1 ✝Wakutuu incia sumai o tantarana Filistin apotimbe tee tantarana Israel. Tantarana Israel apalaiaka karona minaaka i tantarana Filistin tee abhari momatena i Gunu Gilboa. 2 Kasiimpo tantarana Filistin apajere Raja Saul tee manga anana. Manga incia apekamate Yonatan, Abinadab, tee Malkisua. 3 Tee o Saul adhaangia i tanga-tangana potimbea ogena sumai. Saul akamatamea manga pande panana miana Filistin, sumaimo incia atopana sabutuna amaoge mpuu o kambelana.

4 Kasiimpo Saul apogau tee pande kenina ewangana, "Hobutimea o hancumu tee utobhokiakumo, mamudhaakana inda amagamagasiaakaaku tee apekamateaku manga mia inda mototandaki sumai."

Maka o pande kenina ewangana sumai amendeu atobhokia, roonamo amaeka mpuu. Sumaimo o Saul aalamo hancuna karona kasiimpo apakotibu karona i bhawona hancu sumai. 5 Wakutuuna pande kenina ewanga sumai akamatea ande o Saul amatemo, incia uka apakotibumo karona i bhawona hancuna, sabutuna incia amate aposari tee Saul. 6 Mboomo sumai o Raja Saul tee talu miaia anana, pande kenina ewangana tee bhari-bharia ana buana amate i eo incia sumai uka.

7 Wakutuuna manga miana Israel momboorena i sawetana Mbolongana Yizreel tee i sawetana timbuna Umala Yordan arango ande o tantarana Israel apalaiakamo karona, tee o Saul tee manga anana amatemo, manga incia apalaiakamo uka karona tee abholi manga kotana. Kasiimpo aumbamo miana Filistin to ambooresi manga kota incia sumai.

8 Saeo sapadhana incia sumai, wakutuuna miana Filistin aumba to arampasi barana manga mia momate, manga incia apotibhaaka uka maeatina Saul tee talu miaia anana i Gunu Gilboa. 9 Manga incia atumpo bhaana Saul, aala ewangana tee katangkesina, kasiimpo atumpumo potumpuana to atiingi tanana Filistin to apakawaaka lele incia sumai i tampana barahalana manga incia tee i raʼeati. 10 Manga incia adhika manga ewangana Saul i nuncana tampana barahalana dewi Astoret, kasiimpo maeatina Saul apasoa i rindina Kotana Bait-Sean.

11 Wakutuuna manga miana Yabes modhaangiana i Gilead arango opea mopadhana ipewauna miana Filistin tee Saul, 12 sumaimo bhari-bharia hiri alingka i Bait-Sean; manga incia samaloa inda aunto adhala ae minaaka i lingkaana. Tee sakawana iwe sumai, manga hirina Yabes aalamo tee apasapomo maeatina Saul tee manga anana minaaka i rindina kota sumai tee apambulia i Yabes kasiimpo atunua. 13 Bhari-bharia bukuna aromusakea tee akoburua i tambena puuna tamariska i Kota Yabes sumai, kasiimpo manga incia apoasa kangengena pitu eo.