1 ଏ ତଡ଼ାନ୍‌କୁ ନି ତାଙ୍ଗିଁକି, ନାନ୍‌ ମି ଲାକ୍‌ତୁ ଆମା ସୁସମାଚାର୍‌ ପ୍ରଚାର୍‌ କିତାମାର୍‌ଆ, ଆମାକା ମିର୍‌ ମାନାତି ମାନିଦେର୍‌, ଆବେନ୍‌ ବା ତିର୍‌ ଆଜି ତେବାତିମାନିଦେର୍‌, ନାନ୍‌ ଏଣ୍ତେସ୍‌ୱାଜା ମି ଲାକ୍‌ତୁ ପ୍ରଚାର୍‌ କିତାମାର୍‌ଆ, ଇକା ମିଙ୍ଗିଁ ଏତ୍‌ କିବିସ୍‌କିଜିନା । 2 ନାନ୍‌ ମି ଲାକ୍‌ତୁ ପ୍ରଚାର୍‌ କିତିମାନି ଆୟା ସୁସମାଚାର୍‌ତୁ ଡାଟ୍‌ ୱାଜା ତେବାତିଙ୍ଗ୍‌, ଆର୍‌ତିଙ୍ଗ୍‌ ତାନି ମାଣାନ୍ ରକିୟା ପୟ୍‌ଜିନିଦେର୍‌, ସିଲିତିଙ୍ଗ୍‌ ମି ବିସ୍‌ବାସ୍‌ ବେକାର୍‌ ।

3 ଇରିଙ୍ଗ୍‌ ଆମା ଆମା ସିକିୟା ନାନ୍‌ ପୟ୍‌ତାମାନା, ଆୟାତାନିମାଣୁକୁ ଇୟା ପେରି ସିକିୟା ମିଙ୍ଗିଁ ୱେର୍‌ତାମାନା । ଆକା ଆଜିନାତ୍‍, ଦାର୍ମୁସାସ୍ତ୍ରଦୁ ରାସାତା ମାନାତ୍‌, କ୍ରିସ୍ତ ମା ପାପ୍‌ତି ଉଣ୍ତିଙ୍ଗ୍‌ ସାତାନ୍‌, 4 ✝ଦୁକି ଗୁଟାଦୁମୁସାୟା ଆତାନ୍‌, ଦାର୍ମୁସାସ୍ତ୍ରଦି ଇସାବ୍‌ତାନ୍‌ ମୁନେଟି ୱେନ୍‌କା ଜିବନ୍‌ଆଜି ନିଙ୍ଗିଁତାମାନାନ୍‌; 5 ✝ୱାନ୍‌ ପିତର୍‍, ମାରି ତାନିୱେନ୍‌କା ୱାନି ବାର୍‌ଲୋକ୍‌ ସିସୁରିଙ୍ଗ୍‌ ତରାୟ୍‌ଆତାନ୍‌, 6 ତାନିୱେନ୍‌କା ଉନ୍‌ଡ୍ରେ ଦେବାନେ ଅର୍‌ସେ ପାସ୍‌ସୋଦାନ୍‌ ନାଣ୍ତ ୱାନି ତଡ଼ାନ୍‍କାଙ୍ଗ୍‍ଁ ତରାୟ୍‌ଆତାନ୍‌, ୱାରି ଲୋଇରାନ୍‌ ଏସ ଲୋକୁ ନେର୍‌ ସାନ୍ଧି ଜିବନ୍‌ ମାନାର୍‌, ମାତର୍‌ ଏନ୍‌ ଏନ୍‌ ଇୟା ଦୁନିଆଦୁ ସିଲେର୍‌ । 7 ଇୟାତାନିୱେନ୍‌କା ଜେ ଯାକୁବଙ୍ଗ୍‌, ମାରି, ତାନିୱେନ୍‌କା ୱିଜୁ ସିସୁରିଙ୍ଗ୍‌ ତରାୟ୍‌ଆତାନ୍‌;

