1 Miana Filistin aromusaka bhari-bharia suludaduna i Kota Afek, sainamo tantarana Israel apokema i saripina matana uwe i Mbolongana Yizreel. 2 Sumaimo manga raja mominaakana i manga kotana Filistin adhala abarisi i nuncana kolompona saatu suludadu tee sarewu suludadu. Daud tee manga ana buana uka adhala abarisi i taliku apoose tee Raja Akhis. 3 Kasiimpo apogaumo manga kapitana tantarana Filistin sumai, mboo sii, "Opea akarajaa manga suludaduna Ibrani sii?"

Lawanina Raja Akhis, "Siimo o Daud, bhatuana Saul rajana Israel momboorena tee iaku kangengena sii. Inda saangu kasalaha uka ipotibhaakaku kangengena incia iwe sii sakawana i eo sii."

4 Maka manga kapitana tantarana Filistin sumai aʼamara tee Raja Akhis tee apogau, "Tumpua o mia incia itu ambuliaka i kota mopadhana idhawuakamu to incia, tee bholi alingka apotimbe apobhawa tee ingkita; ancosala amembali bhalita i nuncana potimbea! Roonamo giu incia sumai bheamembali kalalesana to aala incana rajana tee cara apekamate manga tantarata. 5 ✝Buaka o mia incia sii o Daud, ilaguakana manga mia apoose amanari mboo sii,

"Saul apekamate rewu-rewuna mia,

maka o Daud pulu-puluna rewu mia."

6 Kasiimpo Raja Akhis akemba Daud tee aabhakia, "Iaku kuposumpa to sarona KAWASANA OPU modhadhi, iaku kuparacaea ande ingkoo sii o mia mojujuru tee utaʼati tee iaku. Iaku bheamasanaa o ngangarandaku ande umembali upoose tee iaku i nuncana potimbea sii. Roonamo pepuu minaaka i umbaamu sakawana sii-sii, iaku inda kupotibhaaka saangu kasalahamu uka. Maka manga raja mosagaanana inda apeeluko. 7 Rampaakanamo sumai, mbulimo, lingkamo tee kasalaamati tee bholimo upewau giu iʼamaraakana manga raja mominaakana i manga kotana miana Filistin sumai."

8 Maka o Daud alawani Raja Akhis, "E Opuku, kasalaha opea mopadhana ipewauku? Ingkoo inda upotibhaaka saangu kasalahaku uka mboomo ipogauakamu pepuu minaaka kulaianiko sakawana sii-sii. Maka apokia inda uundaakaaku to kupotimbe kupoewangi tee musumu?"

9 Kasiimpo Raja Akhis alawani Daud, "Iaku kumataua; i mataku ingkoo sii umalape mboomo malaaʼekatina Aulataʼala. Maka manga kapitana tantarana Filistin sumai amambotuakako mamudhaakana inda amembali uose potimbea upobhawa tee ingkami. 10 Rampaakanamo sumai, naile saeona mpuu ingkoo tee bhari-bharia mia mopadhana mobholina Saul, tabeana umbulimo pekadhei i kota mopadhana idhawuakaku to ingkoo sabhetena matana eo."

11 Sumaimo saeona mpuu o Daud tee manga ana buana ambulimo i lipuna Filistin, sainamo tantarana Filistin amajumo aporope i Mbolongana Yizreel.