1 ମାପୁରୁଦି ଦୟା କିଜି ମାଙ୍ଗିଁ ଇୟା ସେବା ପାଣି ସିତିମାନିଙ୍ଗ୍ ମାଡ଼ୁ ୱେଡ଼ିକାସିଲି ଲୋକା ୱାଜା କିଇକା । 2 ସେମାର୍‌ତି ମାରି ଆରେତିପାଣି କିତି ପାଣି ୱିଜୁ ମାଡ଼ୁ ଡ଼ିସିନିକା । ମାପ୍‌ ଟକେ କିଏପ୍‍ ମାରି ମାପୁରୁଦି ବାକ୍ୟଦିଙ୍ଗ୍ ତାଗ୍‍ଇ ଅର୍ତ କିଏପ୍‍ । ମାତର ତରାନି ଇସାବ୍‍ତାନ୍‍ ମାପୁରୁଦି ଆଗ୍‍ଡ଼ି ଲୋକା ବୁଦି ଲାକୁତୁ ମାପ୍‌ ନିଜେ ନିଜେଦି ସତ୍‌ ପାର୍‍ମାଣ୍‍ କିନି ଉଣ୍ତିଙ୍ଗ୍ ଚେଷ୍ଟାକିଜିନାପ୍‍; 3 ମାତର ମା ମାଡ଼ାନ୍ ପ୍ରଚାର୍ ଆତିମାନି ସୁସମାଚାର୍‌ ଜଦି ମାର୍‍ଗିନାମାନାତ୍‍, ଆର୍‌ତିଙ୍ଗ୍‌ ଆରେତି ନାସ୍ଟୁଆନିଲୋକା ଉଣ୍ତିଙ୍ଗ୍‌ ଆକା ମାର୍‍ଗିନାମାନାତ୍‍ । 4 ୱାର୍‌ ବିସ୍‍ବାସ୍ କିଏରେ, ଇରିଙ୍ଗ୍‌ ୱାରି ମନ୍‍ତିଙ୍ଗ୍ ଇୟା ଦୁନିଆଦି ଦିୟାମ୍‌ କାଣା କିତାମାନାତ୍ । ଇସାବ୍‍ତାନ୍ ମାପୁରୁଦି ମୁର୍ତିଦି କ୍ରିସ୍ତଦି ମହିମାନ୍ନିତ ସୁସମାଚାର୍‌ତି ଜାୟ୍‌ ୱାରି ଲାକୁତୁ ସଲ୍‌ଏତ୍‍ନି । 5 ମାପ୍‌ ନିଜେଦିଙ୍ଗ୍ ପ୍ରଚାର୍‌ କିଏପ୍‍, ମାତର୍‌ କ୍ରିସ୍ତଦି ପ୍ରବୁ ଇଜି ମାରି ଜିସୁଦି ଉଣ୍ତିଙ୍ଗ୍‌ ନିଜେ ନିଜେଦିଙ୍ଗ୍ ମି ସେବାକିନିକା ଇଜି ପ୍ରଚାର୍ କିନାପ୍, 6 ଇରିଙ୍ଗ୍‌ ଆମା ମାପୁରୁ ଇର୍‌ଆମାନାନ୍‌, "ସିକାଟିଦି ଲୋଇରାନ୍‌ ଜାୟ୍‌ତିକା ଆନିକା," ଆୟା ମାପୁରୁ କ୍ରିସ୍ତଦି ମୋକମ୍‌ତାନ୍ ସାକ୍ତିଦି ମହିମା ସୁଡ଼ୁନି ଉଣ୍ତିଙ୍ଗ୍‌ ମା ଜିବନ୍‌ତୁ ଜାୟ୍‌ କିତାମାନାନ୍ ।

7 ମାତର୍‌ ମାଡୁ କେବଲ ମା ସାମାନ୍‌ତି ସିକିଲା ସାଟିଦୁ ଇୟା ମୁସ୍‌କୁପୁର୍‌ତି ଦନ୍‌ସମ୍ପତି ପୟ୍‍ତିମାନିକା । ଇବେଣ୍‌କୁ ପାର୍‍ମାଣ୍‍ ଆତାମାନାତ୍‌ ଜେ, ଇୟାୱାଜା କାବାଆନି ସାକ୍ତି ମାଦି ଆଏତ୍‍, ମାତର୍‌ ମାପୁରୁଦି । 8 ମାପ୍‌ ୱିଜୁ ଦୁଃକ୍ କାଷ୍ଟୁ ପୋଇଜିନାପ୍, ମାତର୍‌ ନିରାସ୍‌ ଆଏପ୍ । ବେଡ଼ା ବେଡ଼ାଦୁ ତିଲାଜିନାପ୍‌ ମାତର୍‌ ନିରାସ୍‌ ଆଏପ୍ । 9 ମାପ୍‌ ଦୁଃକ୍‌କାସ୍ଟୁ ପୟ୍‌ତାପ୍, ମାତର୍‌ ମାପୁରୁ ମାଙ୍ଗିଁ ଏସ୍‌କାଙ୍ଗ୍‍ ବା ଡ଼ିସ୍‍ଏନ୍‍ । ଏସ ବେଡ଼ାଦୁ ମାପ୍‌ କାସ୍ଟୁ ପୟ୍‌ତାମାନାପ୍‌, ମାତର୍‌ ଦ୍ୱଂସ ଆଏପ୍‌ । 10 ଜିସୁଦି ଜିବନ୍‌ ଏଣ୍ତେସ୍‌ ମାମାନୁ ୱେଙ୍ଗିଁନାତ୍‌, ଆୟାଉଣ୍ତିଙ୍ଗ୍‌ ମାଡୁ ୱିଜୁଦିନ୍ ମା ମେନ୍ଦଲ୍‌ତୁ ଜିସୁଦି ସାନିକା ପିଡ଼ିଜିନାପ୍‌ । 11 ଜିସୁଦି ଜିବନ୍‌ତିଙ୍ଗ୍‌ ଇୟା ସାତି ମେନ୍ଦଲ୍‌ତାନ୍‌ ୱେକ୍‌ନି ଉଣ୍ତିଙ୍ଗ୍‌ କ୍ରିସ୍ତଦି ଉଣ୍ତିଙ୍ଗ୍‌ ୱିଜୁଦିନ୍‌ତି ଜିବନ୍‌ ମାଡୁ ସାନି ମାନୁ ଆର୍‌ତି ମାନିକା । 12 ମାରି ଇୟାୱାଜା ଦାନ୍‌, ମାମାନୁ ସାନିକା ମାରି ମି ଲୋଇ ଜିବନ୍‌ତି ପାଣି କିଜି ସାଲାନିକା ।