8 ✝ସାରାସାରିୱେନ୍‌କା ଜଗ୍‌ସିଲିନାଣ୍ତିଙ୍ଗ୍ ଜନମ୍‌ଆନିକଡ଼ଦି ୱାଜା ଅରେନ୍‍ ଜେ ନାନୁ, ୱାନ୍‌ ନାଙ୍ଗିଁ ବା ତରାୟ୍‌ଆତାନ୍‌ 9 ✝ଇରିଙ୍ଗ୍‌ ନାନ୍‌ ମାପୁରୁଦି ମଣ୍ତଲିଦିଙ୍ଗ୍‌ କାସ୍ଟୁ ସିତିମାନିଙ୍ଗ୍‌ ସିସୁରିମାନୁ ନାନ୍‌ ୱେଜେରିଙ୍ଗ୍‌ ଇଜ୍ରିକିନ୍ଧା, ମାରି ପ୍ରେରିତ ଦର୍‌ତାନ୍‌ ୱେଙ୍ଗ୍‌ଦେଙ୍ଗ୍‌ ଜଗ୍‍ ସିଲେତ୍‌ । 10 ମାତର୍‌ ନାନ୍‌ ଆମାକା ଆତାମାନା, ଆକା ମାପୁରୁଦି ଦୟାଦାନ୍‌ ଆତାମାନାତ୍‌, ମାରି ନା ଉଣ୍ତିଙ୍ଗ୍‌ ୱାନି ଆୟା ଦୟା ବେକାର୍‌ ଆଏତ୍‍ । ମାତର୍‌ ନାନ୍‌ ଆୟା ୱିଜେରିମାଣୁକୁ ନାଣ୍ତ ପାଣି କିତାମାନା, ମାରିବା ନାନ୍‌ ସିଲେ, ମାତର୍‌ ନା ଉଣ୍ତିଙ୍ଗ୍‌ ମାପୁରୁଦି ଦୟା ମାନିଙ୍ଗ୍‌ ଇକା ପୁରା ଆତାମାନାତ୍‌ । 11 ମାରି ନାନ୍‌ ଆନା, ସିଲ୍‌ତିଙ୍ଗ୍‌ ୱାର୍‌ ଆପିର୍‌, ଇୟା ପ୍ରଚାର୍‌ କିଜିନାପ୍, ଇୟାୱାଜା ମିର୍‌ ବିସ୍‌ବାସ୍‌ କିତିମାନିଦେର୍‌ ।

