1 Kasiimpo Nahas* rajana Amon sumai aumba apokema tee akapalai suludaduna to ahumbuni Kota Yabes i lipu Gilead. Bhari-bharia raʼeatina Yabes apogau tee Nahas, "Padhaangiamo pojanjia tee ingkami, sumaimo ingkami bhetaose parintamu."

2 Maka o Nahas miana Amon sumai alawani, "Iaku bhekupadhaangia pojanjia tee ingkomiu ande uunda utarima saangu hali, siitumo bhari-bharia mata kaanamiu tabeana kupintokia amembaliaka giu imaeaakana bhari-bharia miana Israel."

3 Lawanina manga mancuanana Kota Yabes, "Mangadhawupo wakutuu kangengena pitu eo mamudhaakana amembali talamboko potoloweamami i saangua lipuna Israel. Ande inda dhaangia mangapasalaamatina, siimpo ingkami tapasaraakaaka karomami to ingkoo."

4 Wakutuuna manga potoloweana sumai akawa i Kota Gibea imbooresina Raja Saul, manga incia apakawaakamo lele incia sumai i miana Israel, sabutuna manga miana Israel amaasimo tee atangimo tee suara momakaa. 5 Wakutuu incia sumai o Saul siimpomo aumba minaaka i inawuna tee incia adhaangia i talikuna sapina, kasiimpo aabha, "Dhaangia tee opea? Apokia manga mia aposatangi?" Kasiimpo manga incia apetulatulaakamo lele ibhawana potoloweana manga miana Yabes sumai.

6 Sarangona lele incia sumai o Saul akuasaimea Rohina Aulataʼala, tee incia aʼamaramo mpuu. 7 Saul aalamo rua mbaa sapi tee atumpo-tumpoa, kasiimpo alambokoakea to saangua lipuna Israel alaloi pia mia potoloweana tee aposamea, "Incema-incema inda moosena Raja Saul tee Nabii Samuel to apotimbe, sumaimo o sapina manga incia bheatotumpo-tumpo uka mboo sii." Kasiimpo KAWASANA OPU apekaeka bhari-bharia miana Israel, sabutuna bhari-bharia miana Israel alingka to apotimbe roonamo amaeka tee Saul. 8 Wakutuuna Saul aromusaka tee agagari kabharina manga incia wakutuuna i Bezek, kabharina miana Israel dhaangia 300.000 mia, tee o miana Yuda dhaangia 30.000 mia.

9 Sapadhana incia sumai o Saul apogaumo tee manga potoloweana sumai, "Pakawaakamea to manga raʼeatina Kota Yabes-Gilead, ande naile pontanga eo manga incia bheatopasalaamatimo." Kasiimpo manga potoloweana sumai alingkamo tee apakawaaka giu incia sumai to miana Yabes. Sarangona lele incia sumai manga incia akaunde-undemo mpuu. 10 Maka apogaumo raʼeatina Yabes tee Nahas, "Naile ingkami bhetapasaraakaaka karomami to ingkoo, tee upewaumo opeapo uka iabhimu momalapena to ingkami."

11 Samainawana o Saul abagemo raʼeati mopadhana iromusakana sumai amembali talu kolompo suludadu. Saraneeona manga incia apesuaikimo pokemaana miana Amon. Indapo apontanga eo, suludaduna Saul padhamo apekatalo musuna. Manga miana Amon sumai apontalesaka sampe inda dhaangia motokamatana rua mia momembalina mopoosena mobuntuli.

12 Kasiimpo apogaumo raʼeatina Israel tee Samuel, "Ande dhaangia manga mia inda mosatujuina Saul to amembali rajata, sumaimo manga incia ubhawamea iwe sii mamudhaakana tapekamatea!"

13 Maka o Saul alawani, "Inda samia uka i eo sii momembalina motopekamate, roonamo i eo sii o KAWASANA OPU padhamo apasalaamati miana Israel."

14 Sumaimo o Samuel apogaumo tee manga incia, "Maimo talingkaaka i Gilgal to talantiaka Saul pendua amembali rajata iwe sumai!" 15 Kasiimpo saangua lipuna Israel sumai alingkamo i Gilgal. Iwe sumai o Saul atolanti amembali raja i aroana KAWASANA OPU, tee apasombaakea manga kurubani pomalapea. Saul tee bhari-bharia miana Israel akaunde-unde mpuu iwe sumai.