1 Dhaangia samia umane morangkaea mokosaroakana Kis bin Abiel, bin Zeror, bin Bekhorat, bin Afiah mominaakana i suku Binyamin. 2 Incia dhaangia tee anana umane momakesana rouna tee momalangana badana mokosaroakana Saul.* Minaaka i tanga-tangana miana Israel inda samia uka molabhina kakesana minaaka i Saul sii. Rampaakanamo kalangana badana sumai, bhari-bharia miana Israel soo adhika i awaana.

3 Saangu wakutuu o Kis akailangamo bhari-bharia keledai bhawinena, sabutuna o Kis apogaumo tee Saul, "Bhawamo samia o mia molaianiko, tee ulingkamo upeelo manga keledai sumai." 4 Kasiimpo manga incia alingkamo apeelo manga keledai sumai i lipu Salisa tee i lipu Saalim alaloi manga gununa lipuna suku Efraim, maka o keledai sumai inda apotibhaakea uka. Sapadhana incia sumai manga incia alingkamo uka apeeloa i lipuna suku Binyamin, maka asadhaadhaa inda apotibhaakea uka.

5 Wakutuuna manga incia akawa i lipu Zuf, Saul apogaumo tee sampoosena sumai, "Maimo tambuliaka, ancosala o amaku alabhimo kameriakana tee ingkita tee ameriaka manga keledai bhawinena sumai."

6 Maka o sampoosena sumai alawani, "Antagipo, i kota incia sii dhaangia tee samia bhatuana Aulataʼala motohoromatina mpuu, tee bhari-bharia ipogauakana sadia abanara tee akobukutii. Maimo talingkaaka iwe sumai sii-sii, aipomo incia amembali mangapaumbaaka iapai o tampana manga keledai sumai."

7 Lawanina Saul, "Maka ande ingkita talingka iwe sumai, opea bheibhawata to incia? Bhari-bharia bhakuta atopadhamo tee indamo dhaangia o kadhawu momembalina ibhawata to bhatuana Aulataʼala sumai, buaka dhaangiapo momembalina ibhawata?"

8 Sampoosena sumai alawani Saul, "Iaku dhaangia tee satibha doi peraku, tee bhekudhawuakea to bhatuana Aulataʼala sumai mamudhaakana mangapaumbaaka i iapai o tampana manga keledai sumai. 9 (I piamo itu i Israel, ande o mia apeelo opea ipeeluna Aulataʼala, manga incia bheapogau mboo sii, "Maimo talingkaaka i pande pekilala," roonamo isarongiaka nabii sii-sii, i piamo itu atosarongi pande pekilala.)

10 Kasiimpo apogaumo Saul tee sampoosena sumai, "Fikirimu itu amalape, maimo talingkaaka." Sumaimo manga incia alingkamo i kota mbooresana bhatuana Aulataʼala sumai.

11 Wakutuuna manga incia apangara i dhala mokokabumbu moporopena i kota, manga incia apokawa tee pia mia kabuabua molingkana to motambuna uwe i sumu. Manga incia aabhamo i manga kabuabua sumai, "Dhaangia tee pande pekilala iwe sii?"

12 Manga kabuabua sumai alawani, "Umbe dhaangia, incia siimpo padha adhala iwe sii, ande umadhei aipomo amembali ututunia. Incia siimpo akawa i kota i eo sii, roonamo i eo sii abhari o mia moumbana to mopasombaakana kurubani to Kawasana Opu i tampana ibaadati. 13 Ingkomiu umembali upokawaakea wakutuuna upesua i nuncana kota, kananteana incia indapo akande i tampana ibaadati. Manga kakemba indapo bheamembali akande ande incia indapo akawa to aporikana abarakati manga kurubani sumai. Ingkomiu salabhina umadheimo ututunia roonamo sii-siimo wakutuumiu to upokawaakea."

