1 Wakutuu incia sumai o Nabii Samuel amancuanamo, tee incia aangkamo bhari-bharia anana umane to amembaliaka haakimu to miana Israel. 2 Ana tumpena o sarona o Yoel, tee o katutunina tumpe o sarona o Abia. Manga incia amembali haakimu i Kota Bersyeba. 3 Maka rua miaia o anana sumai inda aose pemingkuina amana; manga incia asaladhala roonamo atarima kasogo tee o kahaakimuna inda aʼadili.

4 Sumaimo aporomusakamo bhari-bharia mancuanana Israel, kasiimpo aumba apokawaaka Samuel i Kota Rama. 5 ✝Pogauna manga incia, "Satotuuna ingkoo umancuanamo, tee rua miaia anamu inda aose pemingkuimu. Sii-sii mangaangkaakamo samia raja to mangaparintana, mamudhaakana ingkami dhaangia tee rajamami mboomo manga lipu mosagaanana."

6 Maka wakutuuna manga incia apogau tee Samuel, "Mangaangkaakamo samia raja to mangaparintana," Samuel inda apeelua o pogauna manga mancuanana Israel sumai, tee incia adoʼa i KAWASANA OPU. 7 Kasiimpo Samuel afirimania KAWASANA OPU, "Perangoimea bhari-bharia iemanina manga miana lipu sumai, roonamo mencuana ingkoo imendeuna manga incia, maka Iaku imendeuna, mamudhaakana Iaku inda kumembali rajana manga incia. 8 Apokana tee opea mopadhana ipewauna manga incia wakutuuna manga incia kubhawea alimba minaaka i Tana Mesir, tee sakawana i eo sii, manga incia abholiaku tee asomba aulataʼala mosagaanana, mboomo sumai uka ipewauna manga incia tee ingkoo. 9 Jadi sii-sii perangoimea opea iemanina manga incia, maka udhaniakea mpuu-mpuu tee upaumbaakea opea bhemomembalina hakuna raja moparintangina manga incia naile itu."

10 Jadi bhari-bharia firimanina KAWASANA OPU apakawaakea Samuel to manga mia bhari moemania moangkaakea samia raja. 11 Pogauna, "Siimo momembalina hakuna raja bhemoparintakomiu: Anamiu umane bheaalea to apamembalia tantarana, sagaa minaaka i manga incia bheapamembalia suludadu mosawina i karetana potimbea,* sagaa apamembalia suludadu mosawina i ajara, tee sagaa uka bheapamembalia suludadu bhemobuntulina i aroana kareta. 12 Dhaangia uka bhemotoangkana to amembali mokapalaina sarewu suludadu, tee mokapalaina lima pulu suludadu. Raja sumai bheapakisaa manga anamu to abhingkuni tanana inawuna, aromusaka hasilina tobheana, akarajaa manga ewangana potimbea tee parakakasina karetana potimbea. 13 Incia bheaala manga anamiu bhawine to apakarajaaia amembali pande jalona mina-mina mawondu, pande nasuna kinande, tee pande karajaana roti."

14 "Incia uka bheaala momalapena minaaka i kalibumiu, inawuna anggurumiu, tee inawuna zaitunmiu, kasiimpo adhawuakea to manga pagawena. 15 Mencuana soo incia sumai, maka incia bheaala uka sapulu parasee minaaka ihasilina inawumiu tee inawuna anggurumiu, kasiimpo adhawuakea to manga pagawena maligena tee manga pagawena mosagaanana."

16 "Incia bheaala manga bhatuamiu umane atawa o bhawine, tee bheaala momalapena minaaka i manga ana manguramiu,* tee keledaimiu, kasiimpo bhari-bharia sumai apakea to karajaana karona. 17 Incia uka bheaala sapulu parasee minaaka i gulumana dumbamiu, tee ingkomiu bheumembali bhatuana. 18 Ande akawa o wakutuu incia sumai, ingkomiu bheupekee roonamo raja ipilimiu sumai, maka o KAWASANA OPU inda bheaperangoia o pekeemiu sumai."

19 Maka o lipuna Israel incia sumai inda aperangoi pogauna Samuel. Manga incia apogau, "Inda! Ingkami tabeana dhaangia tee rajamami 20 mamudhaakana ingkami tapokana tee manga lipu mosagaanana! Rajamami sumai bheamangaparinta tee mangakapalai i nuncana potimbea."

21 Nabii Samuel aperangoi bhari-bharia ipogauakana manga incia, kasiimpo apakawaakea i KAWASANA OPU. 22 Firimanina KAWASANA OPU to Samuel, "Perangoimea o pogauna manga incia tee uangkaakamea samia raja to manga incia."

Kasiimpo Samuel asatujui opea iemanina manga incia tee apogau tee manga miana Israel, "Mbulimo i kotamiu samia-samia."