1 ✝Kasiimpo Daud apalaiaka karona minaaka i Kota Gat tee aopo i lia momakasuna tee Kota Adulam. Manga akana tee bhari-bharia witinaina aumba to apokawaakea wakutuuna manga incia arangoa ande o Daud adhaangia iwe sumai. 2 Tee dhaangia uka manga mia motopisaki, mia mokodhosa, mia momapiina incana aposaumba tee aposaangu tee Daud, tee o Daud amembali kapalana manga incia. Kabharina manga incia kera-kera dhaangia pata atu umane.

3 Kasiimpo minaaka i lia sumai o Daud alingka i Kota Mizpa modhaangiana i Tana Moab tee apogau tee rajana Moab, "Iaku kuemani mpuu mamudhaakana o amaku tee inaku amembali amboore iwe sii sakawana kumataua opea bheipewauna Aulataʼala to karoku." 4 Kasiimpo Daud abhawa mancuanana i rajana Moab, tee manga incia asadhaadhaa amboore tee rajana Moab kangengena Daud amboore i nuncana tampana potaangiana sumai.

5 Maka dhaangia samia nabii mokosaroakana Gad mopogauna tee Daud, "Bholi umboore i nuncana tampana potaangiamu sii, maka ulingkamo tee umbulimo i Tana Yehuda." Kasiimpo o Daud alingkamo tee apesua i Koona Keret.*

6 Raja Saul arango lele ande dhaangia tee mia mokamatana tampana opoana Daud tee manga mia mopoosena tee incia. Wakutuu incia sumai o Saul tangasaana auncura tee akeni pandanga i tambena puuna tamariska i bhawona kabumbu i Kota Gibea tee abulilingia manga pagawena. 7 Saul apogau tee manga pagawena, "E manga witinaiku miana Binyamin, rangoa! Buaka o anana Isai sumai bheadhawuakakomiu tana tee inawuna angguru ande incia amembali rajana Israel? Buaka incia bheaangkakomiu to umembali kapitana sarewu suludadu atawa o kapitana saatu suludadu? 8 Aipomo rampaakanamo incia sumai ingkomiu upomufakati to ubhaliaku! Apokia ingkomiu inda samia uka mopaumbaakaaku ande o anaku padhamo abhoke pojanjia tee anana Isai sumai? Inda samia uka mominaakana ingkomiu momaheruakaaku atawa mopaumbaaku ande o anaku padhamo awuju pagaweku to aewangiaku sabutuna incia asiapu to ahumbuniaku mboomo momembalina eo sii."

9 ✝Wakutuu incia sumai o Doʼeg miana Edom sumai akabhale-bhale i saripina pagawena Saul tee apogau, "Wakutuuna i Kota Nob iaku kukamata anana Isai sumai aumbati Imamu Ahimelekh bin Ahitub. 10 Ahimelekh aabha i KAWASANA OPU pokaiana tee opea tabeana bheipewauna Daud. Incia uka adhawuakea roti tee hancuna Goliat miana Filistin sumai to Daud."

11 Kasiimpo Raja Saul atumpumo mia to alingkaaka akemba Imamu Ahimelekh bin Ahitub tee bhari-bharia witinaina, siitumo manga imamu i Kota Nob. Sumaimo manga incia aumbamo to apoaro tee Raja Saul.

12 Pogauna Saul, "E anana Ahitub, rangoa."

Lawanina, "Umbe, Opuku."

13 Kasiimpo aabhamo o Saul i Imamu Ahimelekh, "Apokia ingkoo tee anana Isai sumai upomufakati to ubhaliaku? Apokia udhawuakea roti tee samata ewanga tee uka uabha i KAWASANA OPU pokaina tee opea bheipewauna? Rampaakanamo kahambamu sumai, sabutuna sii-sii incia abhaliaku tee tangasaana apeeloakaaku wakutuu to apekamateaku."

14 Lawanina Imamu Ahimelekh, "Incema buaka o bhatuamu molabhina kataʼatina minaaka i Daud? Ntaranamo uka incia o ana maniamu tee o kapitana manga suludadu mojaganina raja tee bhari-bharia mia modhaangiana i nuncana maligemu ahoromatia. 15 Buaka siimpo eo sii iaku kuabha i Aulataʼala pokaina tee opea tabeana bheipewauna Daud? Inda! E raja, bholi uraeakaaku tee manga witinaiku pokaiana tee manga parakara incia sumai, roonamo bhari-bharia giu incia sumai inda kumataua."

16 Maka o Raja Saul apogau tee Ahimelekh, "Inda, ingkoo tee bhari-bharia witinaimu tabeana utopekamate!"

17 Kasiimpo Raja Saul apogau tee manga suludaduna mokabhale-bhalena i saripina, "Pekamatemea manga imamuna KAWASANA OPU sumai, roonamo manga incia aewaaka Daud. Manga incia amataua ande o Daud apalaiaka karona, maka manga incia inda apaumbaakaaku."

Maka manga pagawena raja sumai amendeu apekamate manga imamuna KAWASANA OPU.

18 Kasiimpo Raja Saul apogau tee Do'eg miana Edom sumai, "Majumo tee upekamatea manga imamu sumai!" Sumaimo o Do'eg amajumo tee apekamate bhari-bharia imamu modhaangiana iwe sumai. I eo incia sumai o Doʼeg apekamate walu pulu lima mia imamu mopakena bhaju efod minaaka i kae lenan. 19 Incia uka apekamate bhari-bharia raʼeatina Kota Nob, siitumo kotana manga imamu sumai. Malape umane, bhawine, anaana maidhiidhi atawa o anaana dhaangiapo modudu, sapi, keledai, tee dumba uka apekamateakea tee hancu.

20 Maka dhaangia samia minaaka i anana Ahimelekh bin Ahitub, mokosaroakana Abyatar momembalina mopalaiakana karona tee alausaka aposaangu tee Daud. 21 Abyatar apetulatulaakea i Daud ande o Saul padhamo apekamate manga imamuna KAWASANA OPU. 22 Pogauna Daud i Abyatar, "Wakutuuna kukamata Doʼeg miana Edom adhaangia iwe sumai, iaku kumataua ande incia dhaanamo bheakabarataakaaku i Saul. Jadi iakumo mosababuakana matena bhari-bharia witinaimu. 23 Mbooremo tee iaku, bholi umaeka, roonamo mia bhemopekamateko sumai o mia bhemopekamateaku uka. Ingkoo bheuʼamani umboore tee iaku."