ପବିତ୍ରଆତ୍ମାଦିମାଣୁକୁ ଦାନ୍
1 ଏ ତଡ଼ାନ୍କୁ ନି ତାଙ୍ଗିଁକି, ପବିତ୍ରଆତ୍ମାଦି ଦାନ୍ତି ବିସୟ୍ତାନ୍
ନାନ୍ ମିଙ୍ଗିଁ ପୁରା ସତ୍ ୱେର୍ତେଙ୍ଗ୍ ଅଡ଼୍ବିଜିନା । 2 ମିର୍ ନେସ୍ନିଦେର୍ ଜେ, ଏସ୍ତିୱାଲେ ମିର୍ ଅଣଜିହୁଦି ମାର୍ଇୱାଲେ, ନାସ୍ତିୱାଲେ ଜିବନ୍ସିଲି ଦିୟାମ୍କାଙ୍ଗାଁ ପୁଜା କିଜି ମିର୍ ଅଲଗାସାରି ଆତିମାର୍ଇଦେର୍ । 3 ଆୟାଉଣ୍ତିଙ୍ଗ୍ ନାନ୍ ମିଙ୍ଗିଁ ଜାଣେକିଜିନା, ମାପୁରୁଦି ଆତ୍ମାଦାନ୍ ସାଲାନି ଲୋକ୍ "ଜିସୁ ଅବିସାପ୍" ଇଜି ଇନ୍ଏନ୍, ମାରି ଏମେ ଲୋକ୍ ପବିତ୍ର ଆତ୍ମା ପୟ୍ଏଣ୍ଗା "ଜିସୁ ପ୍ରବୁ" ଇଜି ୱେର୍ତେଙ୍ଗ୍ ଆଟ୍ଏନ୍ ।
4 ୧୨:୪ ରୋମିୟ ୧୨:୬-୮. ଆତ୍ମାଦି ଦାନ୍ ଗାଦି ଜାତିଙ୍ଗ୍, ମାତର୍ ଆୟା ଉନ୍ଡ୍ରେ ପବିତ୍ରଆତ୍ମା ଆୟାୱିଜୁ ସିନାତ୍ । 5 ସେବା ଗାଦି ରକମ୍ତିକେଙ୍ଗ୍ କିଜିନାର୍, ମାରି, ଉନ୍ଡ୍ରେ ପ୍ରବୁଦି ସେବା ଆନାତ୍ । 6 ପାଣି କିନି ୱାରିଙ୍ଗ୍ ଗାଦି ରକମ୍ତି ସାକ୍ତି ସିନାନ୍, ମାତର୍ ମାପୁରୁ ଅରେନ୍, ୱାନ୍ ୱିଜେରିମାନୁ ଆୟାୱିଜୁ ସିନାନ୍ । 7 ୱିଜେରି ନେଗି ଉଣ୍ତିଙ୍ଗ୍ ୱିଜେରେ ଲୋକାମାନୁ ପବିତ୍ରଆତ୍ମାଦି ସାକ୍ତି ଗାଦି ରକମ୍ତିକେଙ୍ଗ୍ ତରାନାତ୍ ।