12 କ୍ରିସ୍ତ ଜେ ସାତିୱାରି ମାଣ୍‌କୁ ଜିବନ୍‌ଆଜି ମାରିଡ଼େସି ନିଙ୍ଗିଁତାମାନାନ୍‌, ଇକା ଜଦି ପ୍ରଚାର୍‌ କିଆୟାଆଜିନାତ୍‌, ଆର୍‌ତିଙ୍ଗ୍‌ ସାତିୱାରି ଜିବନ୍‌ଆଜିନିଙ୍ଗିଁନିକା ସିଲେତ୍‌ ଇଜି ମି ଲୋଇ ଏନ୍‌ ଏନ୍‌ ଏଣ୍ତେସ୍‌ ୱେର୍‌ସିନିଦେର୍‌ ? 13 ଜଦି ସାତିକାର୍‌ ଜିବନ୍‌ଆଜି ମାରିଡ଼େସି ନିଙ୍ଗିଁନିକା ସିଲେତିଙ୍ଗ୍‌, ଆର୍‌ତିଙ୍ଗ୍‌ କ୍ରିସ୍ତ ବା ଜିବନ୍‌ଆଜିନିଙ୍ଗିଁଏନ୍‌; 14 ଜଦି କ୍ରିସ୍ତ ସାତିମାଣାନ୍‌ ଜିବନ୍‌ଆଜିନିଙ୍ଗିଁଏନ୍‌, ଆର୍‌ତିଙ୍ଗ୍‌ ମା ପ୍ରଚାର୍‌ ବେକାର୍‌ ମାରି ମି ବିସ୍‌ବାସ୍‌ ବା ବେକାର୍‌, 15 ମାରି, ମାଡୁ ମାପୁରୁଦି ବିସୟ୍‌ତାନ୍‌ ଜେ ମିଚ୍‌ ସାକିୟ୍‌ ୱେର୍‌ତି ୱାଜା ଆନାତ୍‌, ଇରିଙ୍ଗ୍‌ ମାଡୁ ମାପୁରୁଦି ବିସୟ୍‌ତାନ୍‌ ସାକ୍ୟ ସିଜିମାନିକା ଜେ, ୱାନ୍‌ କ୍ରିସ୍ତଙ୍ଗ୍‌ ସାତିମାଣୁକୁ ମାରିଡ଼େସିଜିବନ୍‌ କିତାମାନାନ୍‌ । ମାତର୍‌ ଜଦି ସାତିକାର୍‌ ଜିବନ୍‌ଆଜିନିଙ୍ଗିଁଏର୍‌, ଆର୍‌ତିଙ୍ଗ୍‌ ୱାନ୍‌ କ୍ରିସ୍ତଙ୍ଗ୍‌ ସାତିମାଣାନ୍‌ ଜିବନ୍‌କିଜି ନିକ୍‌ଏନ୍‌ । 16 ଜଦି ସାତିକାର୍‌ ଜିବନ୍‌ଆଜିନିଙ୍ଗିଁଏର୍‌, ଆର୍‌ତିଙ୍ଗ୍‌ କ୍ରିସ୍ତ ବା ଜିବନ୍‌ଆଜିନିଙ୍ଗିଁଏନ୍‌; 17 ଆଉ, ଜଦି କ୍ରିସ୍ତ ସାତିମାଣାନ୍‌ ଜିବନ୍‌ଆଜିନିଙ୍ଗିଁଏନ୍‌, ଆର୍‌ତିଙ୍ଗ୍‌ ମି ବିସ୍‌ବାସ୍‌ ମିଚ୍‌ ମାରି ମିର୍‌ ଇଲେଇବା ନିଜେ ନିଜେଦି ପାପ୍‌ତୁ ମାନିଦେର୍‌ । 18 ଆର୍‌ତିଙ୍ଗ୍‌ ଆମାକାର୍‌ କ୍ରିସ୍ତ ବିସ୍‌ବାସିର୍‌ ସାତାମାନାର୍‌, ୱାନ୍‌ ବା ନାସ୍ଟୁ ଆତାମାନାର୍‌ । 19 ଜଦି ଇୟା ଜିବନ୍‌ ଉଣ୍ତିଙ୍ଗ୍‌ ମାଡୁ କ୍ରିସ୍ତଦିମାନୁ ଆସା ଇଡ଼୍‌ତିମାନିକା, ଆର୍‌ତିଙ୍ଗ୍‌ ଆଇ ୱିଜୁଲୋକାମାଣୁକୁ ମାଡୁ କାର୍ମୁସିଲିକା ।