14 Sumaimo manga incia alingkamo i kota incia sumai. Sapesuana i kota, manga incia apokawamo tee Nabii Samuel motangasaana moporopena i tampana ibaadati.

15 Saeo indapo umbaana Saul iwe sumai, KAWASANA OPU padhamo aposamea tee Samuel mboo sii, 16 "Naile kera-kera i wakutuu mboo sii, Iaku bhekulambokoakako samia umane mangura minaaka i lipuna suku Binyamin. Incia uminakia to amembaliaka rajana miana Israel. Incia bheapasalaamati uumatiku minaaka i kuasana miana Filistin, roonamo Iaku padhamo kukamata kanarakaana uumatiku, tee o pekeena manga incia aemani tulungi kuperangoimea."

17 Wakutuuna Samuel akamata Saul, KAWASANA OPU afirimanimo, "Siimo o mia ipogauakaku tee ingkoo; miamo incia sii bhemoparintana uumatiku."

18 Wakutuu incia sumai uka o Saul apasari i Samuel i saripina bhambana lawa tee apogau, "Tulungi paumbaakaaku i iapai o bhanuana pande pekilala sumai?"

19 Samuel alawani Saul, "Iakumo pande pekilala sumai! Penemo porikana i kabumbuna tampana ibaadati, roonamo eo sii ingkomiu bheukande upobhawa tee iaku. Naile saeona sagala giu iabhaakamu bhekupaumbaakako, tee sapadhana incia sumai ingkoo umembalimo umbuli. 20 Pokaiana tee keledai bhawine momambuuna talu eo molapana sumai bholimo umaheruakea roonamo atokamatamo. Maka ingkoo tee keluargamu momembalina giu iharapuna mpuu miana Israel!"

21 Saul alawani, "Iaku sii kuminaaka i lipuna Binyamin, lipu momaidhiidhina mpuu i tanga-tangana lipuna Israel, tee manga witinaiku uka o mia maidhiidhi i tanga-tangana suku Binyamin. Pokia ingkoo upogau mboo sumai tee iaku?"

22 Sapadhana sumai o Samuel akembamo Saul tee sampoosena to apesua i nuncana kamara maoge i saripina tampana pasombaana kurubani sumai, tee atumpua auncura i kauncuramaka motohususuaka to mia motohoromati. Manga kakemba sumai o kabharina kera-kera talu pulu mia. 23 Kasiimpo Samuel apogau tee pande nasuna kinande, "Bhawaakaakumo dagi idhikaku tee isameaakaku i saao, tee udhikamea iwe sii."

24 Kasiimpo pande nasuna kinande sumai aalamo dagina paana kurubani sumai, tee adhikamea i aroana Saul. Pogauna Samuel, "Kamatamea o dagi mopadhana igaatiku motodhikana i aroamu sii. Kandemea, roonamo dagi incia sii padhamo kudhikaakako pepuu minaaka kupogau, 'Iaku padhamo kukemba mia bhari.' " Sumaimo o Saul akandemo tee Samuel i eo incia sumai.

25 Sapadhana incia sumai manga incia asapomo minaaka i tampana ibaadati sumai tee ambulimo i kota, tee o Samuel akoja-kojamo tee Saul i bhawona padhana bhanuana.

26 Saeona manga incia abhangumo, tee o wakutuu incia sumai o matana eo apepuumo abhete, Samuel agoraaka Saul i bhawona padhana bhanua sumai tee apogau, "Bhangumo, iaku bhekuʼantarako umbuli." Saul uka abhangumo kasiimpo manga incia alingkamo. 27 Wakutuuna manga incia asapo i potidhaana kota, apogaumo Samuel tee Saul, "Tumpumea o sampoosemu sumai alingkaaka porikana." Kasiimpo sampoosena sumai alingkamo, tee o Samuel apogau uka, "Untopo sabantara, mamudhaakana kupaumbaakako firimanina KAWASANA OPU."