1 Samuel dhaangiapo momangurana dhadhina sumai alaiani KAWASANA OPU, tee incia aose parinta minaaka i Imamu Eli. I wakutuu incia sumai o firimanina KAWASANA OPU dhaangiapo amesagala, tee indapo abhari o mia momembalina mopekilalaakana pokamatana.

2 I saangu malo, Eli tangasaana akole i kolemana. Matana apepuumo amarawu, sabutuna indamo atinda apokamata. 3 Wakutuu incia sumai o padamarana Kemana KAWASANA OPU indapo amate, sainamo Samuel dhaangiapo apotidhole i nuncana Kemana KAWASANA OPU i aroana Kamara Momangkilo Mpuu tampana Sorongana Pojanjiana KAWASANA OPU*. 4 Kasiimpo Samuel agoraakea KAWASANA OPU, tee incia alawani, "Umbe uma." 5 Kasiimpo Samuel abuntulimo alingka i Eli tee apogau, "Iaku iwe sii, ugoraakaaku i saao uma?"

Lawanina Eli, "Iaku inda kugoraakako, lingkamo upotidhole pendua." Sumaimo Samuel alingkamo apotidhole pendua.

6 Kasiimpo KAWASANA OPU apenduamo uka agoraaka Samuel, incia abhangumo kasiimpo alingka i Eli tee apogau, "Iaku iwe sii, ugoraakaaku i saao uma?"

Lawanina Eli, "Iaku inda kugoraakako anaku, lingkamo upotidhole pendua."

7 Wakutuu incia sumai o Samuel indapo apomatau tee KAWASANA OPU tee o firimanina KAWASANA OPU indapo atopaumbaaka to incia.

8 Kasiimpo to talu mpearona uka o KAWASANA OPU agoraaka Samuel. Incia abhangu kasiimpo alingka apokawaaka Eli tee apogau, "Iaku iwe sii, ugoraakaaku i saao uma?"

Sumaimo Eli amataumea ande mogoraakana Samuel sumai o KAWASANA OPU. 9 Rampaakanamo sumai o Eli apogaumo tee Samuel, "Lingkamo ukole, dhaampo ande agoraakako pendua siimpomo upogau, 'E KAWASANA OPU, pogaumo, roonamo iaku o bhatuamu sii kuperangoiko.' " Kasiimpo Samuel alingkamo apotidhole i kolemana.

10 Kasiimpo aumbamo KAWASANA OPU akabhale-bhale iwe sumai tee agoraakea uka, "Samuel! Samuel!"

Alawanimo Samuel, "E KAWASANA OPU, pogaumo, iaku kuperangoiko."

11 Kasiimpo KAWASANA OPU apogaumo tee Samuel, "Satotuuna Iaku bhekupewau saangu giu inda momentela i Israel, sabutuna bhari-bharia mia morangoa bheakii rua mbalia talingana. 12 I eo incia sumai bhekukarajaaia opea mopadhana ifirimaniakaku to Eli pokaiana tee keluargana minaaka i bhaa-bhaana sakawana i kapadhaana. 13 Iaku padhamo kupaumbaakea to incia ande bhekuhukumu keluargana saʼumurua roonamo manga anana ahinaaku. Eli amataua o dosana manga anana sumai, maka o Eli inda ataangi manga anana to apewau dosa. 14 Rampaakanamo sumai, Iaku kuposumpa to keluargana Eli, ande o dosana manga incia inda amembali ahapusua tee kurubani isumbele atawa tee haroaana pasombaana giuna ikande saʼumurua."

15 Samuel apotidhole sakawana saeona, kasiimpo abhangu tee abungkale manga bhambana Kemana KAWASANA OPU. Maka o Samuel amaeka to apaumbaaka opea mopadhana ikamatana sumai i Eli. 16 Maka o Eli agoraaka Samuel, pogauna, "Samuel anaku!"

Samuel alawani, "Umbe uma!"

17 Pogauna Eli, "Firimani opea mopadhana ipakawaakana to ingkoo? Petula-tulaakamea bhari-bharia, bholi ubuniakea minaaka i iaku. Ande dhaangia o giu irahasiaakamu, sumaimo Aulataʼala bheahukumuko." 18 Jadi o Samuel apetulatulaakamea bhari-bharia giu incia sumai tee inda dhaangia ibuniakana. Kasiimpo Eli apogau, "Incia o KAWASANA OPU; taroakamea Incia apewauaka opea iabhina momalapena i fikirina."

19 Samuel ahandamo ajulu o kaogena. KAWASANA OPU apoose tee incia tee inda saangu uka ipogauakana Samuel inda mokobukutiina. 20 Sumaimo saangua lipuna Israel, minaaka i Kota Dan sakawana i Kota Bersyeba aʼakuia ande o Samuel atotuu-totuu samia nabii ilambokona KAWASANA OPU. 21 KAWASANA OPU mentene mpearo apatokamataaka karona i Silo. Iwe sumai o KAWASANA OPU apatokamataaka karona to Samuel tee apogau tee incia.