1 ✝Kasiimpo Hana adoʼa, pogauna,

"KAWASANA OPU apaunde-unde ngangarandaku tee o KAWASANA OPU adhawuaku kakaa.

Muncuku ahina musuku

sababuna iaku kukaunde-unde roonamo katulungimu.

2 Inda dhaangia momangkilona mboomo KAWASANA OPU.

Inda dhaangia mosagaanana, tangkanamo Ingkoo,

inda dhaangia o gunu bhatu mboomo Aulataʼalata.

3 Bholi sadia amalanga bhatangana pogaumu,

bholi dhaangia o pogau mosombo molimbana minaaka i ngangamu

roonamo KAWASANA OPU Momatauna bhari-bharia giu

tee Incia mohaakimuna bhari-bharia pewauna maanusia.

4 Panana manga hiri atokatuki,

maka manga mia momalute amakaamo.

5 Mia momambosu i piamo itu sii-sii aasomo karona to apotibhaaka kinande,

maka o mia momaara i piamo itu sii-sii amalompomo.*

Bhawine mokombana i piamo itu sii-sii apalaahirimo pitu mia anaana,*). Ande tabaca aʼeati 21, sapadhana Hana apalaahiri Samuel, incia apalaahirimo uka talu mia ana umane tee rua mia ana bhawine.

maka o mia mobharina anana i piamo itu, sii-sii amalaumo.

6 KAWASANA OPU apadhadhi tee apekamate maanusia;

Incia apasapo mia i nuncana duniana mia mate tee aangkea minaaka i iwe sumai.

7 KAWASANA OPU apamisikini tee aparangkaea mia;

Incia apekatambe tee apamembali mia atohoromati.

8 Incia aangka mia momisikini minaaka i nuncana ngawuna tana,

tee aangka mia mokakuranga minaaka i nuncana karombu

to apauncuraia apobhawa tee manga lalaki

tee apamembalia akokauncuramakaaka kurusii motohoromati.

Roonamo ariina alamu o pewauana KAWASANA OPU,

tee adhikaakea dunia i bhawona.

9 Bhengkalana manga mia mosaalihi bheajagania,

maka o mia madhaki bheahancuru i nuncana kalalanda

roonamo mencuana aminaaka i kakaamami imembaliakamami takana minaaka i manga musumami.

10 KAWASANA OPU bheapahancuru mia mopotagalina tee Incia.

To manga incia o KAWASANA OPU bheapasapo guntu minaaka i laiana.

KAWASANA OPU bheahaakimu maanusia sakawana i tapana dunia.

Incia bheadhawuaka kakaana to manga raja ipilina

tee apajaea mia ilantina."*

11 Kasiimpo Elkana ambuli i bhanuana i Kota Rama, sainamo Samuel amboore i Silo to alaiani KAWASANA OPU tee ajagania Imamu Eli.

12 Manga anana Eli satotuuna manga umane inda mokoguna. Manga incia inda aose parintana KAWASANA OPU 13 tee wakutuuna amembali imamu manga incia sainca-incana tee raʼeatina Israel. Ande dhaangia o mia mopasombaakana kurubani, mia molaianina imamu* aumba abhawa garupuu talu mataana. Wakutuuna dagina kurubani sumai tangasaana atonasu, 14 garupuu sumai atopake to asusuaka dagi modhaangiana i nuncana panci, kawali, balanga atawa o poluka, tee opeapo uka iangkana garupuu sumai bheaalea imamu to karona. Mboomo sumai ipewauna manga incia tee bhari-bharia miana Israel moumbana i Silo. 15 Sampe o mia molaianina imamu sagaa aumba wakutuuna indapo atotunu o tabhana kurubani sumai tee apaumba mia mopasombaakana kurubani sumai, "Dhawuakamea o dagi momamata sumai to imamu mamudhaakana atunua, roonamo incia amendeu atarima dagi motonasu minaaka i ingkomiu, maka tabeana momamatana."

16 Ande o mia incia sumai alawani, "Tabhana tabeana aporikanapo atotunu; sapadhana sumai kasiimpo amembali ualea peepeeluamu." Sumaimo mia molaianina imamu sumai alawani, "Inda, sii-sii uka udhawuakaaku, ande inda bhekupakisaaia kualea!"

17 Tee mboomo sumai rua miaia anana Eli sumai apewau dosa momaoge i aroana KAWASANA OPU, roonamo manga incia apandaʼente pasombaana kurubani to KAWASANA OPU.

18 Wakutuu incia sumai o Samuel dhaangiapo anaana tee atorosu alaiani KAWASANA OPU. Incia apake bhaju efod*. minaaka i kae lenan. 19 Satao-satao inana akarajaakea satuwu juba maidhiidhi kasiimpo abhawaakea to Samuel wakutuuna inana tee amana apobhawa aumba i Silo to apasombaaka kurubani satao-satao. 20 Satao-satao Eli aemani i KAWASANA OPU to abarakatiaka Elkana tee Hana. Incia apogau tee Elkana, "Maasangia o KAWASANA OPU adhawuakako siwulu minaaka i bhawinemu sii, to abholosiaka anaana mopadhana iemanimu tee doʼa tee ipasaraakaakamu to KAWASANA OPU." Sapadhana sumai manga incia ambulimo i mbooresana. 21 Hana aperangoia KAWASANA OPU, sabutuna incia abhawa-bhawamo tee apalaahirimo talu mia ana umane tee rua mia ana bhawine. Samuel momangurana dhadhina sumai uka ahandamo ajulu o kaogena i aroana KAWASANA OPU.