20 ମାତର୍‌ ସତ୍‌ତାନ୍‌ କ୍ରିସ୍ତ ସାତିମାନି ଲୋକା ମାରିଡ଼େସି ଜିବନ୍‌ଆଜି ନିଙ୍ଗିଁନିକା ପୁରା ତର୍‌ତେଙ୍ଗ୍‍ଁ ଇଜି ୱାରି ମାଣ୍‌କୁ ନିଜେ ଆଗ୍‌ଡ଼ି ସାତିମାଣାନ୍‌ ନିଙ୍ଗିଁତାମାନାନ୍‌ । 21 ଇରିଙ୍ଗ୍‌ ଅରେନ୍ ଲୋକା ମାଣ୍‌କୁ ସାନିକା ୱାତିମାନିଙ୍ଗ୍‌ ମାରି ଅରେନ୍ ଲୋକା ମାଣାନ୍‌ ବା ସାତିୱାରିଙ୍ଗ୍‌ ମାରିଡ଼େସି ଜିବନ୍‌ଆଜି ନିଙ୍ଗିଁନିକା ଆତାମାନାତ୍‌ । 22 ଆଦମତି ୱାଲେ ମିସାତିକା ମାନିଙ୍ଗ୍‌ ଏଣ୍ତେସ୍‌ ୱିଜୁ ଲୋକୁ ସାନାର୍‌, ଆୟାୱାଜା ବା କ୍ରିସ୍ତଦିମାନୁ ମିସାତିମାନିଙ୍ଗ୍ ୱିଜେରେ ମାରିଡ଼େସିଜିବନ୍‌ ଆନାର୍‌ । 23 ମାତର୍‌ ୱିଜେରେ ଲୋକୁ ତିଆର୍‌ଆନି ବେଡ଼ାଦୁ ଜିବନ୍‌ଆଜିନିଙ୍ଗିଁନାର୍‌, ୱିଜେରି ଆଗ୍‌ଡ଼ି କ୍ରିସ୍ତଦି ସାତିମାଣାନ୍‌ ନିଙ୍ଗିଁତାମାନାନ୍‌ । ୱେନ୍‌କା ୱାନ୍‌ ୱାନିବେଡ଼ାଦୁ ୱାନି ଆସିର୍ବାଦ୍‍ତି ଲୋକୁ ଆଗ୍‌ଡ଼ି ଜିବନ୍‌ଆନାର୍‌ । 24 ତାନେୱେନ୍‌କା ଜୁଗ୍‌ସେସ୍‌ ଇଗା ୱାନାତ୍ । ଆୟାବେଡ଼ାଦୁ କ୍ରିସ୍ତ ୱିଜୁ ତାଗ୍‌ଇ ଆତ୍ମା ଆମାୱାନିଙ୍ଗ୍‌ ସାସନ୍‌, ୱିଜୁ ଅଦିକାର୍‌ ମାରି ସାକ୍ତିଦି ପାଣି ୱିସ୍‌ତି ୱେନ୍‌କା ବୁବା ମାପୁରୁଙ୍ଗୁଁ ରାଜି ସର୍‌ପେ କିନାନ୍‌ । 25 ଇରିଙ୍ଗ୍‌ ମାପୁରୁ ୱିଜୁ ସାତ୍ରୁରିଙ୍ଗ୍‌ ନିଜେଦି ପାଦାମ୍‌ ଆଡ୍‍ଗି ଇଡିଇ ସାନ୍ଧି କ୍ରିସ୍ତଙ୍ଗ୍‌ ପୁରା ସାସନ୍‌ କିଦେଙ୍ଗ୍‌ ପଡ଼ାନାତ୍‌ । 26 ସାରାସାରିୱେନ୍‌କାରି ସାତ୍ରୁ ସାନିକା ଆକାବା ଆରାନାନ୍‌ । 27 ଇରିଙ୍ଗ୍‌ ଦର୍ମସାସ୍ତ୍ରଦୁ ରାସାତା ମାନାତ୍‌, ମାପୁରୁ ୱିଜୁ ବିସୟ୍‌ ୱାନି ପାଦାମ୍‌ ଆଡ୍‍ଗି ଇଟ୍‌ତାନ୍‌ । ମାରିବା ମାପୁରୁ ଇୟାୱିଜୁ ବିସୟ୍‌ତୁ ମିସାଏନ୍‌, ଆୟାଉଣ୍ତିଙ୍ଗ୍‌ ମାପୁରୁ ନିଜେ ୱିଜୁ ବିସୟ୍‌ତିଙ୍ଗ୍‌ କ୍ରିସ୍ତଦି ଆଡ୍‍ଗି ଇଡ୍‌ନାନ୍‌ । 28 ମାରି ୱିଜୁ ବିସୟ୍‌ତିଙ୍ଗ୍‌ କ୍ରିସ୍ତଦି ଆଡ୍‍ଗି ଇଡ୍‌ତି ୱେନ୍‌କା, ୱାନ୍‌ ନିଜେ ବୁବା ମାପୁରୁଦି ଆଡ୍‍ଗି ଆନାନ୍‌ ମାରି ସାରାଦୁନିଆଦି ମୁସ୍‌କୁ ମାପୁରୁଦି ସାସନ୍‌ କିନିକା ପୁରା ଆନାତ୍‌ ।