13 ଦର୍ମସାସ୍ତ୍ରଦୁ ରାସାତା ମାନାତ୍, "ନାନ୍‌ ବିସ୍‌ବାସ୍‌ କିନି ଉଣ୍ତିଙ୍ଗ୍‌ ୱାର୍‌ଗିତା ।" ମାଡୁ ଆୟା ବିସ୍‍ବାସ୍‌ତି ଆତ୍ମା ପୟ୍‌ତିମାନିକା । ମାଡୁ ବିସ୍‍ବାସ୍ କିଜିନିକା, ଆଦେଙ୍ଗ୍‍ଁ ୱେର୍‌ସିନାପ୍‌ । 14 ମାପୁ ନେସ୍‍ନିକା, ମାପୁରୁ ପ୍ରବୁ ଜିସୁଙ୍ଗୁଁ ସାତିମାଣୁକୁ ଜିବନ୍‌ କିତାମାନାନ୍‌ । ଆୟା ମାପୁରୁ, ଜିସୁଦି ୱାଲେ ମାଙ୍ଗିଁ ବା ଜିବନ୍‌ କିନାନ୍ ମାରି ମି ୱାଲେ ମାଙ୍ଗିଁ ୱାନି ଲାକ୍‌ତୁ ଅନାନ୍ । 15 ମି ନେଗି ଉଣ୍ତିଙ୍ଗ୍‌ ଇୟାୱିଜୁ ଗଟାଜିନାତ୍ । ମାପୁରୁଦି ଦୟା ମାରି ନାଣ୍ତଦାନ୍ ନାଣ୍ତ ପିର୍‌ଜି ଲୋକାଙ୍ଗ୍‌ ମୁଟୁତାତ୍‌, ମାରି ଗାଦିଲୋକ୍‌ ନେଗି ମୋନ୍‌ତାନ୍‌ ମାପୁରୁଦି ଗୌରବ୍‍ କିନାର୍ ।

16 ଇୟାଉଣ୍ତିଙ୍ଗ୍‌ ମାପ୍‌ ଏସ୍‌କାଙ୍ଗ୍‍ ନିସାର୍‌ ଆଏପ୍‌ । ମା ମେନ୍ଧଲ୍‍ ଦିରେ ଦିରେ ୱିଜ୍‌ଜିନାତ୍‌ । ମାତର୍‌ ମା ଜିବନ୍‌ତିଆତ୍ମା ଦିନ୍‌ତିଙ୍ଗ୍‌ ଦିନ୍‌ ପୁନିକା ଆଜିନାତ୍ । 17 ଇୟା ଇସ୍ରିମାଟା ମାରି ଅଡ଼ପ୍‍ତି ଦୁକ୍ କାସ୍ଟୁ ମା ଉଣ୍ତିଙ୍ଗ୍‌ ତାସିନାତ୍ ଇସାବ୍‌ସିଲି ୱିଜୁଦିନ୍‌ତି ଗୌରବ୍‍ ପୁରା କିଜିନାତ୍‌ । ଇୟା ଗୌରବ୍‍ ଦୁଃକ୍‌କାସ୍ଟୁଦାନ୍‌ ପେରିକା । 18 ମା କାଣ୍‌ଗା ସୁଡ଼ୁନି ଜିନିସ୍‌ ମୁସ୍‌କୁ ସିଲେ, ମାତର୍‌ ତର୍‍ଇ ଜିନିସ୍‍ ମୁସ୍‌କୁ ସୁଡ଼ୁଜିନିକା, ଇରିଙ୍ଗ୍‌ ତର୍‍ନି ୱିଜୁ ଜିନିସ୍‍ ସାଣେକ୍‌ତିଙ୍ଗ୍‌, ମାତର୍‌ ଆମାକା ତର୍‍ଏତ୍, ଆକା ୱିଜୁଦିନ୍‍ ତେବାନାତ୍‍ ।