1 ଏ ତଡ଼ାନ୍‌କୁ ନି ତାଙ୍ଗିଁକି, ନାନ୍‌ ମି ଲାକ୍‌ତୁ ମାପୁରୁଦି ସତ୍‌ତି ମାଟା ପ୍ରଚାର୍‌ କିନି ଉଣ୍ତିଙ୍ଗ୍‌ ସୋଲ୍‌ସିମାନିୱାଲେ ୱାର୍‌ଇ ମାଟେଙ୍ଗ୍‌ ମାରି ପେରିକାନ୍‌ୱାଜା ତରାଏତା ମାର୍‌ଆ । 2 ମି ୱାଲେ ମାନି ବେଡ଼ାଦୁ ଜିସୁ କ୍ରିସ୍ତ, ଅର୍ତାତ୍‌ କ୍ରୁସ୍‌କାଟ୍‌ତୁ ମୁସ୍‌କୁ ୱାନି ସାତିକା ଜିସୁ କ୍ରିସ୍ତଙ୍ଗ୍‌ ଡ଼ିସ୍‌ତିଙ୍ଗ୍‌ ମିମାନୁ ମାରି ଇନି ବିସୟ୍‌ ନେସ୍‌ଇ ଉଣ୍ତିଙ୍ଗ୍‌ ନାନ୍‌ ଇଚ୍ଛା କିତା । 3 ✝ମାରି, ନାନ୍‌ ନାସ୍ତିୱାଲେ ଦୁର୍ବଳ ମାର୍ହା, ତିଲାଜି ମାରି ନାଣ୍ତତିଏଲ୍‌ତାନ୍‌ ମି ମାନୁ ମାର୍ହା । 4 ଇୟାଉଣ୍ତିଙ୍ଗ୍‌ ନା ସିକିୟା ନି ପ୍ରଚାର୍‌, ଲୋକା ଜ୍ଞାନଦି ନେଗି ବାକ୍ୟ ଆଏଣ୍‌ଗା ମାପୁରୁଦି ଆତ୍ମା ମାରି ସାକ୍ତିଦି ପାର୍‌ମାଣ୍‌ ଆତାମାର୍‌ତା । 5 ଆଦେଙ୍ଗ୍‌ ମି ବିସ୍‌ବାସ୍‌ ଏଣ୍ତେସ୍‌ ଲୋକାଦି ଜ୍ଞାନ୍‌ ମୁସ୍‌କୁ ମାନ୍‌ଏଣ୍‌ଗା, ଆକା ମାପୁରୁଦି ସାକ୍ତି ମୁସ୍‌କୁ ତେବାନାତ୍‌ ।

6 ମାରିବା ମାଡୁ ଆତ୍ମିକ ଜିବନ୍‌ତୁ ପିର୍‌ନି ଲୋକା ମାନୁ ବୁଦିଦି ମାଟା ୱେର୍‌ସିନା, ମାତର୍‌ ଆକା ଇୟା ଜୁଗ୍‌ତି ବୁଦି ଆଏତ୍‍ ମାରି ଇୟା ଦୁନିଆଦୁ ସାସନ୍‌ କିଜିମାନି ନେତାରି ଜ୍ଞାନ୍‌ ଆଏତ୍‍ । 7 ନାନ୍‌ ମାପୁରୁଦି ସତ୍‌ତି ବୁଦିଦି ମାଟା ୱେର୍‌ସିନା, ଆୟା ଲୋକ୍‌ତିମାଣୁକୁ ଆଡ଼ାକ୍‌ତା ଇଟ୍‌ତାମାନାର୍‌, ମାରି ମା ଗୌରବ୍‌ଦି ଉଣ୍ତିଙ୍ଗ୍‌ ଦୁନିଆ ତିଆର୍‌ଆତି ଆଗ୍‍ଡ଼ିରାନ୍‍ନେ ମାପୁରୁ ଇୟାତାନିଙ୍ଗ୍‌ ତିଆର୍‌ କିତାମାର୍ହାନ୍‌ । 8 ଇୟା ଦୁନିଆଦି ଆମା ସାସନ୍‍କିନିୱାରି ଲୋଇ ଏନ୍‌ ବୁଦିଦି ବିସୟ୍‌ ନେସ୍‌ଏନ୍‌ ମାର୍‌ର୍ହାନ୍‌, ଜଦି ୱାର୍‌ ଆକା ନେସ୍‌ତିମାରିଙ୍ଗ୍‌ ଗୌରବ୍‌ମୟ୍‌ ପ୍ରବୁଙ୍ଗୁଁ କ୍ରୁସକାଟ୍‌ତୁ ମୁସ୍‌କୁ ଡାକ୍‌ଏତାର୍‌ମାନ୍ଦି; 9 ଏଣ୍ତେସ୍‌ ଦର୍ମସାସ୍ତ୍ରଦୁ ରାସାତାମାନାତ୍‌ :

"କାଣ୍‌ଗା ଆମାକା ସୁଡ଼ୁଏତ୍‌, ଗିତଣି ଆମାକା ୱେନ୍‌ଏତ୍‌,

ଆମାକା ଗଟାନିକା ଏନ୍‌ ଅଡ଼୍‌ବିଏନ୍‌,

ଆୟାୱିଜୁ ବିସୟ୍‌ ମାପୁରୁ ନିଜେଦି ଜିବନ୍‌ନୋନିୱାରି ଉଣ୍ତିଙ୍ଗ୍‌ ତିଆର୍‌ କିତାମାନାନ୍‌ ।"