29 ସାତିକାର୍‌ ନିଙ୍ଗିଁଏତିଙ୍ଗ୍, ଆମାକାର୍‌ ସାତିୱାରି ଉଣ୍ତିଙ୍ଗ୍‌ ଡୁବନ୍‌ ଅନାର୍‍, ୱାରି ବିସୟ୍‌ତାନ୍‌ ଇନିକା ରାସ୍‌ତିଦେର୍‌ ? ଜଦି ସାତିକାର୍‌ ମାରିଡ଼େସି ଜିବନ୍‌ଆଜିନିଙ୍ଗିଁଏର୍‌, ଆର୍‌ତିଙ୍ଗ୍‌ ୱାରି ଉଣ୍ତିଙ୍ଗ୍‌ ଆଇୱାରିଙ୍ଗ୍‌ ଏନ୍ଦା ଡୁବନ୍‌ ସିନାର୍‌ । 30 ମାରି ମାଡୁ ବା ଏନ୍ଦା ୱିଜୁ ଦଣ୍ତତୁ ସାନିକା ଆଗ୍‌ଡ଼ି କିଜିନିକା ? 31 ଏ ତଡ଼ାନ୍‌କୁ ନି ତାଙ୍ଗିଁକି, ମା ଜିବନ୍‌ ପ୍ରବୁ ଜିସୁ କ୍ରିସ୍ତଦି ୱାଲେ ମିସାତି ମାନିଙ୍ଗ୍‌, ମି ବିସୟ୍‌ତାନ୍‌ ନାନ୍‌ ଆମା ଗର୍ବ କିଜିନା, ଆବେଣି ପାର୍‌ମାଣ୍‌ କିଜି ୱେର୍‌ସିନା, ନାନ୍‌ ଦିନାମି ସାନି ସାରିଦୁ ବୁଲାଜିନା । 32 ଜଦି ନାନ୍‌ କେବଲ ଲୋକା ଆସା ଅସି ଏପିସ୍‌ତୁ ବନ୍‌ତି ଜାତୁଙ୍ଗାଁ ୱାଜା ଲୋକା ୱାଲେ ଜୁଦ୍ କିତାମାର୍‌ଆ, ଆର୍‌ତିଙ୍ଗ୍‌ ଆବେନ୍‌ ନା ଲାବ୍‌ ଇନିକା ଆତାତ୍‌ ? ଜଦି ସାତିକାର୍‌ ଜିବନ୍‌ଆଜିନିଙ୍ଗିଁଏର୍‌, କାତାଦି ଇସାବ୍‍ତାନ୍ "ରାଦୁ ଉଣୁଜିତିନ୍‌ଞ୍ଜି ବେଡ଼ା କାଟେକିନାଟ୍‌, ଇରିଙ୍ଗ୍‌ ୱିଗେରିଙ୍ଗ୍‌ ମାଙ୍ଗିଁ ସାଦେଙ୍ଗ୍‌ ଆନାତ୍‌ ।"

33 ମିର୍‌ ବେମ୍ରି ଆମାଟ୍‌, "ତାଗ୍ଇ ଲୋକା ୱାଲେ ମିସାତିଙ୍ଗ୍ ନେଗି ଜିବନ୍‌ ନାସ୍ଟୁ ଆନାତ୍‌ ।" 34 ଆଦେଙ୍ଗ୍‌ ଜାଗ୍‌ରାତା ଆଦୁ, ପାପ୍‌ କିମାଟ୍‌; ଇରିଙ୍ଗ୍‌ ଏନ୍‌ ଏନ୍‌ ମାପୁରୁଦି ବିସୟ୍‌ତାନ୍‌ ନେସ୍‌ଏର୍‌; ନାନ୍‌ ମିଙ୍ଗିଁ ସେମାର୍‌ତି ମାଟା ୱେର୍‌ସିନା ।

