1 Sapadhana miana Filistin arampasi Sorongana Pojanjiana KAWASANA OPU, sorongana pojanjia sumai abhawamea minaaka i Kota Eben-Haezer sakawana i Kota Asdod i Filistin. 2 Kasiimpo miana Filistin abhawamo Sorongana Pojanjiana KAWASANA OPU sumai to apapesuaia i nuncana tampana sombaana dewa Dagon tee adhikaia i saripina patuna dewa Dagon. 3 Saeona mpuu, miana Asdod abhangumo tee akamatamo patuna dewa Dagon apaubhomo tee o rouna atumpu i tana i aroana Sorongana Pojanjiana KAWASANA OPU. Kasiimpo patuna dewa Dagon sumai aangkea tee apambulia i tampana. 4 Samainawana dhaangiapo saeona mpuu manga incia abhangumo, tee akamatamo patuna dewa Dagon apaubhomo uka pendua i aroana Sorongana Pojanjiana KAWASANA OPU sumai. Sainamo bhaana tee rua mbalia limana amakatu tee amandawu apekadole-dole sakawana i dhopi modhaangiana i tambena bhamba, tee soomo badana modhaangiana i aroana sorongana pojanjia sumai. 5 Rampaakanamo sumai, sakawana sii-sii manga imamuna dewa Dagon tee bhari-bharia mia mopesuana i tampa sambaheaana dewa Dagon amendeu apolanda i dhopi i tambena bhambana tampana sambaheaana dewa Dagon i Asdod sumai.

6 Kasiimpo KAWASANA OPU adhawuakea kahukumu momatamo to manga miana Asdod tee manga lipu i saripina, siitumo ahukumuakea tee panyaki kabhisu mokonana* i badana manga incia. 7 Sapadhana akamata manga kajadia incia sumai, manga miana Asdod apogaumo, "Sorongana Pojanjiana KAWASANA OPUNA miana Israel sii inda amembali amboore tee ingkita, roonamo ingkita tee Dagon momembalina dewata sumai dhaanamo amakaa mpuu mangahukumuaka tee limana." 8 Rampaakanamo sumai manga incia aemani mamudhaakana bhari-bharia rajana miana Filistin* aporomusaka, kasiimpo manga incia aabha, "Opea bheipewauta tee Sorongana Pojanjiana KAWASANA OPUNA miana Israel sii?"

Manga raja sumai alawani, "Papindamea o Sorongana Pojanjiana KAWASANA OPUNA miana Israel sumai i Kota Gat." Sumaimo manga incia apapindamea o Sorongana Pojanjiana KAWASANA OPUNA miana Israel sumai.

9 Maka satopapindana sorongana pojanjia sumai i Kota Gat, KAWASANA OPU aumbaakamo kahukumu momaoge i kota incia sumai tee atobungkemo raʼeatina Kota Gat minaaka i anaana sakawana i mancuana, siitumo ahukumuakea tee kabhisu mokonana i badana* manga incia. 10 Kasiimpo Sorongana Pojanjiana KAWASANA OPU sumai alambokoa i Kota Ekron.

Sakawana Sorongana Pojanjiana KAWASANA OPU sumai i Kota Ekron, apekeemo o raʼeatina Ekron, pogauna, "Manga incia apapinda Sorongana Pojanjiana KAWASANA OPU miana Israel iwe sii to apekamateaka raʼeatina liputa!" 11 Rampaakanamo sumai, manga incia akembamo bhari-bharia rajana kotana miana Filistin to aporomusakaaka pendua, kasiimpo manga incia apogau, "Tulungi pekaridhoa o Sorongana Pojanjiana KAWASANA OPUNA miana Israel sii tee upambulia i tampana bhaa-bhaana. Ande inda, bhari-bharikita bheamangapekamate dewana manga incia!" Saangua kota incia sumai atobungke rampaakanamo katamona kahukumuna Aulataʼala. 12 Manga mia inda momate ahukumuakea tee kabhisu mokonana, sabutuna o pekeena raʼeatina kota incia sumai akawea o laiana.