10 ମାତର୍‌ ମାପୁରୁ ମା ଉଣ୍ତିଙ୍ଗ୍‌ ୱାନି ଆତ୍ମାଦାନ୍‌ ମାର୍‌ଗିତି ବିସୟ୍‌ ୱିଜୁ ୱେର୍‌ତା ମାନାନ୍‌; ଆୟା ଆତ୍ମା ନେ ମାପୁରୁଦି ନାଣ୍ତଲୋଇରି ବିସୟ୍‌କୁ ୱିଜୁ ପୟ୍‌ନାତ୍‌ । 11 ଲୋକ୍‌ତି ବିସୟ୍‌ୱିଜୁ ଲୋକ୍‌ତିମାନୁ ମାନି ଆତ୍ମାଦିଙ୍ଗ୍‌ ଡ଼ିସ୍‌ତିଙ୍ଗ୍‌ ମାରି ଏନ୍‌ ନେସ୍‌ନାନ୍‌ । ଆୟାୱାଜା ମାପୁରୁଦି ବିସୟ୍‌ୱିଜୁ ମାପୁରୁଦି ଆତ୍ମାଦିଙ୍ଗ୍‌ ଡ଼ିସ୍‌ତିଙ୍ଗ୍‌ ମାରି ଏନ୍‌ ନେସ୍‌ତେଙ୍ଗ୍‌ ଆଟ୍‍ଏନ୍‍ । 12 ଏଣ୍ତେସ୍‌ ମାପୁରୁଦି ମାଣାନ୍‌ ମାଙ୍ଗିଁ ଦୟାଦାନ୍‌ ସିତିମାନି ବିସୟ୍‌କୁୱିଜୁ ମାଡୁ ନେସ୍‌ତେଙ୍ଗ୍‌ ଆଟ୍‍ନିକା, ଇୟାଉଣ୍ତିଙ୍ଗ୍‌ ମାଡୁ ଜଗତ୍‌ତି ଆତ୍ମା ପୟ୍‌ଏଣ୍‌ଗା ମାପୁରୁଦି ଆତ୍ମା ପୟ୍‌ତିମାନିକା ।

13 ଆଦେଙ୍ଗ୍‌ ନେସ୍‌ତିମାନି ବୁଦିଦି ଲୋକା ଲାକ୍‌ତୁ ନେସ୍‌ତି ସତ୍‌ତିକା ୱେର୍‌ନିୱାଲେ ମାପୁ ଦୁନିଆଦି ବୁଦିଦାନ୍‌ ମାଟା ଇନ୍‌ଏପ୍‌ ମାନାପ୍‌, ମାତର୍‌ ଆତ୍ମିକ ବିସୟ୍‌ୱିଜୁ ଆତ୍ମିକ ବିସୟ୍‌ଦାନ୍‌ ବୁଜାକିଜି ପବିତ୍ରଆତ୍ମାଦାନ୍‌ ନେସ୍‌ତିମାନି ବାକ୍ୟଦାନ୍‌ ୱେର୍‌ନିକା । 14 ମାତର୍‌ ଦୁନିଆଦି ଲୋକୁ ମାପୁରୁଦି ଆତ୍ମାଦି ବିସୟ୍‌କୁ ମାନାଏନ୍‌, ଇରିଙ୍ଗ୍‌ ଇୟାୱିଜୁ ୱାନି ଲାକ୍‌ତୁ ମୁର୍କୁ, ମାରି ୱାନ୍‌ ଆୟାୱିଜୁ ବୁଜାଦେଙ୍ଗ୍‌ ଆଟ୍‍ଏନ୍‍, ଇରିଙ୍ଗ୍‌ କେବଲ ଆତ୍ମାଦୁମାନି ଲୋକୁ ଆୟାୱିଜୁଦିଙ୍ଗ୍‌ ବିଚାର୍‌ କିଦେଙ୍ଗ୍‌ ଆଟ୍‍ନାନ୍‍ । 15 ମାତର୍‌ ଏମେମାନି ଲୋଇ ମାପୁରୁଦି ଆତ୍ମା ତେବାନାତ୍‌, ୱାନ୍‌ ୱିଜୁ ବିସୟ୍‌ ବୁଜାଦେଙ୍ଗ୍‌ ଆଟ୍‍ନାନ୍‍, ମାରି ଏନ୍‌ ୱାନି ବିଚାର୍‌ କିଏନ୍‌ । 16 ଦର୍ମସାସ୍ତ୍ରଦୁ ଏଣ୍ତେସ୍‌ ରାସାତାମାନାତ୍‌ :

"ଏନ୍‌ ପ୍ରବୁଦି ମୋନ୍‌ତିଙ୍ଗ୍‌ ବୁଜାଦେଙ୍ଗ୍‌ ଆଟ୍‍ନାନ୍‍ ?

ଏନ୍‌ ୱାନିଙ୍ଗ୍‌ ସିକିୟା ସିଦେଙ୍ଗ୍‌ ଆଟ୍‍ନାନ୍‍ ?"

ୱାନ୍‌ ଏନ୍‌ଆପିନ୍‌, ମାପୁ କ୍ରିସ୍ତଦି ମୋନ୍‌ତିଙ୍ଗ୍‌ ମାନାତାମାନାପ୍‌ ।