1 Pitu mbula o kangengena Sorongana Pojanjiana KAWASANA OPU atodhika i lipuna miana Filistin. 2 Kasiimpo miana Filistin akembamo manga imamu tee manga pande sihiri, kasiimpo aabha, "Opea bheipewaumami tee Sorongana Pojanjiana KAWASANA OPU sii? Mangapaumbaakapo tuaapa o carana mamudhaakana tapambulia pendua i tampana."

3 Manga incia alawani, "Sorongana Pojanjiana KAWASANA OPUNA miana Israel sumai bholi soo upambulia makate, maka tabeana upapooseakea tee saangu pasombaa to katolosina dosamiu. Tee mboo sumai o panyakimiu bheatopaunto, tee ingkomiu bheumataua apokia o Aulataʼalana miana Israel ahukumukomiu torotorosu."

4 Sapadhana incia sumai manga miana Filistin aabhamo uka, "Opea tabeana ipasombaakamami to katolosina dosamami tee Incia?"

Manga imamu tee manga pande sihiri sumai alawani, "Pasombaakamea lima tongka bulawa mokobhanguna mboomo kabhisu tee lima mbaa bhokoti ikarajaamiu minaaka i bulawa tee upapokanea mboomo kabharina manga raja i Kota Filistin, roonamo apokana tee balaa mopadhana mokangkanaikomiu tee uka mokangkanaina manga raja i kotamiu."

5 "Jadi ukarajaamo lima tongka bulawa mokobhanguna mboomo kabhisu tee bhokoti mopekadhakina lipumiu, kasiimpo umuliangi Aulataʼala isombana miana Israel. Maasangia Incia bheaunto ahukumukomiu tee manga dewamiu, tee aunto aumbaaka balaa i lipumiu. 6 Apokia umentagali mboomo miana Mesir tee Raja Firaun? Bholi umalingu ande o Aulataʼala amentenempearo ahukumu manga incia tee kahukumu momatamo mpuu, sampe manga incia ataroaka miana Israel alingka abholi lipuna Mesir sumai."

7 "Rampaakanamo sumai, karajaamo saangu kareta bhaau tee ubhokea i bhorokona rua mbaa sapi mangura motangasaana mopaduduna anana tee indapo mopernana motopakeakana kancodhaa to ahela kareta. Rua mbaaia o sapi sumai ubhokemea i aroana kareta, maka manga anana sapi sumai upambulia i nuncana kandana mamudhaakana inda aose inana. 8 Kasiimpo uangkamea o Sorongana Pojanjiana KAWASANA OPU sumai tee udhikaia i nuncana kareta. Dhikamea manga bulawa bheipasombaakamiu to katolosina dosamiu i nuncana saangu sorosoronga modhaangiana i saripina sorongana pojanjia sumai. Sapadhaana sumai utaroakamea o sapi sumai alingkaaka. 9 Kamatamea o lingkaana kareta sumai, ande o sorongana pojanjia sumai abhawea aporope i Kota Bet-Semes, maʼanana o Aulataʼalana miana Israel moumbaakana balaa momaoge to ingkita, maka ande inda, sumaimo ingkita bhetamataua ande mencuana Aulataʼalana miana Israel mangahukumuna, tee o giu incia sii inda atoporadhamii."

10 Manga incia aosemo opea ipogauakana manga imamu tee manga pande sihiri sumai, tee aalamo rua mbaa sapi motangasaana mopaduduna anana tee abhokea i kareta sumai, sainamo manga anana sapi sumai akurungaia i nuncana kanda. 11 Kasiimpo Sorongana Pojanjiana KAWASANA OPU sumai adhikaia i nuncana kareta apoose tee sorosoronga mokoantoakana lima tongka bulawa mokobhanguna mboomo kabhisu tee bhokoti sumai. 12 Kasiimpo rua mbaaia sapi sumai alausaka alingka i dhala oge moporopena i Kota Bet-Semes i Tana Israel. Sakaaratea dhala akomburu apalimba suarana tee inda abelo i kaai tee i kaana. Manga rajana miana Filistin sumai atorotorosu aosea sakawana i potidhaana Bet-Semes.

13 Wakutuu incia sumai manga miana Bet-Semes tangasaana atobhe gandum i mbolonga. Wakutuuna manga incia apotonto i aroana, tee akamatamo sorongana pojanjia sumai, manga incia akaunde-undemo mpuu. 14 Kareta incia sumai aunto i saangu bhatu maoge i inawuna Yosua miana Bet-Semes sumai. Kasiimpo raʼeatina kota incia sumai aweta-wetamo kauna kareta tee asumbele rua mbaaia sapi sumai to kurubani tunua ipasombaakana to KAWASANA OPU. 15 Kasiimpo manga miana Lewi* apasapomo Sorongana Pojanjiana KAWASANA OPU sumai apoose tee sorosoronga mokoantoakana bulawa sumai tee adhikaia i bhawona bhatu maoge i saao. I eo incia sumai uka manga miana Bet-Semes apasombaaka kurubani tunua tee manga kurubani isumbele to KAWASANA OPU. 16 Wakutuuna lima miaia rajana Filistin akamata bhari-bharia giu incia sumai, manga incia ambulimo i Kota Ekron i eo incia sumai uka.

17 Siimo kabhisu minaaka i bulawa ipasombaakana miana Filistin to KAWASANA OPU to katolosina dosana raʼeatina lima angua kota iparintana lima miaia rajana Filistin sumai: Satongka minaaka i Asdod, satongka minaaka i Gaza, satongka minaaka i Askelon, satongka minaaka i Gat, tee satongka minaaka i Ekron, 18 tee uka manga bhokoti minaaka i bulawa ilambokona sumai apokana tee kabharina lima angua kota iparintana lima miaia rajana Filistin sumai, minaaka i kota mokobente sakawana i kampo-kampo. Bhatu maoge tampana dhikaana Sorongana Pojanjiana KAWASANA OPU modhaangiana i inawuna Yosua miana Bet-Semes sumai uka amembali bukutiina kajadia incia sumai sakawana sii-sii.

19 Maka o Aulataʼala apekamate pitu pulu mia minaaka i raʼeatina Bet-Semes roonamo apotonto i nuncana Sorongana Pojanjiana KAWASANA OPU sumai, sabutuna manga incia amaporomo mpuu incana roonamo KAWASANA OPU apakotibuakea balaa momaoge mpuu. 20 Kasiimpo apogaumo manga miana Bet-Semes, "Incema momembalina mopoarona tee KAWASANA OPU o Aulataʼala momangkilo sii? Inda samia uka momembalina! Talambokoa to incema o sorongana pojanjia sii mamudhaakana inda tamate bhari-bharikita?"

21 Kasiimpo manga incia alambokomo pia mia potoloweana to raʼeatina Kota Kiryat-Yearim tee aposamea, "Miana Filistin padhamo apambulia pendua o Sorongana Pojanjiana KAWASANA OPU. Umbamo tee uangkamea o soronga sumai tee ubhawea i tampamiu."