1 Maka o Daud apogau i nuncana ngangarandana, "Tuaapapo uka naile itu o Raja Saul dhaanamo bheapekamateaku. Jadi indamo dhaangia o dhala mosagaanana to karoku ande inda kupalaiaka karoku i lipuna Filistin. Tee mboo sumai o Saul bheamate o akalana to apeeloaku i saangua lipuna Israel, tee iaku bhekuʼamani."

2 Kasiimpo o Daud tee nama atu mia ana buana alausakamo alingka i lipuna Raja Akhis bin Maokh, siitumo rajana Kota Gat. 3 Sumaimo o Daud tee ana buana ambooremo tee Akhis i Kota Gat apoose tee keluargana samia-samia. Daud abhawa rua miaia bhawinena, siitumo Ahinoam miana Yizreel, tee Abigail iaiarona Nabal miana Karmel sumai. 4 Wakutuuna Saul arango ande o Daud apalaiakamo karona i Kota Gat, incia auntomo to apajere Daud.

5 Kasiimpo apogaumo o Daud tee Raja Akhis, "Ande umaasiakaaku, dhawuakaakumo sala saangu kota momaidhiidhi momaridhona minaaka i kotana pamarintana Filistin sii to kumbooreaka iwe sumai, mamudhaakana iaku inda kumboore kupoose tee ingkoo i nuncana Kota Gat sii."

6 Sumaimo o Raja Akhis adhawuakamea Kota Ziklag to Daud, tee o giumo incia sumai imembaliakana Kota Ziklag amembali pewauana raja-rajana Yehuda sakawana sii-sii. 7 Kangengena satao pata mbula o Daud amboore i lipuna miana Filistin.

8 Kasiimpo o Daud tee manga ana buana alingka ahumbuni miana Gesur, miana Girzi, tee miana Amalek (minaaka i piamo itu manga incia amboore i lipu incia sumai, minaaka i dhala mopesuana i Syur sakawana i Tana Mesir). 9 Daud apekamate bhari-bharia mia modhaangiana i lipu incia sumai, malape umane atawa o bhawine. Incia arampasi gulumana dumba, sapi, keledai, unta, tee pakeana manga mia momboorena iwe sumai, kasiimpo alingka apokawaaka Raja Akhis sambulina minaaka i potimbea.

10 Ande aabhakia Raja Akhis, "Bheupekahumbuni i iapai i eo sii?" Sumaimo o Daud bhealawani, "I Tana Negeb i mbooresana miana Yehuda," sagaa uka incia apogau, "I Tana Negeb i mbooresana miana Yerahmeel," atawa "I Tana Negeb i mbooresana miana Keni." 11 Minaaka i kabharina lipu ihumbunina sumai inda samia uka itaroakana adhadhi, malape umane atawa o bhawine, mamudhaakana inda dhaangia o mia momembalina molingkana i Kota Gat to molaporoakana opea mopadhana ipewauna Daud tee ana buana. Mboomo sumai o kananeana Daud kangengena amboore i lipuna miana Filistin. 12 Maka o Raja Akhis aparacaea tee Daud, roonamo i nuncana fikirina, "Incia atotuu-totuu padhamo apewau karona to abancia manga mia i lipuna karona i Israel, sabutuna incia bheamembali bhatuaku moewaakaaku saʼumurua."