22 Eli amancuanamo mpuu. Incia arango bhari-bharia giu ipewauna manga anana to manga miana Israel. Tee o Eli amataua uka ande manga incia akole tee manga bhawine motugasina i aroana bhambana Kemana KAWASANA OPU. 23 Eli apogau tee manga incia, "Apokia ingkomiu upewau manga giu incia sumai? Iaku kurango lele minaaka i saangua lipu sii o pokaina tee pewaumiu momadhakina sumai. 24 Bholi upewau mboo itu manga anaku. Amadhaki mpuu opea ipogauakana uumatina KAWASANA OPU to ingkomiu! 25 Ande o mia akodosa tee mia mosagaanana, sumaimo Aulataʼala momembalina mopapomalapea pendua; maka ande o mia mokodosana tee KAWASANA OPU, incema momembalina potoloweana?"

Maka manga incia inda aperangoi pogauna amana, roonamo KAWASANA OPU gauna apekamate manga incia.

26 Samuel momangurana dhadhina sumai ahandamo ajulu o kaogena tee ahandamo amaasiakea KAWASANA OPU tee bhari-bharia mia.

27 Saangu wakutuu samia nabiina Aulataʼala aumba i Eli tee apogau, "Perangoimea o firimanina KAWASANA OPU sii, 'Iaku kususuaka karoku to Harun opu-opuamu tee bhari-bharia siwuluna i wakutuuna uumatiku dhaangiapo amembali bhatua i lipuna Mesir tee wakutuuna akuasaia rajana Mesir. 28 ✝Iaku padhamo kupili Harun minaaka i tanga-tangana miana Israel to amembali imamu mobhaa-bhaana mopasombaakana kurubani i bhawona tampana tunuana kurubani, to motununa dhupa, tee mopakena bhaju efod i aroaku. Kasiimpo to ingkomiu momembalina siwuluna Harun, Iaku padhamo kudhawuakakomiu kalaiani mohususu to upasombaaka bhari-bharia kurubani itunu idhawuakana miana Israel. 29 Apokia ingkomiu upandaʼente kurubani mopadhana iparintaakaku to ipasombaaka i tampana mbooresaku? Apokia ingkoo ulabhi uhoromati manga anamu tee Iaku, tee upekaoge bukumiu minaaka uala wetana dagina kurubani momalape ipasombaakana miana Israel?' "

30 "Jadi mboomo sumai o firimanina KAWASANA OPU, Aulataʼala isombana miana Israel, 'Satotuuna Iaku padhamo kufirimani, ande o keluargamu tee siwulumu bhealaianiaku saʼumurua, maka sii-sii, amaridhomo giu incia sumai tee Iaku! Incema o mia mohoromatiaku, Iaku bhekuhoromatia, tee incema o mia mohinaaku incia bheahina i mataku, mboomo sii o firimanina KAWASANA OPU.' 31 Satotuuna bheakawamo wakutuuna bhekukatuki kuasamu tee kuasana siwuluna opu-opuamu, sabutuna inda dhaangia samia uka momatuʼana umuruna i nuncana keluargamu. 32 Sampe ingkoo uka bheukamata balaa akangkanai tampana mbooresaku! Pepuu sii-sii tee sakawana saʼumurua, manga mia mosagaanana i tanga-tangana miana Israel bheapotibhaaka pegiu-giuna kabarakati, maka minaaka i tanga-tangana siwulumu inda dhaangia mokoʼumuruna marambe! 33 Incemapo uka minaaka i siwulumu dhaangiapo modhadhina tee motoundaakana mokandena dagina kurubani i tampana tunuana kurubaniku, sumaimo bheapekawiloa matamu tee incamu bheapekaporoa. Roonamo bhari-bharia siwulumu mosagaanana bheamate wakutuuna dhaangiapo amangura dhadhina."

34 "Tee opea bhemomembalina tee rua mia anamu, siitumo Hofni tee Pinehas, bheamembali tanda to ingkoo ande bhari-bharia ifirimaniakana i saao bheatopamondo; rua miaia bheamate i eo mopokana. 35 Kasiimpo iaku bhekuangka samia imamu motaʼatina tee moosena opea iparintaakaku. Incia bhekudhawuakea siwulu motaʼati to amembaliaka imamu modhadhina i aroana manga raja ipiliku. 36 Bhari-bharia bhilaana siwulumu dhaangiapo modhadhina bheaumba tee asuju tee apekatambe karona i aroana imamu incia sumai to aemani doi tee kinande apoose apogau, 'Undaakaaku kuhamba manga imamu sumai, mamudhaakana amembali kukande moomini soo satumpo roti.' "