1 ଏ ତଡ଼ାନ୍‌କୁ ନି ତାଙ୍ଗିଁକି, ନାନ୍‌ ମାପୁରୁଦି ଆତ୍ମାମାନି ଲୋକା ୱାଲେ ୱାର୍‌ଗିଜିସାତି ୱାଜା ମି ୱାଲେ ୱାର୍‌ଗିଜିସାଏ । ମାତର୍‌ ନାନ୍‌ ମିଙ୍ଗିଁ ଇୟା ଜଗତ୍‌ତି ଲୋକୁ ମାରି କ୍ରିସ୍ତଦି ବିସ୍‌ବାସ୍‌ତୁ ଇସ୍ରିୱାରିଙ୍ଗ୍‌ ୱେର୍‌ତି ୱାଜା ମିଙ୍ଗିଁ ୱେର୍‌ତା । 2 ✝ନାନ୍‌ ମିଙ୍ଗିଁ ପାଲୁ ଉଟ୍‌ପିସ୍‌କିଜି ଆଇ କାଦି ସିଏତା, ଇରିଙ୍ଗ୍‌ ମିର୍‌ ଆକା ଉଣ୍ତେଙ୍ଗ୍‌ ଇଚ୍ଛା ସିଲେତାତ୍‍, ମାରି ଇଲେଇବା ଇଚ୍ଛା ସିଲେତ୍‌ । 3 ଇଲେଇବା ମିର୍‌ ଦୁନିଆଦି ଲୋକା ୱାଜା ଜିଜିମାଡ଼ିଜିନିଦେର୍‌ । ମି ଲୋଇ ଆକାର୍‍ ମାରି ନିଜେନିଜେଦି ମାନୁ ଜାଟିଜଗଡ଼ା ତେବାନାତ୍‌; ଇବେଣ୍‌କୁ ଇନିକା ମିର୍‌ ମେନ୍ଦଲଇସାବ୍‌ତାନ୍‌ ମାରି ଦୁନିଆଦିକା ଇଜି ପାର୍‌ମାଣ୍‌ ଆଏଜିନିଦେର୍‌ ? 4 ✝ମି ଲୋଇରାନ୍‌ ଅରେନ୍‍ ଇନାନ୍‌, ନାନ୍‌ ପାଉଲତି ୱାଲେ ମାନିକିନ୍ଧା, ମାରି ଅରେନ୍‍ ଇନାନ୍‌, ନାନ୍‌ ଆପୋଲୋଦି ୱାଲେ ମାନିକିନ୍ଧା, ନାସ୍ତିୱାଲେ ଇନିକା ମିର୍‌ ଦୁନିଆଦି ଲୋକା ୱାଜା ସାଲାବୁଲା କିଇଜିନିଦେର୍‌ ?

5 ଆପୋଲୋ ଏନ୍‌ ? ମାରି ପାଉଲ ଏନ୍‌ ? ୱାର୍‌ ମାପୁରୁଦି ସେବାକିନିକାର୍‌, ମିଙ୍ଗିଁ ବିସ୍‌ବାସ୍‌ କିଦେଙ୍ଗ୍‌ ମାପୁ ସାହାଜ୍ୟ କିଜିନାପ୍‌ । ମାପୁରୁ ମା ମାଣ୍‌କୁ ୱିଜେରିଙ୍ଗ୍‌ ଆମା ପାଣିଦୁ ଆସ୍‌କିତାମାନାନ୍‌, ମାପୁ ଆୟା ପାଣି କିଜିନାପ୍‌ । 6 ✝ନାନ୍‌ ଉରୁତା ମାନା, ଆପୋଲୋ ଆବେନ୍‌ ଏରୁ ସିତାମାନାନ୍‌, ମାତର୍‌ ମାପୁରୁ ପିରିସ୍‌ କିତାମାନାନ୍‌ । 7 ମାରି, ଏନ୍‌ ଉରୁନାନ୍‌ ମାରି ଏନ୍‌ ଏରୁ ସିନାନ୍‌, ୱାନ୍‌ ଇନିକା ସିଲେ, ମାତର୍‌ ପିରିସ୍‌ କିତାମାନାନ୍‌ ଜେ ମାପୁରୁ, ୱାନ୍‌ ପେରିକାନ୍‌ । 