu isombana miana Israel adhawuakako opea iemanimu tee Incia."

18 Lawanina Hana, "Maasangia o bhatuamu sii apotibhaaka kaasimu." Kasiimpo bhawine sumai alingkamo, incia akandemo tee indamo amaporo incana.

19 Samainawana manga incia abhangumo saeona, kasiimpo asambahea pendua i aroana KAWASANA OPU. Sapadhana sumai manga incia ambulimo i bhanuana i Kota Rama. Wakutuuna Elkana akole aporomu tee Hana, KAWASANA OPU audhanimo bhawine sumai. 20 Satao sapadhana incia sumai, Hana abhawa-bhawamo, kasiimpo apalaahiri samia ana umane. Anaana incia sumai asarongiakea Samuel* tee o Hana apogau, "Iaku kusarongiakea Samuel roonamo kuemania i KAWASANA OPU."

21 Satao sapadhana Hana apalaahiri anana, akawamo uka wakutuuna Elkana tee bhari-bharia witinaina alingka apasombaaka kurubani isumbele satao-satao, tee kurubanina tolauna onina i aroana KAWASANA OPU. 22 Maka o Hana inda aose manga witinaina, incia apogau tee umanena, "Sauntona Samuel adudu, iaku bhekubhawea iwe sumai ahususu to alaiani KAWASANA OPU, tee apepuu eo incia sumai Samuel bheamboore saʼumurua i kemana KAWASANA OPU."

23 Kasiimpo Elkana apogau, "Pewaumea opea iabhimu momalapena, mbooremo i bhanua sakawana o anaana sumai aunto adudu. Maasangia o KAWASANA OPU apewau opea mopadhana ijanjiakana." Sumaimo o bhawine sumai ambooremo i bhanua tee apadudumo anana sakawana anaana sumai aunto adudu.

24 Wakutuuna Samuel auntomo adudu, incia abhawea inana i Kemana KAWASANA OPU i Silo. Wakutuu incia sumai o Samuel dhaangiapo amaidhi-idhi mpuu. Inana uka abhawa sambaa sapi umane mokoʼumuruna talu tao, sapulu nama kilo gandum,* tee sakanto kuli uwena angguru. 25 Sapi umane sumai atosumbele, kasiimpo Samuel abhawea i Imamu Eli. 26 Kasiimpo Hana apogau tee Eli, "E opuku, kuemani maʼafu, dhaangiapo uudhaniaku? Iakumo bhawine mokabhale-bhalena i saripimu tee mopoosena modoʼana i KAWASANA OPU i piamo itu. 27 Toomo anaana incia sii iaku kupalimba tolauna oniku, tee o KAWASANA OPU padhamo adhawuakaaku opea iemaniku tee Incia. 28 Rampaakanamo sumai, anaana incia sii kupasaraakaakea i KAWASANA OPU to amembaliaka pewauana saʼumurua." Tee o anaana incia sumai* aʼibaadatimo i KAWASANA OPU iwe sumai.