1 Daud alingka minaaka iwe sumai, kasiimpo amboore i tana matuu i nuncana tampa potaangiana i En-Gedi. 2 Sambulina Saul minaaka i potimbea apoewangi tee miana Filistin, incia atarimamo lele mboo sii, "Daud dhaangia i tana matuu i saripina En-Gedi." 3 Kasiimpo o Saul abhawamo talu rewu mia tantarana minaaka i saangua Israel, kasiimpo alingka apeelo Daud tee manga ana buana i Gunu Bhatu Bhembena Koo.

4 ✝Kasiimpo o Saul akawamo i saripina manga kandana gulumana dumba modhaangiana i bhiwina dhala. Iwe sumai dhaangia saangu lia, tee o Saul apesua iwe sumai to alingka i jamba maridho. Wakutuu incia sumai o Daud tee manga ana buana tangasaana aopo i nuncana lia momandala mpuu. 5 Kasiimpo apogaumo manga ana buana tee Daud, "Siimo eo ifirimaniakana KAWASANA OPU to ingkoo, 'Satotuuna Iaku bhekupasaraakaaka musumu i nuncana limamu mamudhaakana upewau opea iabhimu momalapena.' " Sumaimo o Daud apesua inda tee uuʼuuna i tampana Saul tee adhodho saidhe tapana jubana Saul.

6 Maka o Daud asosomo sapadhana adhodho tapana jubana Saul sumai. 7 Pogauna Daud tee ana buana, "Maasangia o KAWASANA OPU ajaganiaku mamudhaakana inda kupewau giu madhaki tee rajaku mopadhana ipilina KAWASANA OPU sii. Saidhe uka iaku bholi kupacilakea roonamo incia o mia mopadhana ilantina KAWASANA OPU." 8 Mboomo sumai o Daud apatanangi incana ana buana tee inda aundaakea to abhali Saul. Wakutuu incia sumai o Saul tangasaana bheasiapu to alimba minaaka i lia sumai to apalausakaaka lingkaana.

9 Kasiimpo Daud alimbamo madhei minaaka i nuncana lia tee agora i talikuna Saul, pogauna, "Opuku Raja!" Wakutuuna o Raja Saul apoili, Daud asujumo tee o rouna atumpu i tana tee adhawu horomati. 10 Kasiimpo Daud apogau tee Saul, "Apokia uperangoi pogauna mia mopogauna ande iaku bhekupacilakako? 11 Satotuuna i eo sii ukamataakamea karomu tuaapa o KAWASANA OPU padhamo apasaraakaako i limaku i nuncana lia sii. Dhaangia pia mia o ana buaku mowujuaku to kupekamateko, maka iaku kumendeu kupekamateko tee kulawani, 'Iaku kumendeu kupacilakea roonamo incia o mia mopadhana ilantina KAWASANA OPU.' 12 Amaku ukamatapea! Kamatea o tapana jubamu dhaangia i limaku. Iaku kutumpo tapana jubamu, maka inda kupekamateko. Jadi amembalimo umataua tee ukamatea ande iaku inda dhaangia o haejatiku momadhakina atawa kuhianatiko, tee inda kupewau dosa tee ingkoo moomini upajereaku tee gaumu upekamateaku! 13 Maasangia o KAWASANA OPU amembali haakimu i tanga-tangata tee maasangia o KAWASANA OPU bheabalasi opea mopadhana ipewaumu tee iaku, maka moomini saidhe uka iaku inda bhekuwanduko. 14 Dhaangia saangu ibarati i zamani mangenge mopogauna mboo sii, 'Giu madhaki aumba minaaka i mia madhaki,' maka iaku inda bhekupacilakako. 15 Apokia o rajana Israel apajereaku to apekamateaku? Sainamo iaku sii inda kukoharagaa; iaku tangkanamo mboomo sambaa mantoa momate atawa mboomo sambaa kutu! 16 Rampaakanamo sumai, maasangia o KAWASANA OPU bheamembali haakimu to mobhotukiakana parakara i tanga-tangaku tee ingkoo. Maasangia Incia akamataaku, aewaakaaku, tee apabebasiaku minaaka i limamu."

17 Sapadhana Daud apakawaaka pogau incia sumai, aabhamo o Raja Saul, "Suaramu itu anaku Daud?" Kasiimpo Saul atangimo tee suara momakaa. 18 Pogauna Saul tee Daud, "Ingkoo ulabhi ubanara tee iaku, roonamo ingkoo padhamo upewau giu momalape tee iaku, garaaka iaku kupewau giu madhaki tee ingkoo. 19 I eo sii ingkoo padhamo ususuakaaku kalapena haejatimu, roonamo inda upekamateaku, moomini o KAWASANA OPU padhamo apasaraakaaku i limamu. 20 Buaka dhaangia o mia morambasakana musuna kasiimpo atumpua alingka tee ataroakea adhadhi? Maasangia o KAWASANA OPU abalasia o kalapemu apokana tee opea mopadhana ipewaumu tee iaku i eo sii. 21 Sii-sii kumataumea ande ingkoo dhaanamo bheumembali rajana Israel, tee o pamarintana Israel bheamatangka i nuncana limamu. 22 Rampaakanamo sumai uposumpamo to iaku to sarona KAWASANA OPU ande ingkoo inda bheupamofu siwuluku naile itu, tee uka inda uhapusu saroku i tanga-tangana sarona witinaiku."

23 Kasiimpo aposumpamo o Daud to Saul. Sapadhana sumai o Saul ambulimo i bhanuana, sainamo Daud tee ana buana ambulimo pendua i tampana potaangiana.