35 ଏନ୍‌ଆପିନ୍‌ ୱେନ୍‌ବାଦେଙ୍ଗ୍‌ ଆଟ୍‍ନାନ୍‍, ସାତିକାର୍‌ ଏଣ୍ତେସ୍‌ ଜିବନ୍‌ଆଜିନିଙ୍ଗିଁନାର୍‌ ? ୱାର୍‌ ଏଣ୍ତେସ୍‌ ନାନି ମେନ୍ଦଲ୍‌ତାନ୍‌ ୱାନାର୍‌ ? 36 ଏ ବକୁଆର୍‌, ମିର୍‌ ନିଜେ ଆମାକା ୱିତ୍‌ନିଦେର୍‌, ଆକା ସାଏତିଙ୍ଗ୍‌ ନେର୍‌ଏତ୍‌, ମାରି, ଆମା ମାରାନ୍‌ ନେର୍‌ନାତ୍‌, ମିର୍‌ ତାନିଙ୍ଗ୍‌ ୱିତ୍‌ଇଦେର୍‌, 37 ମାରି, ଆମା ମେନ୍ଧଲ୍‍ ଆନାତ୍‌, ମିର୍‌ ୱିତ୍‌ନିମାନିଦେର୍‌ ଗଦ୍‍ମୁ ଆପିତ୍‌ ସିଲିତିଙ୍ଗ୍‌ ଆଇ ଇନି ୱିତୁ ଆପିତ୍‌, ଆକା କେବଲ ଉନ୍‌ଡ୍ରେ ୱିତୁନେ; 38 ମାତର୍‌ ମାପୁରୁ ନିଜେଦି ଇଚ୍ଛାଦାନ୍‌ ୱାନିଙ୍ଗ୍‌ ମେନ୍ଦଲ ସିନାନ୍‌, ମାରି ୱିଜୁ ୱିତୁଦି ମାଣାନ୍‌ ୱିଜୁଦିଙ୍ଗ୍‌ ୱାନି ନିଜେଦି ମେନ୍ଦଲ୍‌ ସିନାନ୍‌ ।

39 ୱିଜୁ ଜିବନ୍‌ମାନିକା ଉନ୍‌ଡ୍ରେନାନି ମେନ୍ଦଲ ସିଲେତ୍‌, ମାତର୍‌ ଲୋକା ଉନ୍‌ଡ୍ରେନାନିକା ମେନ୍ଦଲ, ଜାତୁଆଙ୍ଗାଁଦି ଆଇନାନି ମେନ୍ଦଲ, ମାରି ପଟିଆଙ୍ଗାଁ ମାରି ଉନ୍‌ଡ୍ରିନାନି ମେନ୍ଦଲ ମାରି ମିନ୍‌କୁ ମେନ୍ଦଲ ଆଇନାନିକା ।

40 ମୁସ୍‌କୁପୁର୍‌ତି ମେନ୍ଧଲ୍‍ ମାନାତ୍‌, ଜଗତ୍‌ତି ମେନ୍ଧଲ୍‍ ବା ମାନାତ୍‌, ମାତର୍‌ ମୁସ୍‌କୁପୁର୍‌ତି ମେନ୍ଦଲ୍‌ତି ଉନ୍‌ଡ୍ରିନାନି ସୁନ୍ଦର୍‌ ମାନାତ୍‌, ମାରି ଜଗତ୍‌ତି ମେନ୍ଦଲ୍‌ତି ଆଇନାନି ସୁନ୍ଦର୍‌ ମାନାତ୍‌ । 41 ୱେଡ଼ାଦି ଉନ୍‌ଡ୍ରିନାନି ସୁନ୍ଦର୍‌, ଲେଜୁଦି ଆଇନାନି ସୁନ୍ଦର୍‌ ମାରି ସୁକେଆଙ୍ଗାଁ ଆଇନାନି ସୁନ୍ଦର୍‌; ଇରିଙ୍ଗ୍‌ ସୁନ୍ଦର୍‌ତିଙ୍ଗ୍‌ ଉନ୍‌ଡ୍ରେ ସୁକା ଆଇ ସୁକେଆଙ୍ଗାଁ ମାଣ୍‌କୁ ଆଇକା ।