8 ଏନ୍‌ ଉରୁନାନ୍‌ ମାରି ଏନ୍‌ ଏରୁ ସିନାନ୍‌, ଆୟା ରିଏର୍‌ ସାମାନ୍‌, ଇରିଙ୍ଗ୍‌ ମାପୁରୁ‌ ୱିଜେରିଙ୍ଗ୍‌ ନିଜେ ନିଜେଦି ପାଣିଦି ଇସାବ୍‌ତାନ୍‌ ପୁରସ୍କାର୍‌ ସିନାନ୍‌ । 9 ଇରିଙ୍ଗ୍‌ ମାପୁ ମାପୁରୁଦି ୱାଲେ ପାଣିକିଜିନାପ୍‌; ମିର୍‌ ମାପୁରୁଦି କିଡ଼ିଇ ମାରି ମାପୁରୁଦି ଇଲୁ ।

10 ନାଙ୍ଗିଁ ସିତିମାନି ମାପୁରୁଦି ଦୟା ଇସାବ୍‌ତାନ୍‌ ନାନ୍‌ ଅରେନ୍‍ ବୁଦିଦି ଇଲୁକୁତିଆର୍‌କିନିମେସ୍ତ୍ରି ୱାଜା ମୁଲୁକାଲୁ ପୋକ୍‌ତାମାନା, ଆଇକାନ୍‍ ଅରେନ୍‍ ଇୟା ମୁଲୁକାଲୁ ମୁସ୍‌କୁ ତିଆର୍‌ କିଜିନାନ୍‌ । ମାତର୍‌ ୱିଜୁ ଲୋକୁ ଆୟା ମୁସ୍‌କୁ ଏଣ୍ତେସ୍‌ ତିଆର୍‌ କିଜିନାନ୍‌ ଆୟା ବିସୟ୍‌ତାନ୍‌ ଜାଗ୍‌ରାତ୍‌ ଆନିକା ମାନାତ୍‌ । 11 ଇରିଙ୍ଗ୍‌ ମାପୁରୁ ଜିସୁ କ୍ରିସ୍ତଙ୍ଗ୍‌ ଉନ୍‌ଡ୍ରେନେମାତର୍‌ କୁନାନ୍ଦିକାଲୁ କିଜି ତିଆର୍‌ କିତାମାନାନ୍‌; ଆୟାତାନିଙ୍ଗ୍‌ ଡ଼ିସ୍‌ସି ଆଇ ଇନି କୁନାନ୍ଦିକାଲୁ ତିଆର୍‌ ଆଦେଙ୍ଗ୍‌ ଆଟ୍‍ଏତ୍‍ । 12 ଜଦି ଏନ୍‌ ଆୟା କୁନାନ୍ଦିକାଲୁ ମୁସ୍‌କୁ ବାଙ୍ଗାଁରାମ୍‍, ୱେଣ୍ତି, ନାଣ୍ତଦାରାଦି କାଲୁଦି ମୁସ୍‌କୁ ତିଆର୍‌ କିନାନ୍‌ ମାରି ଏନ୍‌ ଏନ୍‌ ମାରାକ୍‌, ଲାଟା ମାରି ପିରି ଦାନ୍‌ ତିଆର୍‌ କିନାନ୍‌, 13 ଆର୍‌ତିଙ୍ଗ୍‌ "କ୍ରିସ୍ତଦି ଡ଼େସିୱାନି ଦିନ୍‌ତୁ" ୱିଜୁ ଲୋକାଦି ପାଣି ଏଣ୍ତେସ୍‌ନାନିକା, ଆକା ୱେଙ୍ଗିଁନାତ୍‌, ଇରିଙ୍ଗ୍‌ ଆୟାନାଣ୍ତିଙ୍ଗ୍‌ ସିସୁଦି ୱାଲେ ୱେଙ୍ଗିଁନାତ୍‌, ମାରି ୱିଜୁ ଲୋକାଦି ପାଣି ଏଣ୍ତେସ୍‌ନାନିକା, ଆୟା ସିସୁ ପରିକା କିନାତ୍‌ । 14 କୁନାନ୍ଦିକାଲୁ ମୁସ୍‌କୁ ଆମାୱାନି ତିଆର୍‌କିତିମାନି ପାଣି ସିସୁଦି ପରିକାଦୁ ଆର୍‌ଏଣ୍‌ଗା ତେବାନାନ୍‌, ଆର୍‌ତିଙ୍ଗ୍‌ ୱାନ୍‌ ପୁରସ୍କାର୍‌ ପୟ୍‌ନାନ୍‌ । 