42 ସାତିକାର୍‌ ମାରିଡ଼େସି ଜିବନ୍‌ଆଜି ନିଙ୍ଗିଁନିକା ବା ଆୟାୱାଜା । ୱିସ୍‌ସି ୱିତ୍‌ନିକା, ୱିଜ୍‌ଏଣ୍‌ଗା ନେର୍‌ନାତ୍‌; 43 ଗୁଟାଦୁ ମୁସାଜିମାନି ମେନ୍ଧଲ୍‍ ଅସୁନ୍ଦର୍‌ ନି ତାଗ୍‌ଇକା । ମାତର୍‌ ମାରିଡ଼େସିନିଙ୍ଗିଁତି ମେନ୍ଧଲ୍‍ ସୁନ୍ଦର୍‌ ନି ସାକ୍ତିଦିକା । 44 ଗୁଟାଦୁ ମୁସ୍‌ନିୱାଲେ ମେନ୍ଦଲ ନେଗେନ୍‌ ତେବାନାତ୍‌; ମାତର୍‌ ମାରିଡ଼େସି ଜିବନ୍‌ ଆନିୱାଲେ, ଆକା ଆନାତ୍‌ ଆତ୍ମିକ ମେନ୍ଦଲ । ନେଗି ମେନ୍ଦଲ୍‌ତି ପେଡ଼େକ୍‌ ମାନିଙ୍ଗ୍‌, ଆତ୍ମିକ ମେନ୍ଧଲ୍‍ ଆଟ୍‌ସିନାତ୍‌ । 45 ଇୟାୱାଜା ଦର୍ମସାସ୍ତ୍ରଦୁ ରାସାତା ମାନାତ୍‌, "ପ୍ରାତୁମ୍‌ତି ଲୋକ୍‌ ଆଦମ ଜିବନ୍‌ତି ଲୋକ୍‌ ଆତାନ୍‌ ।" ସାରାସାରିୱେନ୍‌କା ଆଦମ ଜିବନ୍‌ମାନି ଆତ୍ମା । 46 ମାତର୍‌ ଆମାକା ଆତ୍ମିକ, ଆକା ଆଗ୍‌ଡ଼ି ସିଲେତାତ୍‍, ମାତର୍‌ ଆମାକା ମେନ୍ଦଲ ନେଗିକା, ଆକା ଆଗ୍‌ଡ଼ି ମାର୍‌ର୍ହାତ୍‌, ତାନେୱେନ୍‌କା ଆତ୍ମିକ । 47 ଆଗ୍‍ଡ଼ିରି ଲୋକୁ ଆଦମ ମାର୍‌ଆନ୍‌ ଦୁନିଆଦୁ, ସିକ୍‌ଲାଦାନ୍‌ ତିଆର୍‌ଆତିକାନ୍‌, ମାରି ଅରେନ୍‌ ଆଦମ ମୁସ୍‌କୁପୁର୍‌ତାନ୍‌ ୱାତାମାର୍‌ର୍ହାନ୍‌ । 48 ଆମାକାର୍‌ ସିକ୍‌ଲାଦାନ୍‌ ତିଆର୍‌ଆତିକାର୍‌, ୱାର୍‌ ସିକ୍‌ଲାଦାନ୍‌ ତିଆର୍‌ଆତି ଆୟା ଲୋକ୍‌ ୱାଜା, ମାରି ଆମାକାର୍‌ ମୁସ୍‌କୁପୁର୍‌ତିକାର୍‌, ୱାର୍‌ ମୁସ୍‌କୁପୁର୍‌ତାନ୍‌ ୱାତିମାନି ଆୟା ଲୋକ୍‌ ୱାଜା । 49 ମାରି, ମାଡୁ ଏଣ୍ତେସ୍‌ ଦୁନିଆଦାନ୍‌ ସିକ୍‌ଲାଦାନ୍‌ ତିଆର୍‌ଆତି ଆୟା ଲୋକ୍‌ତି ମୁର୍ତି ଆସ୍‌ତି ମାନିକା, ଆୟାୱାଜା ଆୟା ମୁସ୍‌କୁପୁର୍‌ତି ଲୋକ୍‌ତି ମୁର୍ତି ୱାଜା ବାଦ୍‌ଲେ ଆନିକା ।

50 ଏ ତଡ଼ାନ୍‌କୁ ନି ତାଙ୍ଗିଁକି, ନାନ୍‌ ଇକା ୱେର୍‌ସିନା, ନେତେର୍‌କାଣ୍ତା ମେନ୍ଧଲ୍‍ ଆସ୍‌ସି ମାପୁରୁଦି ରାଜି ଅଦିକାର୍‌ କିଦେଙ୍ଗ୍‌ ଆଟ୍‌ଇକା, ମାରି ୱିଜ୍‌ନିକା ୱିଜ୍‌ଇତାନିଙ୍ଗ୍‌ ଅଦିକାର୍‌ କିଦେଙ୍ଗ୍‌ ଆଟ୍‍ଏତ୍‍ ।