15 ଜଦି ଆମାୱାନି ପାଣି ଦ୍ୱଂସ ଆନାତ୍‌, ୱାନିନ୍ଦିନେ ନାସ୍ଟୁ ଆନାତ୍‌, ମାରି ୱାନ୍‌ ନିଜେ ରକିୟା ପୟ୍‌ନାନ୍‌, ମାତର୍‌ ଆକା ସିସୁ ଲୋଇ ମାଟ୍‌ସି ବୁଲାତି ୱାଜା ଆନାତ୍‌ ।

16 ✝ମିର୍‌ ସତ୍‌ତାନ୍‌ ନେସ୍‌ତୁ ଜେ ମିର୍‌ ମାପୁରୁଦି ମନ୍ଦିର୍‌, ମାରି ମାପୁରୁଦି ଆତ୍ମା ମି ଲୋଇ ତେବାନାତ୍‌ । 17 ଜଦି ଏନ୍‌ ମାପୁରୁଦି ମନ୍ଦିର୍‌ତିଙ୍ଗ୍‌ ନାସ୍ଟୁ କିନାନ୍‌, ଆର୍‌ତିଙ୍ଗ୍‌ ମାପୁରୁ ୱାନିଙ୍ଗ୍‌ ନାସ୍ଟୁ କିନାନ୍‌; ଇରିଙ୍ଗ୍‌ ମାପୁରୁଦି ମନ୍ଦିର୍‌ ପବିତ୍ର, ଆୟା ମନ୍ଦିର୍‌ ମିର୍‌ ।

18 ଏନ୍‌ ନିଜେଦିଙ୍ଗ୍‌ ବାଣ୍ତିସ୍‌ କିମାକିନ୍‌ । ଜଦି ଏନ୍‌ ଇୟା ଦୁନିଆଦୁ ମି ଲୋଇରାନ୍‌ ନିଜେଦିଙ୍ଗ୍‌ ବୁଦି ଇଜି ଅଡ଼୍‌ବିନାନ୍‌, ଆର୍‌ତିଙ୍ଗ୍‌ ୱାନ୍‌ ଏଣ୍ତେସ୍‌ ବୁଦି ଆଦେଙ୍ଗ୍‌ ଆଟ୍‍ନାନ୍‍, ଇୟାଉଣ୍ତିଙ୍ଗ୍‌ ୱାନ୍‌ ମୁର୍କୁ ଆଦେଙ୍ଗ୍‌ ପଡ଼ାନାତ୍‌ । 19 ଇରିଙ୍ଗ୍‌ ଇୟା ଜଗତ୍‌ତି ଆଗ୍‌ଡ଼ି ଆମାକା ବୁଦି, ଆକା ମାପୁରୁଦି ଲାକ୍‌ତୁ ମୁର୍କୁଦିକା । ଦର୍ମସାସ୍ତ୍ରଦୁ ରାସ୍‌ତାମାନାତ୍‌, "ମାପୁରୁ ବୁଦିଦିଲୋକାଙ୍ଗ୍‌ ୱାରି ସାଲାକିଦିଙ୍ଗ୍‌ ଆସ୍‌ନାନ୍‌ ।" 20 ମାରିଡ଼େସି ସାସ୍ତ୍ରଦୁ ରାସାତାମାନାତ୍‌ ଜେ, "ପ୍ରବୁ ନେସ୍‌ନାନ୍‌ ଜେ ବୁଦିଦିଲୋକାରି ସିନ୍ତା ବେକାର୍‌ ।" 21 ମାରି, ଏନ୍‌ ଲୋକ୍‌ତିମାନୁ ଗର୍ବ କିମାକିନ୍‌ । ସତ୍‌ତାନ୍‌ ୱିଜୁ ବିସୟ୍‌ ମିଦିନେ । 22 ପାଉଲ, ଆପୋଲୋ, ପିତର୍‍, ଇୟା ଜଗତ୍‌, ଜିବନ୍‌ ମାରି ସାନିକା, ଇଲେଇ ମାରି ବବିସତ୍‌ ୱିଜୁ ମିଦିନେ । 23 ମାତର୍‌ ମିର୍‌ କ୍ରିସ୍ତଦି ଲୋକୁ ମାରି କ୍ରିସ୍ତ ମାପୁରୁଦିକାନ୍‌ ।