51 ✝ୱେନ୍‌ଡ୍ରୁ, ନାନ୍‌ ମିଙ୍ଗିଁ ଉନ୍‌ଡ୍ରି ସତ୍‌ତି ମାଟା ୱେର୍‌ସିନା, ମାଡୁ ୱିଜୁଲୋକୁ ସାଇକା, ମାତର୍‌ ସାରାସାରି ମରି ଆଉଲି ଆନି ୱାଲେ, 52 ଉନ୍‌ଡ୍ରେ ଦେବାନେ, କାଣ୍‌ଗା ନାପ୍‌ନେଣ୍‌ଗା ମାଡୁ ୱିଜୁଲୋକ୍‌ ବାଦ୍‌ଲେଆନିକା; ନାସ୍ତିୱାଲେ ମରି ଅଡ଼ନାତ୍‌, ମାରି ବିସ୍‌ବାସ୍‌ତି ସାତିକାର୍‌ ଜିବନ୍‌ଆଜି ନିଙ୍ଗିଁନାର୍‌, ମାରି ମାଡୁ ୱିଜୁଲୋକ୍‌ ବାଦ୍‌ଲେଆନିକା । 53 ଇରିଙ୍ଗ୍‌ ‌ଇୟା ୱିଜ୍‌ନି ମେନ୍ଦଲ୍‌ତିଙ୍ଗ୍‌ ୱିଜ୍‌ଇକାୱାଜା ବାଦ୍‌ଲେ ଆଦେଙ୍ଗ୍‌ ପଡ଼ାନାତ୍‌; ମାରି ଇୟା ଦୁନିଆଦି ମେନ୍ଦଲ୍‌ତିଙ୍ଗ୍‌ ଜିନିନାନି ଆଙ୍ଗିଁ ଆରାଦେଙ୍ଗ୍‌ ପଡ଼ାନାତ୍‌ । 54 ଆର୍‌ତିଙ୍ଗ୍‌ ଇୟା ସାତି ମେନ୍ଧଲ୍‍ ଜିନିକା ପୟ୍‌ତିଙ୍ଗ୍‌, ଦର୍ମସାସ୍ତ୍ରଦି ଇୟା ବାକ୍ୟ ପୁରା ଆନାତ୍‌ : "ଜିଣାନିକା ସାନିତାନିଙ୍ଗ୍‌ ଆରାକିତାମାନାତ୍‌ ।"

55 "ଏ ସାନିକା, ଆମାନ୍ଧି ନି ଜିଣାନିକା ?

ଏ ସାନିକା, ଆମାନ୍ଧି ନି ଦଂସ କିନିକା ?"

56 ସାନିକା ପାପ୍‌, ମାରି ପାପ୍‌ତି ସାକ୍ତି ନିୟମ୍‌; 57 ମାତର୍‌ ଆମା ମାପୁରୁ ମା ପ୍ରବୁ ଜିସୁ କ୍ରିସ୍ତଦି ମାଣ୍‌କୁ ମାଙ୍ଗିଁ ଜିଣା କିତାମାନାନ୍‌, ୱାନିଙ୍ଗ୍‌ ଦନ୍ୟବାଦ୍‌ ଆପିତ୍‌ ।

58 ମାରି, ଏ ନା ଲାଡ୍‍ତି ତଡ଼୍‍କୁ, ପ୍ରବୁଦି ସେବାଦୁ ମି ପାଣି ବେକାର୍‌ ଆଏତ୍‍, ଇକା ନେସ୍‌ସି ପ୍ରବୁଦି ପାଣିଦୁ ତିର୍‌ ମାରି ଡାଟ୍‌ ତେବାଜି ୱିଜୁଦିନ୍‌ ନାଣ୍ତଦାନ୍‌ ନାଣ୍ତ ୱେଡ଼ିକା ଆଦୁ ।